പ്രമുഖ ഇന്ത്യൻ ഫിൻടെക് സ്റ്റാർട്ടപ്പായ റെയ്സർപേ (Razorpay), ഓഹരി വിപണിയിൽ ലിസ്റ്റ് ചെയ്യാനൊരുങ്ങുന്നു. ഇതിനായുള്ള പ്രാഥമിക പ്രവർത്തനങ്ങൾ കമ്പനി ഊർജിതമാക്കിയിരിക്കുകയാണ്. ഏകദേശം ₹5,000 കോടിയോളം സമാഹരിക്കാനാണ് ലക്ഷ്യമിടുന്നത്. ഇതിനായി സെബിക്ക് (SEBI) മുൻപാകെ രഹസ്യമായി ഐപിഒ (IPO) പേപ്പറുകൾ സമർപ്പിക്കാനാണ് കമ്പനിയുടെ നീക്കം. 2021-ൽ 7.5 ബില്യൺ ഡോളർ മൂല്യം കണക്കാക്കിയിരുന്ന റെയ്സർപേ, നിലവിലെ മാർക്കറ്റ് പരിഗണിച്ച് 5-6 ബില്യൺ ഡോളർ എന്ന പുതുക്കിയ മൂല്യത്തിലായിരിക്കും ഐപിഒയ്ക്ക് പോകുന്നത്. ഓഹരി വിപണിയിൽ പ്രവേശിക്കുന്നതിന്റെ ഭാഗമായി ആസ്ഥാനം യുഎസിൽ നിന്ന് ഇന്ത്യയിലേക്ക് മാറ്റുന്ന ‘റിവേഴ്സ് ഫ്ലിപ്പ്’ (Reverse Flip) പ്രക്രിയ കമ്പനി നേരത്തെ പൂർത്തിയാക്കിയിരുന്നു. ഇതിനായി ഏതാണ്ട് 1,275 കോടി നികുതി ഇനത്തിൽ സർക്കാരിലേക്ക് അടയ്ക്കുകയും റെയ്സർപേയെ ഒരു പബ്ലിക് ലിമിറ്റഡ് കമ്പനിയായി മാറ്റുകയും ചെയ്തിരുന്നു.
സാമ്പത്തികമായി മികച്ച വളർച്ചാ നിരക്ക് റെയ്സർപേ കാഴ്ചവെക്കുന്നുണ്ടെങ്കിലും ലാഭക്ഷമതയെക്കുറിച്ചുള്ള ആശങ്കകൾ നിക്ഷേപകർക്കിടയിലുണ്ട്. 2025 സാമ്പത്തിക വർഷത്തിൽ കമ്പനിയുടെ പ്രവർത്തന വരുമാനം 65% വർധിച്ച് 3,783 കോടി രൂപയിലെത്തിയിരുന്നു. പേയ്മെന്റ് ഗേറ്റ്വേ, പോയിന്റ് ഓഫ് സെയിൽ (POS) സേവനങ്ങൾ, ബിസിനസ് ബാങ്കിംഗ് പ്ലാറ്റ്ഫോമായ റെയ്സർപേഎക്സ് (RazorpayX) എന്നിവയാണ് ഈ വളർച്ചയ്ക്ക് പ്രധാനമായും കരുത്തുപകർന്നത്. എന്നാൽ, ആസ്ഥാനം മാറ്റുന്നതുമായി ബന്ധപ്പെട്ട ഭീമമായ നികുതി ചെലവുകളും ജീവനക്കാർക്കുള്ള ഇഎസ്ഒപി (ESOP) ആനുകൂല്യങ്ങളും കമ്പനിക്ക് വലിയ ചിലവ് വരുത്തിയിരുന്നു. ഇങ്ങനെ 1,209 കോടി രൂപയുടെ അറ്റനഷ്ടം രേഖപ്പെടുത്തിയിട്ടുണ്ട്. എന്നാൽ കമ്പനിയുടെ ഓൺലൈൻ പേയ്മെന്റ് വിഭാഗം നിലവിൽ എബിറ്റ (EBITDA) തലത്തിൽ ലാഭകരമാണ്.
സമാന മേഖലയിലെ പ്രമുഖരായ ഫോൺപേ (PhonePe) അവരുടെ ഐപിഒ പ്ലാൻ പശ്ചിമേഷ്യയിലെ സംഘർഷങ്ങൾ കാരണം താൽക്കാലികമായി നിർത്തിവെച്ച സാഹചര്യത്തിലാണ് റെയ്സർപേയുടെ ഈ സുപ്രധാന നീക്കം നടത്തുന്നത് എന്നത് ശ്രദ്ധേയമാണ്. വിപണിയിലെ ചാഞ്ചാട്ടവും ആഗോള സാമ്പത്തിക അനിശ്ചിതത്വങ്ങളും റെയ്സർപേയുടെ മൂല്യനിർണ്ണയത്തെ ബാധിച്ചേക്കാം.
Fintech giant Razorpay is preparing for a ₹5,000 crore IPO at a $5-6 billion valuation. Learn about their “reverse flip” to India and plans for a public market debut.
