കോഴിക്കോട് ആസ്ഥാനമായുള്ള ബേബി മെമ്മോറിയൽ ഹോസ്പിറ്റലിൽ (BMH) 1750 കോടി രൂപയുടെ അധിക നിക്ഷേപം കൂടി നടത്തി പ്രമുഖ ആഗോള നിക്ഷേപക സ്ഥാപനമായ കെകെആർ. ഇതോടെ, 2024 ജൂലൈയിലെ ആദ്യ നിക്ഷേപത്തിന് ശേഷം ബിഎംഎച്ചിൽ കെകെആർ നടത്തിയ ആകെ നിക്ഷേപം 5,100 കോടി രൂപ കടന്നു. ഈ പുതിയ നിക്ഷേപത്തോടെ ആശുപത്രി ശൃംഖലയുടെ ഏകദേശം 75 ശതമാനം ഉടമസ്ഥാവകാശവും ഇപ്പോൾ കെകെആറിന് സ്വന്തമാണ്.
ആശുപത്രി ശൃംഖലയുടെ പ്രാദേശികമായ വിപുലീകരണവും മറ്റ് ആശുപത്രികളെ ഏറ്റെടുക്കുന്ന തന്ത്രപ്രധാനമായ നീക്കങ്ങളും ലക്ഷ്യമിട്ടാണ് ഈ വൻ നിക്ഷേപം. ഇതിന്റെ ഭാഗമായി ഹൈദരാബാദ് ആസ്ഥാനമായുള്ള സ്റ്റാർ ഹോസ്പിറ്റൽസിന്റെ 60 ശതമാനം ഓഹരികൾ 1800 കോടി രൂപയ്ക്ക് ബിഎംഎച്ച് അടുത്തിടെ ഏറ്റെടുത്തിരുന്നു. കഴിഞ്ഞ വർഷം സെപ്റ്റംബറിൽ കേരളത്തിലെ മെയ്ത്ര ഹോസ്പിറ്റലിനെയും ബിഎംഎച്ച് ഗ്രൂപ്പിന് കീഴിലാക്കിയിരുന്നു.
നിലവിൽ കേരളം, തമിഴ്നാട്, തെലങ്കാന എന്നിവിടങ്ങളിലായി ഒമ്പത് ആശുപത്രികളാണ് ബിഎംഎച്ച് ശൃംഖലയ്ക്ക് കീഴിലുള്ളത്. ആകെ 3,000 ബെഡ് കപ്പാസിറ്റിയുള്ള ഈ ഗ്രൂപ്പ് ചെന്നൈയിൽ പുതിയ ആശുപത്രി ആരംഭിക്കാനുള്ള തയ്യാറെടുപ്പിലുമാണ്. ഈ സാമ്പത്തിക വർഷം 2,500 കോടി രൂപയുടെ വരുമാനമാണ് ഗ്രൂപ്പ് പ്രതീക്ഷിക്കുന്നത്.
Global investor KKR infuses an additional ₹1,750 crore into Baby Memorial Hospital (BMH), taking its total investment to over ₹5,100 crore. Learn about BMH’s expansion plans across South India and recent acquisitions.
