കൊച്ചി ആസ്ഥാനമായി പ്രവർത്തിക്കുന്ന ആർട്ടിഫിഷ്യൽ ഇന്റലിജൻസ് കമ്പനിയായ റിയാഫി ടെക്നോളജീസ്, ലാസ് വെഗാസിൽ നടന്ന ഗൂഗിൾ ക്ലൗഡ് നെക്സ്റ്റ് പരിപാടിയിൽ 2026ലെ ‘ഗൂഗിൾ ക്ലൗഡ് പാർട്ണർ ഓഫ് ദി ഇയർ’ പുരസ്കാരം കരസ്ഥമാക്കി. ആക്സസിബിലിറ്റി ഇന്നൊവേഷൻ വിഭാഗത്തിലാണ് റിയാഫിയുടെ ‘R10’ എന്ന എന്റർപ്രൈസ് എഐ പ്ലാറ്റ്ഫോം ഈ ആഗോള അംഗീകാരം നേടിയത്.
വെറും മറുപടികൾ നൽകുന്നതിന് പകരം വിമാന ടിക്കറ്റ് ബുക്കിംഗ്, ബാങ്കിംഗ് സേവനങ്ങൾ തുടങ്ങിയ സങ്കീർണ്ണമായ ജോലികൾ നേരിട്ട് ചെയ്തുതീർക്കാൻ ശേഷിയുള്ള എഐ ഏജന്റുകളെയാണ് റിയാഫി വികസിപ്പിച്ചെടുത്തിരിക്കുന്നത്. ഇൻഡിഗോ, ഫെഡറൽ ബാങ്ക്, ഏഷ്യൻ പെയിന്റ്സ് തുടങ്ങിയ പ്രമുഖ സ്ഥാപനങ്ങളിൽ വിജയകരമായി നടപ്പിലാക്കിയ ഈ സാങ്കേതികവിദ്യ ഇതിനോടകം ട്രില്യൺ കണക്കിന് ടോക്കണുകൾ പ്രോസസ്സ് ചെയ്തതായി കമ്പനി സിഇഒ ജോൺ മാത്യു വ്യക്തമാക്കി. യഥാർത്ഥ ലോക സാഹചര്യങ്ങളിൽ തടസ്സമില്ലാതെ പ്രവർത്തിക്കുന്ന എഐ സംവിധാനങ്ങൾ ലക്ഷ്യമിട്ട് 2013ൽ ആറ് സുഹൃത്തുക്കൾ ചേർന്ന് ആരംഭിച്ച ഈ സ്റ്റാർട്ടപ്പിന്റെ വലിയൊരു നാഴികക്കല്ലാണ് ഈ നേട്ടം.
Riafy Technologies wins the Google Cloud Partner of the Year 2026 award in Las Vegas. Its R10 AI platform is recognized for revolutionizing accessibility and enterprise AI agents
