ആഗോള പ്രതിസന്ധി, കൈകോർക്കാൻ ബ്രിക്സ് രാജ്യങ്ങളോട് ഇന്ത്യ

ലോകം നേരിടുന്ന കടുത്ത വെല്ലുവിളികൾക്കും അനിശ്ചിതത്വങ്ങൾക്കും ഇടയിൽ, വളർന്നുവരുന്ന സമ്പദ്‌വ്യവസ്ഥകൾക്കിടയിൽ കൂടുതൽ ആഴത്തിലുള്ള സഹകരണം ആവശ്യമാണെന്ന് വിദേശകാര്യ മന്ത്രി എസ്. ജയശങ്കർ. ഡൽഹിയിൽ ആരംഭിച്ച BRICS വിദേശകാര്യ മന്ത്രിമാരുടെ യോഗത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം. സെപ്റ്റംബറിൽ ഇന്ത്യ ആതിഥേയത്വം വഹിക്കുന്ന 18ആമത് ബ്രിക്സ് ഉച്ചകോടിയുടെ മുന്നോടിയായാണ് ഈ രണ്ടുദിവസത്തെ നിർണ്ണായക യോഗം .

സുസ്ഥിര ശക്തിയാകണം
സംഘർഷങ്ങൾ, സാമ്പത്തിക അസ്ഥിരത, വ്യാപാര-സാങ്കേതിക വെല്ലുവിളികൾ, കാലാവസ്ഥാ വ്യതിയാനം എന്നിവ അന്താരാഷ്ട്ര ബന്ധങ്ങളെ ബാധിക്കുന്ന സാഹചര്യത്തിൽ ബ്രിക്സ് രാജ്യങ്ങൾ സുസ്ഥിര ശക്തിയായി പ്രവർത്തിക്കണമെന്ന് ജയശങ്കർ പറഞ്ഞു. പുതിയ അംഗങ്ങളെ ഉൾപ്പെടുത്തി ബ്രിക്സ് സംവിധാനത്തെ കൂടുതൽ വിപുലമാക്കാൻ ഇന്ത്യ ശ്രമിക്കുന്നതായും വികസ്വര രാജ്യങ്ങളുടെ പ്രതീക്ഷകൾ നിറവേറ്റാൻ ബ്രിക്സിന് സാധിക്കണമെന്നും അദ്ദേഹം കൂട്ടിച്ചേർത്തു. ഊർജം, ഭക്ഷണം, വളം, ആരോഗ്യം, സാമ്പത്തിക സുരക്ഷ എന്നിവ ഉറപ്പാക്കുന്നതിൽ ബ്രിക്സ് രാജ്യങ്ങൾ പരസ്പരം സഹകരിക്കണം. ഭീകരവാദത്തിനെതിരെ ശക്തമായ പോരാട്ടം ആവശ്യമാണ്. സുതാര്യമായ ഭരണത്തിനും എല്ലാവരെയും ഉൾക്കൊള്ളുന്ന വളർച്ചയ്ക്കുമായി സാങ്കേതികവിദ്യ പ്രയോജനപ്പെടുത്തണം. ഗാസയിലെ സംഘർഷങ്ങൾ ഗുരുതരമായ മാനുഷിക പ്രത്യാഘാതങ്ങൾ ഉണ്ടാക്കിയതായും അടിയന്തര വെടിനിർത്തൽ അത്യാവശ്യമാണെന്നും എസ്. ജയശങ്കർ യോഗത്തിൽ ചൂണ്ടിക്കാട്ടി.

ഇറാൻ യുദ്ധത്തിന്റെ നിഴലിൽ യോഗം
ഡൽഹിയിൽ ഈ യോഗം നടക്കുമ്പോൾ ആഗോളതലത്തിൽ ഇറാൻ-അമേരിക്ക സംഘർഷം വലിയ ആശങ്കയാണ് സൃഷ്ടിക്കുന്നത്. ഹോർമുസ് കടലിടുക്കിലെ ഗതാഗത തടസ്സവും ഊർജ്ജ പ്രതിസന്ധിയും ഇന്ത്യയടക്കമുള്ള ബ്രിക്സ് രാജ്യങ്ങളെ ബാധിക്കുന്ന വിഷയമാണ്. അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ചൈന സന്ദർശനവുമായി ഈ യോഗം ഒത്തുപോകുന്നതിനാൽ ചൈനീസ് വിദേശകാര്യ മന്ത്രി വാങ് യീ യോഗത്തിൽ പങ്കെടുക്കുന്നില്ല. പകരം ചൈനീസ് അംബാസഡറാണ് രാജ്യത്തെ പ്രതിനിധീകരിക്കുന്നത്. റഷ്യൻ വിദേശകാര്യ മന്ത്രി സെർജി ലാവ്‌റോവ്, ഇറാൻ വിദേശകാര്യ മന്ത്രി അബ്ബാസ് അരാഗ്ചി തുടങ്ങിയ പ്രമുഖർ യോഗത്തിനെത്തിയിട്ടുണ്ട്.

യുഎസ്-ഇസ്രായേൽ നടപടികളെ അപലപിച്ച് ഇറാൻ
അമേരിക്കയുടെയും ഇസ്രായേലിന്റെയും രാജ്യാന്തര നിയമലംഘനങ്ങൾക്കെതിരെ ബ്രിക്സ് രാജ്യങ്ങൾ ശക്തമായ നിലപാട് സ്വീകരിക്കണമെന്ന് ഇറാൻ വിദേശകാര്യ മന്ത്രി അബ്ബാസ് അരാഗ്ചി ഉച്ചകോടിയിൽ ആവശ്യപ്പെട്ടു. യുഎൻ ചാർട്ടർ ലംഘിക്കുന്നവരുടെ കുറ്റവിമുക്തി അവസാനിപ്പിക്കണമെന്നും കൂടുതൽ നീതിയുക്തമായ ആഗോള ക്രമം രൂപപ്പെടുത്താൻ ബ്രിക്സ് മുൻകൈ എടുക്കണമെന്നും അദ്ദേഹം പറഞ്ഞു. ആഗോള സഹകരണം ശക്തിപ്പെടുത്തേണ്ടതിന്റെ പ്രാധാന്യത്തെക്കുറിച്ച് തായ്‌ലൻഡ് വിദേശകാര്യ മന്ത്രിയും ചർച്ചയിൽ സംസാരിച്ചു. പശ്ചിമേഷ്യയിലെ അസ്ഥിരത ലോകത്തെ മുഴുവൻ ബാധിക്കുമെന്നും അതിനാൽ യുദ്ധം അടിയന്തരമായി അവസാനിപ്പിക്കണമെന്നും നേതാക്കൾ ഉച്ചകോടിയിൽ മുന്നറിയിപ്പ് നൽകി.

എന്തുകൊണ്ട് പ്രധാനം?
ആഗോളവേദികളിൽ വികസ്വര രാജ്യങ്ങളുടെ ശബ്ദം ശക്തമായി ഉയർത്തുക എന്ന ലക്ഷ്യത്തോടെയാണ് ബ്രിക്സ് പ്രവർത്തിക്കുന്നത്. വിശ്വസനീയമായ വിതരണ ശൃംഖലകളും വൈവിധ്യവൽക്കരിക്കപ്പെട്ട വിപണികളും കെട്ടിപ്പടുക്കുന്നതിനെക്കുറിച്ചുള്ള ഗൗരവമായ ചർച്ചകൾ ഈ സമ്മേളനത്തിൽ നടക്കുന്നുണ്ട്. ഒപ്പം, നിലവിലെ ഇറാൻ യുദ്ധവും ഗാസയിലെ സംഘർഷങ്ങളും യോഗത്തിൽ പ്രധാന ചർച്ചാവിഷയങ്ങളാണ്. ഇത്തരം അന്താരാഷ്ട്ര പ്രതിസന്ധികളിൽ നയതന്ത്രത്തിലൂടെയും ചർച്ചകളിലൂടെയും സമാധാനപരമായ പരിഹാരം കണ്ടെത്തണമെന്ന ഇന്ത്യയുടെ ശക്തമായ നിലപാടും ഈ ഒത്തുചേരലിനെ ഏറെ പ്രാധാന്യമുള്ളതാക്കുന്നു.

External Affairs Minister S. Jaishankar addresses the BRICS Foreign Ministers’ meet in Delhi. Key discussions on global stability, Iran-US conflict, and the Gaza crisis