പ്രതിരോധ മേഖലയിൽ സ്വയംപര്യാപ്തത കൈവരിക്കാനുള്ള ഇന്ത്യയുടെ ശ്രമങ്ങൾക്ക് കരുത്തുപകർന്നുകൊണ്ട്, രാജ്യത്തെ ആദ്യത്തെ സ്വകാര്യ മറൈൻ ഗ്യാസ് ടർബൈൻ (MGT) നിർമ്മാണ-അറ്റകുറ്റപ്പണി കേന്ദ്രം വിശാഖപട്ടണത്ത് വരുന്നു. പ്രമുഖ ഇന്ത്യൻ കമ്പനിയായ ഭാരത് ഫോർജ് ഇതിനായി ആന്ധ്രാപ്രദേശ് സർക്കാരുമായി ധാരണാപത്രം (MoU) ഒപ്പുവെച്ചു. പുട്ടപർത്തിയിൽ നടന്ന ചടങ്ങിൽ കേന്ദ്ര പ്രതിരോധ മന്ത്രി രാജ്നാഥ് സിംഗ്, ആന്ധ്രാപ്രദേശ് മുഖ്യമന്ത്രി എൻ. ചന്ദ്രബാബു നായിഡു എന്നിവരുടെ സാന്നിധ്യത്തിലാണ് ഈ ചരിത്ര കരാർ ഒപ്പിട്ടത്.
ഇന്ത്യൻ നാവികസേനയുടെ യുദ്ധക്കപ്പലുകളുടെ പ്രധാന ചാലകശക്തിയായ ഗ്യാസ് ടർബൈനുകളുടെ അറ്റകുറ്റപ്പണികൾക്കായി ഇതുവരെ വിദേശ രാജ്യങ്ങളെയാണ് ഇന്ത്യ പ്രധാനമായും ആശ്രയിച്ചിരുന്നത്. വിശാഖപട്ടണത്തെ നേവൽ ഡോക്യാർഡിന് സമീപം 80 ഏക്കറിലായി നിർമ്മിക്കുന്ന ഈ അത്യാധുനിക ഹബ്ബ് വഴി വിദേശ വിതരണ ശൃംഖലകളിലെ തടസ്സങ്ങൾ ഒഴിവാക്കാനും നാവികസേനയ്ക്ക് ആവശ്യമായ സാങ്കേതിക സഹായങ്ങൾ വേഗത്തിൽ നൽകാനും സാധിക്കും. ഏകദേശം 750 ഓളം പേർക്ക് നേരിട്ടും അല്ലാതെയും തൊഴിലവസരങ്ങൾ സൃഷ്ടിക്കുന്ന ഈ വൻ പദ്ധതി ആന്ധ്രാപ്രദേശിനെ രാജ്യത്തെ പ്രമുഖ പ്രതിരോധ നിർമ്മാണ കേന്ദ്രമായി മാറ്റുമെന്നാണ് പ്രതീക്ഷിക്കുന്നത്.
Bharat Forge has signed an MoU with the Andhra Pradesh government to establish India’s first private Marine Gas Turbine (MGT) hub in Visakhapatnam for Indian Navy warships.
