ആദ്യ ദിനം ബോക്സോഫീസിൽ വൻ കുതിപ്പോടെ ആരംഭിച്ച് മോഹൻലാൽ-ജീത്തു ജോസഫ് ചിത്രം ‘ദൃശ്യം 3’. റിലീസ് ചെയ്ത ആദ്യ ദിനം തന്നെ ചിത്രം ഇന്ത്യയിൽ നിന്ന് 15.85 കോടി രൂപയുടെ നെറ്റ് കളക്ഷൻ നേടിയതായാണ് റിപ്പോർട്ടുകൾ. മേയ് 21-ന് തീയേറ്ററുകളിലെത്തിയ ഈ സസ്പെൻസ് ത്രില്ലറിന് സോഷ്യൽ മീഡിയയിൽ സമ്മിശ്ര പ്രതികരണങ്ങളാണ് ലഭിച്ചതെങ്കിലും, തീയേറ്ററുകളിൽ ജനത്തിരക്കിന് ഒട്ടും കുറവുണ്ടായില്ല. ഇന്ത്യയിലെ ആകെ ഗ്രോസ് കളക്ഷൻ 18.37 കോടിയോളമാണ്. കേരളത്തിൽ മാത്രം 11.15 കോടി രൂപ ഗ്രോസ് കളക്ഷൻ സ്വന്തമാക്കിക്കൊണ്ട് ഈ വർഷത്തെ ഏറ്റവും വലിയ മലയാളം ഓപ്പണിങ്ങുകളിൽ ഒന്നായി മാറാനും ചിത്രത്തിന് സാധിച്ചു.
കേരളത്തിൽ 3,500-ലധികം ഷോകളിലായി 67 ശതമാനത്തോളം തിയേറ്റർ ഒക്യുപൻസിയാണ് ചിത്രം രേഖപ്പെടുത്തിയത്. പ്രത്യേകിച്ച് ഈവനിംഗ്, നൈറ്റ് ഷോകളിൽ വലിയ രീതിയിലുള്ള ആരാധക പങ്കാളിത്തമാണ് ദൃശ്യം 3-ന് ലഭിച്ചത്. കേരളത്തിന് പുറമെ തെലുങ്ക് പതിപ്പും ആദ്യദിനം തിരഞ്ഞെടുത്ത കേന്ദ്രങ്ങളിൽ നിന്ന് 1.50 കോടി രൂപ സ്വന്തമാക്കി. വിദേശ വിപണികളിലും ചിത്രം വലിയ ചലനമാണ് ഉണ്ടാക്കിയത്. ഓവർസീസ് മാർക്കറ്റിൽ നിന്ന് ആദ്യദിനം മാത്രം 25 കോടി രൂപയോളം ഗ്രോസ് കളക്ഷൻ നേടിയതോടെ ചിത്രത്തിന്റെ ആദ്യ 24 മണിക്കൂറിലെ ആകെ ലോകമെമ്പാടുമുള്ള കളക്ഷൻ 43.37 കോടി രൂപയായി ഉയർന്നു.
