ഡൽഹി സർവ്വകലാശാലയിലെ മലയാളി വിദ്യാർത്ഥികളായ മിസ്ഹാബ്, മുഹമ്മദ് നിഹാദ്, അഭിഷേക് രൂപേഷ് എന്നിവർ തങ്ങളുടെ ദീർഘദൂര ട്രെയിൻ യാത്രകളിൽ അനുഭവിച്ച ശുചിത്വപ്രശ്നങ്ങളിൽ നിന്നാണ് ‘ട്രാവൽ എസൻഷ്യ’ (Travel Essentia) എന്ന സ്റ്റാർട്ടപ്പിന് തുടക്കം കുറിച്ചത്. ട്രെയിനുകളിലെ ശുചിമുറി ഉപയോഗവും വ്യക്തിശുചിത്വവും വലിയ വെല്ലുവിളിയാകുന്ന പശ്ചാത്തലത്തിൽ, സുഹൃത്തായ സുഹൈലിനെയും ഒപ്പം കൂട്ടി ഇവർ ദീർഘദൂര യാത്രക്കാർക്കായി പ്രത്യേക റെയിൽ ഹൈജീൻ കിറ്റ് വികസിപ്പിച്ചെടുത്തു. ടൂത്ത് ബ്രഷ്, ടൂത്ത് പേസ്റ്റ് ടാബ്ലറ്റുകൾ, വെറ്റ് വൈപ്സ്, വെറ്റ് ടവലുകൾ, പേപ്പർ സോപ്പ്, സാനിറ്റൈസർ, ടോയ്ലറ്റ് സീറ്റ് കവറുകൾ, കട്ട്ലറി സെറ്റ്, ഫേസ് മാസ്ക്, കോട്ടൺ പൗച്ച് എന്നിവയടങ്ങുന്ന 10 അവശ്യവസ്തുക്കളാണ് 149 രൂപ മാത്രം വിലയുള്ള ഈ കിറ്റിലുള്ളത്. യാത്രക്കാർക്ക് വിനോദത്തിനായി ലൂഡോ, Snake and Ladder കളിക്കാവുന്ന ബോർഡായി മാറ്റാൻ കഴിയുന്ന കാർഡ്ബോർഡ് ബോക്സിലാണ് ഈ കിറ്റ് രൂപകൽപ്പന ചെയ്തിരിക്കുന്നത്.
ഗുരുഗ്രാം ആസ്ഥാനമായി പ്രവർത്തിക്കുന്ന ഈ സ്റ്റാർട്ടപ്പിന് ഗുരുഗ്രാമിലും കോഴിക്കോടും വെയർഹൗസുകളുണ്ട്. കഴിഞ്ഞ ഏപ്രിൽ 16-ന് കോഴിക്കോട് റെയിൽവേ സ്റ്റേഷനിൽ ആരംഭിച്ച പ്രൊമോഷണൽ സ്റ്റോറിലൂടെയാണ് ഇവർ കിറ്റ് ഔദ്യോഗികമായി പുറത്തിറക്കിയത്. ഓൺലൈൻ വഴി രാജ്യത്തുടനീളം മികച്ച പ്രതികരണമാണ് ഈ ഉൽപ്പന്നത്തിന് ലഭിച്ചുകൊണ്ടിരിക്കുന്നത്. വരും ദിവസങ്ങളിൽ റെയിൽവേ സ്റ്റേഷനുകളിൽ നേരിട്ട് ലഭ്യമാക്കാനും വിവിധ ട്രാവൽ ഏജൻസികളുമായി സഹകരിക്കാനും ഇവർ പദ്ധതിയിടുന്നുണ്ട്. വരും മാസം മംഗളൂരു – തിരുവനന്തപുരം വന്ദേ ഭാരത് എക്സ്പ്രസിൽ ഈ ഹൈജീൻ കിറ്റുകൾ വിതരണം ചെയ്യാനുള്ള ഒരുക്കത്തിലാണ് ഈ യുവസംരംഭകർ. ഭാവിയിൽ രാജധാനി, മംഗള എക്സ്പ്രസ് തുടങ്ങിയ ട്രെയിനുകളിലേക്കും ദീർഘദൂര ബസ് യാത്രക്കാർക്കായുള്ള പ്രത്യേക കിറ്റുകളിലേക്കും പ്രവർത്തനം വ്യാപിപ്പിക്കാൻ ഇവർ ലക്ഷ്യമിടുന്നു.
Travel Essentia, a startup by Malayali youth, launches an affordable ‘Rail Hygiene Kit’ for ₹149 to ensure personal hygiene and cleanliness during long-distance train journeys.
