ഏറെ പ്രതീക്ഷയോടെ യു.ഡി.എഫ്. സര്ക്കാര് കൊണ്ടുവരുന്ന ‘വിസ്മയ ബജറ്റ്’ അവതരിപ്പിക്കാന് ധനകാര്യ വകുപ്പ് കൈകാര്യം ചെയ്യുന്ന മുഖ്യമന്ത്രി വി.ഡി. സതീശന് തയാറെടുപ്പു തുടങ്ങി. ലക്ഷ്യം കടക്കെണിയിൽ ആണ്ട് പോയ സംസ്ഥാന ധനവകുപ്പിനെ സമ്പന്നമാക്കുക തന്നെയാണ്. ജനപ്രിയ പ്രഖ്യാപനങ്ങളോടെ, ‘പ്രത്യാശ’ മുഖമുദ്രയാക്കുന്ന ബജറ്റാണ് അണിയറയില് ഒരുങ്ങുന്നതെന്നാണു സൂചന. യുവജനതയുടെ താല്പര്യങ്ങൾ കൂടി ഉള്ക്കൊള്ളുന്ന ‘ജെന് സി’ ബജറ്റാകും മുഖ്യമന്ത്രി അവതരിപ്പിക്കുക എന്നും സൂചനകളുണ്ട്.
സംരംഭങ്ങൾക്ക് പ്രത്യാശിക്കാവുന്ന ബജറ്റാകും വരിക. പുതിയ നിക്ഷേപങ്ങള് കൊണ്ടുവന്നു വന് തോതില് പുതിയ തൊഴിലവസരങ്ങള് സൃഷ്ടിക്കാനുള്ള ബൃഹത്തായ പദ്ധതികള് പ്രഖ്യാപിക്കുമെന്നാണു സൂചന.
ബജറ്റിലേക്ക് മികച്ച നിര്ദേശങ്ങള് സമര്പ്പിക്കുന്ന വകുപ്പ് സെക്രട്ടറിമാര്ക്കു പ്രത്യേക വെയിറ്റേജ് നല്കും. രാജ്യാന്തര ശ്രദ്ധ നേടിയ ധനകാര്യ വിദഗ്ധരുടെ വലിയൊരു സംഘം മുഖ്യമന്ത്രിയുടെ ടീമിലുണ്ട്. അനാവശ്യ ചെലവുകൾ കുറയ്ക്കാൻ നിർദ്ദേശങ്ങളുണ്ടാകും. ബോര്ഡുകളുടെയും പി എസ് യു അടക്കം കോര്പ്പറേഷനുകളുടെയും ധൂര്ത്ത് പൂര്ണമായും വെട്ടിക്കുറച്ച് കേരളത്തെ സാമ്പത്തിക സുരക്ഷിതത്വത്തിലേക്ക് നയിക്കാനുള്ള മാജിക് പോയിന്റുകളാകും ബജറ്റായി നിയമസഭയ്ക്കു മുന്നിലെത്തുകയെന്നാണു സൂചന.
പെന്ഷന് പ്രായം വര്ധിപ്പിക്കാൻ ധവള പത്രം നിർദേശിച്ചെങ്കിലും ആ തീരുമാനം ഈ ബജറ്റില് ഉണ്ടായേക്കില്ല. പെന്ഷന് പ്രായം കൂട്ടുന്നതു ലക്ഷക്കണക്കിന് ഉദ്യോഗാര്ഥികളുടെ തൊഴില് സാധ്യതകളെ ബാധിക്കുമെന്ന മുന്നണിയുടെ നയത്തില്നിന്നു പിന്നോട്ടുപോകാന് ഇടയില്ല. സര്ക്കാര് ഓഫീസുകളുടെ പ്രവൃത്തി ദിവസം അഞ്ചായി ചുരുക്കുന്ന കാര്യവും പരിഗണനയിലുണ്ട്.
സാമൂഹികക്ഷേമ പെന്ഷനുകള് കുടിശികയില്ലാതെ കൃത്യസമയത്തു ജനങ്ങളിലെത്തിക്കാനുള്ള വിഹിതം കണ്ടെത്താനുള്ള വഴികളും ബജറ്റില് വിഭാവനം ചെയ്തേക്കും . പാവപ്പെട്ടവരുടെ പെന്ഷന് വിതരണം ഒരു കാരണവശാലും മുടങ്ങില്ലെന്ന ഉറപ്പ് ജനങ്ങള്ക്കു നല്കാനാണ് സര്ക്കാരിന്റെ നീക്കം. കാര്ഷിക മേഖലയിലെ തകര്ച്ച പരിഹരിക്കാന് വലിയ തുക നീക്കിവയ്ക്കും. കര്ഷകരെ കടക്കെണിയില്നിന്നു രക്ഷിക്കാന് പ്രത്യേക പാക്കേജുകളും കുട്ടനാട്, വയനാട്, ഇടുക്കി മേഖലകള്ക്കായി പ്രത്യേക പുനരുദ്ധാരണ പദ്ധതികളും ബജറ്റില് ഇടംപിടിക്കുമെന്നാണു വിലയിരുത്തല്.
The upcoming Kerala UDF Budget 2026 is expected to prioritize investments, jobs, welfare, fiscal reforms, and economic recovery under Chief Minister V.D. Satheesan.
