കൊച്ചിയിലെ മെട്രോ സ്റ്റേഷനുകളിൽ മിൽമയുടെ ഓട്ടോമാറ്റിക് വെൻഡിങ് മെഷീനുകളും നഗരത്തിൽ പുതിയ ‘ചിൽ മിൽ’ ഫ്രാഞ്ചൈസികളും പ്രവർത്തനമാരംഭിച്ചു. മിൽമയുടെ എറണാകുളം മേഖല സഹകരണ ക്ഷീരോത്പാദക യൂണിയൻ നടപ്പിലാക്കിയ ഈ പദ്ധതിയുടെ ഉദ്ഘാടനം മൃഗസംരക്ഷണ-ക്ഷീരവികസന വകുപ്പ് മന്ത്രി ബിന്ദു കൃഷ്ണ നിർവ്വഹിച്ചു.
പ്രതിദിനം ഒരു കോടി ലിറ്റർ പാൽ ഉത്പാദനം എന്ന ലക്ഷ്യം കൈവരിക്കാൻ മിൽമ പ്രതിജ്ഞാബദ്ധമാണെന്ന് മന്ത്രി ചടങ്ങിൽ വ്യക്തമാക്കി. മിൽമ സംഘടിപ്പിക്കുന്ന പരിപാടികളിൽ ക്ഷീരകർഷകരുടെ സജീവ പങ്കാളിത്തം ഉറപ്പാക്കണമെന്നും, ഇത്തരം അത്യാധുനിക സംവിധാനങ്ങൾ വിപണിയിൽ മിൽമയുടെ സാന്നിധ്യം വർദ്ധിപ്പിക്കുമെന്നും മന്ത്രി കൂട്ടിച്ചേർത്തു.
യുവതലമുറയ്ക്കിടയിൽ മിൽമ ഉൽപ്പന്നങ്ങളുടെ ജനപ്രീതി വർദ്ധിപ്പിക്കുന്നതിനായി ‘ചിൽ മിൽ’ ഫ്രാഞ്ചൈസികളുടെ ഉദ്ഘാടനം ഹൈബി ഈഡൻ എം.പി നിർവ്വഹിച്ചു. വിപണിയിൽ മിൽമയുടെ സാന്നിധ്യം കൂടുതൽ വിപുലമാക്കുന്നതിന്റെ ഭാഗമായി മിൽമ എം.ഡി ആസിഫ് കെ. യൂസഫും അബാദ് ഫുഡ്സ് സി.ഇ.ഒ ഫറാസ് ജാവീദും തമ്മിൽ ചടങ്ങിൽ വെച്ച് ധാരണാപത്രം ഒപ്പുവെച്ചു.
Milma introduces automatic dairy vending machines at Kochi Metro stations and opens new ‘Chill Mil’ franchises to boost market presence and accessibility.
