‘മൾട്ടി-റോൾ ഫൈറ്റർ എയർക്രാഫ്റ്റ്’ (MRFA) പദ്ധതിയുടെ ഭാഗമായി 114 റഫേൽ പോർവിമാനങ്ങൾ കൂടി സ്വന്തമാക്കാനുള്ള ഇന്ത്യയുടെ നീക്കം പാകിസ്ഥാൻ പ്രതിരോധ വൃത്തങ്ങളിൽ കടുത്ത ആശങ്കയാണ് സൃഷ്ടിച്ചിരിക്കുന്നത്. നിലവിലുള്ള 36 റഫേലുകൾക്ക് പുറമെ 114 എണ്ണം കൂടി എത്തുന്നതോടെ, ഇന്ത്യയുടെ കൈവശമുള്ള ആകെ റഫേൽ വിമാനങ്ങളുടെ എണ്ണം 150-ലധികമാകും. ഇത്രയും വലിയൊരു വ്യോമസേനയെ ഒരേസമയം വിവിധ അതിർത്തികളിൽ വിന്യസിക്കാൻ ഇന്ത്യക്ക് സാധിക്കുമെന്നതാണ് പാകിസ്ഥാനെ ഭയപ്പെടുത്തുന്നത്. ആധുനിക സെൻസറുകൾ, ഇലക്ട്രോണിക് യുദ്ധമുറകൾ, ദൂരപരിധിക്ക് അപ്പുറത്തുള്ള ലക്ഷ്യങ്ങളെ തകർക്കുന്ന മെറ്റിയർ മിസൈലുകൾ എന്നിവയുള്ള റഫേലിന്റെ സാന്നിധ്യം പാകിസ്ഥാന്റെ വ്യോമ പ്രതിരോധ തന്ത്രങ്ങളെ അട്ടിമറിക്കുമെന്ന് പ്രതിരോധ വിദഗ്ധർ വിലയിരുത്തുന്നു.
ഇന്ത്യയുടെ ഈ വമ്പൻ കുതിച്ചുചാട്ടം പാകിസ്ഥാന്റെ പരമ്പരാഗത വ്യോമ തന്ത്രങ്ങൾക്കെതിരെയുള്ള വലിയ വെല്ലുവിളിയായാണ് കണക്കാക്കപ്പെടുന്നത്. എഫ്-16, ജെ-10സിഇ, ജെഎഫ്-17 തുടങ്ങിയ വിമാനങ്ങളെ ഉപയോഗിച്ച് ഇന്ത്യയുടെ വലിയ വ്യോമസേനയോട് കിടപിടിക്കാൻ പാകിസ്ഥാൻ നാളിതുവരെ ശ്രമിച്ചിരുന്നത് പൈലറ്റുമാരുടെ പരിശീലനവും ആധുനിക സാങ്കേതികവിദ്യയും മുൻനിർത്തിയാണ്. എന്നാൽ, വലിയൊരു റഫേൽ വ്യോമവ്യൂഹം സജ്ജമായാൽ ഇത്തരം തന്ത്രങ്ങൾ പരാജയപ്പെടാൻ സാധ്യതയുണ്ടെന്ന് പാക് പ്രതിരോധ വിദഗ്ധർ ആശങ്കപ്പെടുന്നു. ശത്രുവിനെ കാഴ്ചയ്ക്ക് അപ്പുറത്തുനിന്ന് തന്നെ കണ്ടെത്താനും തകർക്കാനും ശേഷിയുള്ള റഫേലുകൾ വരുന്നത്, ഇരുരാജ്യങ്ങളും തമ്മിലുള്ള ആകാശ യുദ്ധങ്ങളിലെ അധികാരസമവാക്യം പൂർണ്ണമായും ഇന്ത്യക്ക് അനുകൂലമാക്കുമെന്നാണ് പാകിസ്ഥാന്റെ വിലയിരുത്തൽ.
India’s plan to acquire 114 additional Rafale fighter jets under the MRFA project raises major concerns in Pakistan over the shifting balance of air power
