പ്രത്യേക ഡെസ്ക്ടോപ്പ് ആപ്പുകളുടെ സഹായമില്ലാതെ തന്നെ വെബ് ബ്രൗസറുകൾ വഴി നേരിട്ട് ഓഡിയോ, വീഡിയോ കോളുകൾ ചെയ്യാനുള്ള പുതിയ ഫീച്ചറുമായി വാട്സാപ്പ്. വാട്സാപ്പ് ഹെഡ് കുനാൽ ഷായാണ് ബ്രൗസർ വഴിയുള്ള ഈ കോളിംഗ് സേവനം ഔദ്യോഗികമായി പ്രഖ്യാപിച്ചത്. ഈ പുതിയ അപ്ഡേറ്റ് വഴി ഉപയോക്താക്കൾക്ക് സോഫ്റ്റ്വെയർ ഡൗൺലോഡ് ചെയ്യാതെ തന്നെ വ്യക്തിഗത ഗ്രൂപ്പ് കോളുകളിൽ പങ്കെടുക്കാൻ സാധിക്കുമെന്നതാണ് പ്രധാന പ്രത്യേകത.
ബ്രൗസർ കോളിംഗിന് പുറമെ, കോൾ ട്രാൻസ്ഫർ, ഗ്രൂപ്പ് കോളുകൾക്കായുള്ള വെയിറ്റിംഗ് റൂം, പെട്ടെന്ന് എച്ച്.ഡി നിലവാരം നൽകുന്ന ക്വിക്ക് എച്ച്.ഡി, നോയ്സ് സപ്രഷൻ തുടങ്ങിയ മികച്ച ഫീച്ചറുകളും വാട്സാപ്പ് അവതരിപ്പിച്ചിട്ടുണ്ട്. മറ്റ് പ്ലാറ്റ്ഫോമുകൾ പോലെ തന്നെ വെബ് വഴി നടത്തുന്ന കോളുകളും എൻഡ്-ടു-എൻഡ് എൻക്രിപ്ഷൻ വഴി പൂർണ്ണ സുരക്ഷിതമായിരിക്കുമെന്ന് കമ്പനി വ്യക്തമാക്കിയിട്ടുണ്ട്. ഈ പുതിയ ഫീച്ചറുകൾ വരുന്ന ആഴ്ചകളിൽ ഘട്ടംഘട്ടമായി എല്ലാ ഉപയോക്താക്കൾക്കും ലഭ്യമായി തുടങ്ങും.
WhatsApp introduces direct audio and video calling from web browsers without needing desktop apps, along with Quick HD, Noise Suppression, and Call Transfer features.
