വിദേശ പ്രതിരോധ സംവിധാനങ്ങളെ ആശ്രയിക്കുന്നത് കുറയ്ക്കുക എന്ന ലക്ഷ്യത്തോടെ, ഇന്ത്യയുടെ തദ്ദേശീയ വ്യോമ പ്രതിരോധ സംവിധാനമായ ‘പ്രൊജക്റ്റ് കുശ’യുടെ (Project Kusha) ആദ്യ പരീക്ഷണം വിജയകരമായി പൂർത്തിയായി. റഷ്യയുടെ എസ്-400 (S-400), അമേരിക്കയുടെ പാട്രിയറ്റ് തുടങ്ങിയ ലോകോത്തര പ്രതിരോധ സംവിധാനങ്ങൾക്ക് ബദലായി ഡി.ആർ.ഡി.ഒ വികസിപ്പിച്ചെടുക്കുന്ന ഈ ദൂരപരിധി കൂടിയ ഉപരിതല-വ്യോമ മിസൈൽ സംവിധാനം (ER-SAM) രാജ്യത്തിന്റെ സുരക്ഷാ കരുത്ത് വർദ്ധിപ്പിക്കും. ചൈനയിൽ നിന്നും പാകിസ്ഥാനിൽ നിന്നും ഉണ്ടാകാവുന്ന വ്യോമാക്രമണങ്ങളെ പ്രതിരോധിക്കാൻ ലക്ഷ്യമിട്ടുള്ള ‘മിഷൻ സുദർശൻ ചക്ര’യുടെ ഭാഗമായാണ് 400 കിലോമീറ്റർ വരെ ദൂരപരിധിയുള്ള ഈ കുശ മിസൈൽ വികസിപ്പിച്ചിരിക്കുന്നത്.
പോർവിമാനങ്ങൾ, ക്രൂയിസ് മിസൈലുകൾ, ഡ്രോണുകൾ, ഹൈപ്പർസോണിക് ഭീഷണികൾ എന്നിവയെ തടയാൻ M1, M2, M3 എന്നിങ്ങനെ മൂന്ന് വ്യത്യസ്ത തരം ഇന്റർസെപ്റ്റർ മിസൈലുകളാണ് പ്രൊജക്റ്റ് കുശയിൽ ഉപയോഗിക്കുന്നത്. ഇതിൽ M1 മിസൈൽ 150 കിലോമീറ്റർ ദൂരവും, M2 മിസൈൽ 250 കിലോമീറ്റർ ദൂരവും, M3 മിസൈൽ 400 കിലോമീറ്റർ വരെയുള്ള ദൂരപരിധിയുമുള്ള വ്യോമ ലക്ഷ്യങ്ങളെ തകർത്തെറിയാൻ ശേഷിയുള്ളതാണ്. തുടക്കത്തിൽ റഷ്യയുടെ എസ്-400 സംവിധാനത്തിനൊപ്പം പ്രവർത്തിക്കുന്ന കുശ, ഭാവിയിൽ അവയ്ക്ക് പകരമായി ഇന്ത്യയുടെ പ്രധാന ദീർഘകാല വ്യോമ പ്രതിരോധ കവചമായി മാറും. തദ്ദേശീയമായി വികസിപ്പിച്ചെടുത്ത റഡാറുകളും സോഫ്റ്റ്വെയറുകളും ഉപയോഗിക്കുന്ന ഈ പദ്ധതി 2028-നും 2030-നും ഇടയിൽ പൂർണ്ണമായി സൈന്യത്തിന്റെ ഭാഗമാക്കാനാണ് ലക്ഷ്യമിടുന്നത്.
DRDO successfully tests India’s indigenous air defence system ‘Project Kusha’, aimed at cutting dependence on Russian S-400 and boosting long-range interception capabilities.
