ഭൂമിയുടെ താഴ്ന്ന ഭ്രമണപഥത്തിൽ (Low Earth Orbit) ബഹിരാകാശ വസ്തുക്കളുടെ എണ്ണം വർദ്ധിച്ചുവരുന്നതിനാൽ, ഇന്ത്യയുടെ സജീവ ഉപഗ്രഹങ്ങൾ വലിയ കൂട്ടിയിടി ഭീഷണി നേരിടുന്നതായി കേന്ദ്ര ബഹിരാകാശ സഹമന്ത്രി ജിതേന്ദ്ര സിംഗ് ലോക്സഭയെ അറിയിച്ചു. ആകെ 22 സജീവ ഉപഗ്രഹങ്ങളിൽ 20 എണ്ണവും 2,000 കിലോമീറ്ററിൽ താഴെ ഉയരമുള്ള ഈ ഭ്രമണപഥത്തിലാണ് പ്രവർത്തിക്കുന്നത്.
ബഹിരാകാശത്തെ ഈ തിരക്ക് കാരണം ഉപഗ്രഹങ്ങൾക്ക് ഉണ്ടാകാനിടയുള്ള അപകടസാധ്യത ഒഴിവാക്കുന്നതിനായി, ഐ.എസ്.ആർ.ഒ 2025ൽ 20 കൊളീഷൻ അവോയ്ഡൻസ് മാനുവറുകളും (CAM) 2026ൽ ഇതുവരെ 9 മാനുവറുകളും നടത്തിയിട്ടുണ്ട്. ബഹിരാകാശ മാലിന്യങ്ങൾ ലഘൂകരിക്കുന്നതിന്റെ ഭാഗമായി ഭാവിയിൽ സർക്കാരിന്റെയും സ്വകാര്യ മേഖലയുടെയും എല്ലാ ബഹിരാകാശ ദൗത്യങ്ങളും ‘സീറോ ഡെബ്രിസ്’ ലക്ഷ്യത്തിലെത്തിക്കാൻ ഐ.എസ്.ആർ.ഒ പ്രവർത്തിക്കുന്നുണ്ടെന്ന് മന്ത്രി വ്യക്തമാക്കി.
ഇതിനായി 2024ൽ ‘ഡെബ്രിസ് ഫ്രീ സ്പേസ് മിഷൻ’ (DFSM) പ്രഖ്യാപിച്ചിരുന്നു. കൂടാതെ, ബഹിരാകാശ വസ്തുക്കളെ നിരീക്ഷിക്കുന്നതിനായി ശ്രീഹരിക്കോട്ടയിലെ മൾട്ടി-ഒബ്ജക്റ്റ് ട്രാക്കിംഗ് റഡാറും (MOTR) ലഡാക്കിലെ ഹാൻലെയിൽ നിർമ്മാണത്തിലിരിക്കുന്ന ഒപ്റ്റിക്കൽ ടെലിസ്കോപ്പും അടങ്ങിയ NETRA പദ്ധതിയും സജീവമായി പുരോഗമിച്ചുവരികയാണ്.
Union Minister Jitendra Singh told Parliament that 20 of India’s 22 active satellites in Low Earth Orbit face heightened collision risks due to space crowding
