വിഴിഞ്ഞം അന്താരാഷ്ട്ര തുറമുഖത്ത് കയറ്റുമതി-ഇറക്കുമതി പ്രവർത്തനങ്ങൾ ആരംഭിച്ചതോടെ കേരളത്തിന്റെ സാമ്പത്തിക രംഗത്ത് ചരിത്രപരമായ മുന്നേറ്റമാണ് ഉണ്ടാകുന്നത്. ഇതിന്റെ ഭാഗമായി പ്രഖ്യാപിച്ച ‘മിഷൻ സമുദ്ര’ പദ്ധതി സംസ്ഥാനത്തിന്റെ വ്യാവസായിക വളർച്ചയ്ക്കും വലിയ കുതിപ്പേകും. തുറമുഖ കേന്ദ്രീകൃത വികസനം ലക്ഷ്യമിടുന്ന ഈ പദ്ധതിയിലൂടെ എട്ട് വ്യവസായ ക്ലസ്റ്ററുകളും മൂന്ന് പുതിയ നഗരങ്ങളും കേരളത്തിന്റെ തീരദേശവും വികസിപ്പിക്കാനാണ് സർക്കാർ ലക്ഷ്യമിടുന്നത്. പദ്ധതിക്കായി 400 കോടി രൂപയുടെ ഫണ്ടും അനുവദിച്ചിട്ടുണ്ട്.
ഇതോടെ വിഴിഞ്ഞം വെറുമൊരു ട്രാൻസ്ഷിപ്പ്മെന്റ് കേന്ദ്രം എന്ന നിലയിൽനിന്നും ഇന്ത്യയിലെ ഏറ്റവും പ്രധാനപ്പെട്ട വാണിജ്യ കവാടമായി മാറുകയാണ്. ഈ EXIM പ്രവർത്തനങ്ങളുടെ ഫലമായി കയറ്റുമതിക്കാർക്ക് കൊളംബോ, സിംഗപ്പൂർ, ദുബായ് തുടങ്ങിയ തുറമുഖങ്ങളെ ആശ്രയിക്കാതെ നേരിട്ട് ചരക്കുകൾ അയക്കാൻ സാധിക്കും. ഇത് വഴി യാത്രാസമയവും ലോജിസ്റ്റിക് ചെലവുകളും പകുതിയായി കുറയും.
കാർഷിക ഉൽപ്പന്നങ്ങൾ, സുഗന്ധവ്യഞ്ജനങ്ങൾ, കശുവണ്ടി, സമുദ്രോൽപ്പന്നങ്ങൾ, കൈത്തറി, കയർ തുടങ്ങിയ മേഖലകളിലെ ചെറുകിട-ഇടത്തരം സംരംഭകർക്ക് ഇത് വലിയ അവസരങ്ങൾ തുറന്നുനൽകും. കൂടാതെ വെയർഹൗസിങ്, കോൾഡ് സ്റ്റോറേജ്, ലോജിസ്റ്റിക്സ് പാർക്കുകൾ എന്നിവയുടെ വളർച്ചയിലൂടെ ആയിരക്കണക്കിന് പുതിയ തൊഴിലവസരങ്ങളും സൃഷ്ടിക്കപ്പെടും.
പൂർണ്ണ തോതിലുള്ള റോഡ്-റെയിൽ കണക്റ്റിവിറ്റി യാഥാർത്ഥ്യമാകുന്നതോടെ ഇന്ത്യയിലെ വലിയൊരു ശതമാനം കയറ്റുമതിയും വിഴിഞ്ഞം വഴി കടന്നുപോകുമെന്നാണ് പ്രതീക്ഷിക്കുന്നത്. ഇത് കേരളത്തെ ഉപഭോക്തൃ സംസ്ഥാനമെന്ന നിലയിൽ നിന്ന് ഏഷ്യയിലെ പ്രമുഖ നിർമ്മാണ-കയറ്റുമതി കേന്ദ്രമാക്കി മാറ്റും.
Vizhinjam International Seaport launches EXIM operations alongside Mission Samudra, cutting logistics costs and positioning Kerala as a major trade hub.
