മധ്യവർഗ്ഗ കുടുംബത്തിലെ മാതാപിതാക്കളുടെ ആഗ്രഹപ്രകാരം സിവിൽ സർവീസ് അടക്കമുള്ള സുരക്ഷിതമായ സർക്കാർ ജോലി തിരഞ്ഞെടുക്കേണ്ടിയിരുന്ന വിദിത് ആത്രെ, തികച്ചും വ്യത്യസ്തമായ പാതയാണ് തന്റെ ജീവിതത്തിനായി തിരഞ്ഞെടുത്തത്. ഐ.ഐ.ടി ഡൽഹിയിൽ നിന്ന് ബി.ടെക് ബിരുദം നേടിയ ശേഷം ഐടിസി പോലുള്ള കമ്പനികളിൽ ജോലി ചെയ്ത അദ്ദേഹം, ചെറുബിസിനസ്സുകൾ നേരിടുന്ന യഥാർത്ഥ പ്രശ്നങ്ങൾ മനസ്സിലാക്കിയാണ് സ്റ്റാർട്ടപ്പ് രംഗത്തേക്ക് പ്രവേശിക്കുന്നത്.
വാട്സാപ്പ് വഴി വ്യാപാരം നടത്തിയിരുന്ന ചെറുകിട വ്യാപാരികളുടെയും വനിതാ സംരംഭകരുടെയും ആവശ്യങ്ങൾ തിരിച്ചറിഞ്ഞ അദ്ദേഹം, തുടക്കത്തിൽ ‘ഫാഷ്നിയർ’ എന്ന പേരിൽ ഹൈപ്പർലോക്കൽ ഫാഷൻ ഡെലിവറി പ്ലാറ്റ്ഫോം ആരംഭിച്ചെങ്കിലും പിന്നീട് ബിസിനസ്സ് രീതികൾ മാറ്റിമറിക്കുകയായിരുന്നു.
നിരവധി പരാജയങ്ങളിൽ നിന്ന് പഠിച്ച പാഠങ്ങളും തുടർച്ചയായ പരീക്ഷണങ്ങളുമാണ് ഒടുവിൽ ‘മീഷോ’ (Meesho) എന്ന ഇ-കൊമേഴ്സ് വമ്പന്റെ വിജയത്തിലേക്ക് നയിച്ചത്. സൂറത്ത്, ജയ്പൂർ തുടങ്ങിയ നഗരങ്ങളിലെ ചെറുകിട വ്യാപാരികളെ നേരിൽ കണ്ട് അവർക്കൊരു ഡിജിറ്റൽ മുഖം നൽകിയ മീഷോ, പിന്നീട് ലക്ഷക്കണക്കിന് ഉപയോക്താക്കളെയും വിൽപ്പനക്കാരെയും ബന്ധിപ്പിക്കുന്ന പ്ലാറ്റ്ഫോമായി വളർന്നു.
Y Combinator പിന്തുണയോടെ വളർച്ച കൈവരിച്ച കമ്പനി, അടുത്തിടെ ഓഹരി വിപണിയിൽ പ്രവേശിക്കുകയും ചെയ്തു. നിലവിൽ 95,000 കോടി രൂപയിലധികം വിപണി മൂല്യമുള്ള രാജ്യത്തെ മുൻനിര കൺസ്യൂമർ ഇന്റർനെറ്റ് വിജയകഥകളിലൊന്നായി മീഷോയും അതിന്റെ സഹസ്ഥാപകനുമായ വിദിത് ആത്രെയും മാറിക്കഴിഞ്ഞു.
Read how Vidit Aatrey, an IIT Delhi alumnus, chose entrepreneurship over a safe government job to build Meesho into a ₹95,000 crore e-commerce giant
