കപ്പൽ നിർമ്മാണവും അറ്റകുറ്റപ്പണികളും ശക്തിപ്പെടുത്തുന്നതിന്റെ ഭാഗമായി കൊച്ചിൻ ഷിപ്പ്യാർഡ് ലിമിറ്റഡും (CSL) സിനർജി മറൈൻ ഗ്രൂപ്പും (Synergy Marine Group) ധാരണാപത്രത്തിൽ ഒപ്പുവെച്ചു. ഇന്ത്യയിൽ കപ്പൽ നിർമ്മാണം, അറ്റകുറ്റപ്പണികൾ, വെസൽ കൺവേർഷൻ പ്രോജക്റ്റുകൾ എന്നിവ സംയുക്തമായി നടപ്പിലാക്കുകയാണ് ഈ സഹകരണത്തിന്റെ ലക്ഷ്യം.
സിനർജിയുടെ ഷിപ്പ് എൻജിനീയറിങ്, പ്രൊജക്റ്റ് മാനേജ്മെന്റ് വൈദഗ്ധ്യവും കൊച്ചിൻ ഷിപ്പ്യാർഡിന്റെ നിർമ്മാണ ശേഷിയും ഒന്നിക്കുന്നതോടെ രാജ്യത്തെ സമുദ്ര യാത്രാ മേഖലയ്ക്ക് വലിയ കുതിച്ചുചാട്ടമാകും ലഭിക്കുക. കപ്പൽ നിർമ്മാണത്തിന് പുറമെ മൊഡ്യൂൾ ഫാബ്രിക്കേഷൻ, എണ്ണ-പ്രകൃതിവാതക പദ്ധതികൾ എന്നിവയിലും ഇരു കമ്പനികളും സംയുക്തമായി പ്രവർത്തിക്കും.
സി.എസ്.എൽ-ന്റെ പുതിയ നിർമ്മാണ പ്രവർത്തനങ്ങൾക്ക് ആവശ്യമായ പ്രൊജക്റ്റ് പ്ലാനിങ്, ക്വാളിറ്റി അഷുറൻസ് തുടങ്ങിയ കാര്യങ്ങളിൽ സാങ്കേതിക ഉപദേശക പിന്തുണയും സിനർജി നൽകും. ഇന്ത്യയുടെ ‘മാരിടൈം അമൃത് കാൽ വിഷൻ 2047’-ന് അനുസൃതമായി രാജ്യത്തിന്റെ സമുദ്ര വ്യാവസായിക ശേഷി വർദ്ധിപ്പിക്കാൻ ഈ കൂട്ടുകെട്ട് സഹായകരമാകുമെന്ന് കമ്പനി അധികൃതർ വ്യക്തമാക്കി.
Cochin Shipyard Limited partners with Synergy Marine Group to boost shipbuilding, repairs, and vessel conversion projects under Maritime Amrit Kaal Vision 2047.
