പഞ്ചസാര ഉൽപ്പാദനത്തെ മാത്രം ആശ്രയിച്ചുനിൽക്കാതെ, എഥനോളും കംപ്രസ്ഡ് ബയോഗ്യാസും (CBG) മറ്റ് മൂല്യവർദ്ധിത ഉൽപ്പന്നങ്ങളും നിർമ്മിക്കുന്നതിലേക്ക് രാജ്യത്തെ പഞ്ചസാര ഫാക്ടറികൾ മാറണമെന്ന് കേന്ദ്ര മന്ത്രി നിതിൻ ഗഡ്കരി ആവശ്യപ്പെട്ടു. നാഷണൽ ഫെഡറേഷൻ ഓഫ് കോഓപ്പറേറ്റീവ് ഷുഗർ ഫാക്ടറീസിന്റെ (NFCSF) അവാർഡ് ദാന ചടങ്ങിൽ സംസാരിക്കവെയാണ്, ആഗോള വിപണിയിലെ വിലയിടിവുകളിൽ നിന്നും കർഷകരെയും മില്ലുകളെയും രക്ഷിക്കാൻ ഈ വൈവിധ്യവൽക്കരണം അത്യന്താപേക്ഷിതമാണെന്ന് അദ്ദേഹം വ്യക്തമാക്കിയത്. കാർഷിക മേഖലയെ ഊർജ്ജ മേഖലയുമായി സംയോജിപ്പിക്കുന്നത് വഴി കർഷകരുടെ വരുമാനം വർദ്ധിപ്പിക്കാൻ സാധിക്കുമെന്നും അദ്ദേഹം കൂട്ടിച്ചേർത്തു.
കരിമ്പിന്റെ അവശിഷ്ടങ്ങൾ, വൈക്കോൽ, മുള തുടങ്ങിയവ ഉപയോഗിച്ച് ജൈവ ഇന്ധനങ്ങൾ നിർമ്മിക്കുന്ന ‘വേസ്റ്റ് ടു വെൽത്ത്’ മാതൃകയിലേക്ക് മില്ലുകൾ മാറേണ്ടതുണ്ടെന്നും ഗഡ്കരി നിർദ്ദേശിച്ചു. പഞ്ചസാര സംസ്കരണ വേളയിലുള്ള ഉപോൽപ്പന്നങ്ങൾ ഫലപ്രദമായി വിനിയോഗിക്കുന്നതിലൂടെ കോസ്മെറ്റിക്സ് ഉൾപ്പെടെയുള്ള വ്യവസായങ്ങൾക്ക് ആവശ്യമായ വാക്സ് പോലുള്ള മൂല്യവർദ്ധിത ഉൽപ്പന്നങ്ങൾ ഉണ്ടാക്കാനാകും. സുസ്ഥിര വ്യോമ ഇന്ധനം (SAF), ഫ്ലെക്സ്-ഫ്യൂവൽ വാഹനങ്ങൾ, ചോളം അടിസ്ഥാനമാക്കിയുള്ള എഥനോൾ ഉൽപ്പാദനം എന്നിവയിലൂടെ കർഷകരെ കേവലം പരമ്പരാഗത ഉൽപ്പന്ന വിതരണക്കാർ എന്നതിലുപരി ഊർജ്ജ ഉൽപ്പാദകരായി മാറ്റാൻ സാധിക്കുമെന്നും അദ്ദേഹം ചൂണ്ടിക്കാട്ടി.
Union Minister Nitin Gadkari calls on sugar mills to transform into biofuel hubs by producing ethanol, CBG, and aviation fuel to boost farmers’ income.
