ആർട്ടിഫിഷ്യൽ ഇന്റലിജൻസ് (AI), സെമികണ്ടക്ടറുകൾ, ബഹിരാകാശ സാങ്കേതികവിദ്യ, ഡ്രോണുകൾ തുടങ്ങിയ അത്യാധുനിക ‘ഡീപ് ടെക്’ (Deep Tech) സ്റ്റാർട്ടപ്പുകളെ പിന്തുണയ്ക്കുന്നതിനായി ഇന്ത്യ 25 ബില്യൺ ഡോളറിന്റെ വൻ നിക്ഷേപത്തിനൊരുങ്ങുന്നു. ആഗോള സാങ്കേതിക രംഗത്ത് അമേരിക്കയ്ക്കും ചൈനയ്ക്കും ഒപ്പമെത്താനും വിദേശ സാങ്കേതികവിദ്യകളെ ആശ്രയിക്കുന്നത് പരമാവധി കുറയ്ക്കാനും ലക്ഷ്യമിട്ടാണ് ഈ നീക്കം.
റിസർച്ച് ഡെവലപ്‌മെന്റ് ഇൻഫ്രാസ്ട്രക്ചർ ഫണ്ടിലൂടെ സർക്കാർ 11 ബില്യൺ ഡോളർ വാഗ്ദാനം ചെയ്തിട്ടുണ്ട്. ഇതിന് പുറമെ വെഞ്ച്വർ ക്യാപിറ്റൽ, പ്രൈവറ്റ് ഇക്വിറ്റി ഫണ്ടുകളുടെ പങ്കാളിത്തവും മറ്റ് നിക്ഷേപങ്ങളും ചേരുമ്പോഴാണ് മൊത്തം നിക്ഷേപം 25 ബില്യൺ ഡോളറായി ഉയരുന്നത്. ഭൂരാഷ്ട്രീയ തർക്കങ്ങളും വിദേശ രാജ്യങ്ങളുടെ സാങ്കേതിക ഉപരോധങ്ങളും ശക്തമാകുന്ന പശ്ചാത്തലത്തിലാണ് ഇന്ത്യ ഡീപ് ടെക് മേഖലയ്ക്ക് വലിയ പ്രാധാന്യം നൽകുന്നത്.
അമേരിക്കയുടെയും ചൈനയുടെയും കയറ്റുമതി നിയന്ത്രണങ്ങളും നയങ്ങളും ആഭ്യന്തര കമ്പനികൾക്ക് വെല്ലുവിളിയാകാതിരിക്കാൻ സ്വന്തം കാലിൽ നിൽക്കാൻ കഴിയുന്ന ആവാസവ്യവസ്ഥയാണ് രാജ്യം ലക്ഷ്യമിടുന്നത്. കഴിഞ്ഞ വർഷം ഡീപ് ടെക് മേഖലയിലേക്ക് റെക്കോർഡ് നിക്ഷേപം ഒഴുകിയെത്തിയിരുന്നെങ്കിലും, വലിയ തുകയുടെ ഫണ്ടിംഗ് നൽകാൻ ശേഷിയുള്ള ആഭ്യന്തര നിക്ഷേപകരുടെ കുറവ് ഇപ്പോഴും വെല്ലുവിളിയാണ്. എങ്കിലും സ്കൈറൂട്ട്, സർവം തുടങ്ങിയ മുൻനിര സ്റ്റാർട്ടപ്പുകളുടെ വളർച്ച ഇന്ത്യയുടെ ഡീപ് ടെക് ഭാവിയെ കൂടുതൽ ശുഭപ്രതീക്ഷയോടെ കാണാൻ പ്രേരിപ്പിക്കുന്നതാണെന്ന് വിദഗ്ധർ ചൂണ്ടിക്കാണിക്കുന്നു.
India prepares a massive $25 billion deep tech investment push to support AI, semiconductor, drone, and space startups, aiming to compete globally with the US and China.
