‘മേക്ക് ഇൻ ഇന്ത്യ’ പദ്ധതിക്ക് കരുത്തേകി രാജ്യത്തെ ആദ്യ മൾട്ടി-പർപ്പസ് യുദ്ധക്കപ്പലായ ‘ഐഎൻഎസ് സമർത്ഥക്’ (INS Samarthak) ഇന്ത്യൻ നാവികസേനയുടെ ഭാഗമായിരിക്കുകയാണ്. കർണാടകയിലെ കാർവാർ നേവൽ ബേസിൽ നടന്ന ചടങ്ങിൽ ഉപരാഷ്ട്രപതി സി.പി. രാധാകൃഷ്ണൻ, നാവികസേനാ മേധാവി അഡ്മിറൽ കൃഷ്ണ സ്വാമിനാഥൻ തുടങ്ങിയ പ്രമുഖരുടെ സാന്നിധ്യത്തിലാണ് കപ്പൽ ഔദ്യോഗികമായി നാവികസേനയിൽ കമ്മീഷൻ ചെയ്തത്. പ്രതിരോധ മേഖലയിലെ തദ്ദേശീയ സ്വയംപര്യാപ്തതയിലേക്കുള്ള നിർണ്ണായക നാഴികക്കല്ലായാണ് ഈ നേട്ടം വിലയിരുത്തപ്പെടുന്നത്.
ലാർസൻ ആൻഡ് ടുബ്രോ (L&T) സ്വകാര്യ കപ്പൽശാല തദ്ദേശീയമായി രൂപകൽപ്പന ചെയ്ത് നിർമ്മിച്ച രണ്ട് മൾട്ടി-പർപ്പസ് വെസലുകളിൽ ആദ്യത്തേതാണ് സമർത്ഥക്. 75 ശതമാനത്തിലധികം തദ്ദേശീയ ഘടകങ്ങൾ ഉപയോഗിച്ചാണ് ഈ യുദ്ധക്കപ്പൽ തയ്യാറാക്കിയിരിക്കുന്നത്. ഇന്ത്യയിൽ വികസിപ്പിച്ചെടുക്കുന്ന ആധുനിക ആയുധങ്ങളും സെൻസറുകളും പരിശോധിച്ച് വിലയിരുത്തുന്നതിനുള്ള പ്രധാന പ്ലാറ്റ്‌ഫോമായി ഇത് പ്രവർത്തിക്കും. ഇതിലൂടെ വിദേശ സാങ്കേതികവിദ്യകളെയും പരിശോധനാ സംവിധാനങ്ങളെയും ആശ്രയിക്കുന്നത് വലിയ അളവിൽ കുറയ്ക്കാൻ നാവികസേനയ്ക്ക് സാധിക്കും.
സമുദ്ര നിരീക്ഷണത്തിനും പട്രോളിംഗിനും പുറമെ ദുരന്തനിവാരണ പ്രവർത്തനങ്ങൾ, രക്ഷാപ്രവർത്തനങ്ങൾ, പരിമിതമായ രീതിയിലുള്ള ആശുപത്രി കപ്പലായുള്ള ഉപയോഗം തുടങ്ങി വിവിധ ദൗത്യങ്ങൾ നിർവ്വഹിക്കാൻ സമർത്ഥക്കിന് ശേഷിയുണ്ട്. കടലിലെ വെല്ലുവിളികൾ നിറഞ്ഞ സാഹചര്യങ്ങളെ കാര്യക്ഷമമായി നേരിടാൻ പ്രാപ്തിയുള്ള ഈ കപ്പൽ ഭാവിയിലെ നാവികസേനാ നീക്കങ്ങളിൽ നിർണ്ണായക പങ്കുവഹിക്കും.
INS Samarthak, the Indian Navy’s first multi-purpose vessel built by L&T with over 75% indigenous content, was officially commissioned at Karwar Naval Base to boost defense self-reliance.
