യാത്രക്കാർക്ക് നഷ്ടപ്പെടുന്ന സാധനങ്ങൾ വേഗത്തിൽ കണ്ടെത്താനും ട്രാക്ക് ചെയ്യാനുമായി ഹൈദരാബാദ് രാജ്യാന്തര വിമാനത്താവളം പുതിയ ഡിജിറ്റൽ സംവിധാനം അവതരിപ്പിച്ചു. യാത്രക്കാർക്കായി തത്സമയ ‘ലോസ്റ്റ് ആൻഡ് ഫൗണ്ട്’ എന്ന ട്രാക്കിംഗ് പ്ലാറ്റ്‌ഫോമാണ് എയർപോർട്ട് പുറത്തിറക്കിയത്. വിമാനത്താവളത്തിൽ വെച്ച് സാധനങ്ങൾ നഷ്ടപ്പെടുന്ന യാത്രക്കാർക്ക് ഈ ഓൺലൈൻ പോർട്ടൽ വഴി പരാതി നൽകാനും, സാധനങ്ങളുടെ നിലവിലെ അവസ്ഥ തത്സമയം നിരീക്ഷിക്കാനും (Real-time tracking) സാധിക്കും.
വിമാനത്താവള ഔദ്യോഗിക വെബ്‌സൈറ്റിലെ ലോസ്റ്റ് ആൻഡ് ഫൗണ്ട് പോർട്ടൽ സന്ദർശിച്ച് യാത്രക്കാർക്ക് ലളിതമായ രീതിയിൽ പരാതി രജിസ്റ്റർ ചെയ്യാൻ കഴിയും. പേരും ബന്ധപ്പെടാനുള്ള വിവരങ്ങളും നൽകി, നഷ്ടപ്പെട്ട വസ്തുവിന്റെ വിഭാഗവും വിവരങ്ങളും രേഖപ്പെടുത്തുമ്പോൾ ഇമെയിൽ വഴി ഒരു യുണീക്ക് റെഫറൻസ് ഐ.ഡി ലഭിക്കും. ഈ ഐ.ഡി ഉപയോഗിച്ച് സാധനം കണ്ടെത്തുന്നതുവരെയുള്ള വിവരങ്ങൾ കൃത്യമായി പരിശോധിക്കാനും, ജീവനക്കാരുമായി ബന്ധപ്പെടാനും പുതിയ സംവിധാനത്തിലൂടെ സാധിക്കുമെന്ന് വിമാനത്താവള അധികൃതർ വ്യക്തമാക്കി.
Hyderabad International Airport introduces a real-time ‘Lost & Found’ online tracking portal, enabling passengers to report and track missing items easily.
