ഇന്ത്യൻ ഇരുചക്ര വാഹന നിർമ്മാതാക്കളായ ടിവിഎസ് മോട്ടോർ കമ്പനി ജനപ്രിയ റെട്രോ മോഡലായ റോണിന്റെ പുതിയ ‘അഗോണ്ട എഡിഷൻ’ (Agonda Edition) ഇന്തോനേഷ്യൻ വിപണിയിൽ അവതരിപ്പിച്ചു. 37.08 ദശലക്ഷം ഇന്തോനേഷ്യൻ റൂപിയയാണ് (ഏകദേശം 1.94 ലക്ഷം രൂപ) പുതിയ എഡിഷന്റെ എക്സ്-ഷോറൂം വില. ദക്ഷിണേഷ്യൻ രാജ്യങ്ങളിൽ കമ്പനിയുടെ ബ്രാൻഡ് സാന്നിധ്യം ശക്തമാക്കുന്നതിന്റെ ഭാഗമായാണ് ഈ വിപുലീകരണം.
ഗോവയിലെ പ്രശസ്തമായ അഗോണ്ട കടൽത്തീരത്തുനിന്നും കസ്റ്റം ബീച്ച് സൈക്ലിംഗ് ശൈലികളിൽ നിന്നും പ്രചോദനം ഉൾക്കൊണ്ടാണ് ഇതിന്റെ ലുക്ക് രൂപകൽപ്പന ചെയ്തിരിക്കുന്നത്. വെളുത്ത ഫ്യുവൽ ടാങ്കിൽ ചുവപ്പും നീലയും നിറങ്ങളിലുള്ള പിൻസ്ട്രൈപ്പുകൾ നൽകിയിരിക്കുന്നത് ബൈക്കിന് വേറിട്ട ആകർഷകമായ രൂപം നൽകുന്നു. 225 സിസി എഞ്ചിനാണ് വാഹനത്തിൽ നൽകിയിരിക്കുന്നത്. സിംഗിൾ-ചാനൽ എബിഎസ്, സ്ലിപ്പർ ക്ലച്ച്, രണ്ട് റൈഡിംഗ് മോഡുകൾ, കുറഞ്ഞ വേഗതയിൽ ഗതാഗതക്കുരുക്കിൽ ആയാസരഹിതമായി വാഹനം മുന്നോട്ട് കൊണ്ടുപോകാൻ സഹായിക്കുന്ന ഗ്ലൈഡ് ത്രൂ ടെക്നോളജി (GTT) എന്നിവയും റോണിൻ അഗോണ്ട എഡിഷനിൽ ലഭ്യമാണ്.
TVS Motor Company has launched the TVS Ronin Agonda edition in Indonesia, featuring a Goa beach-inspired design and a 225cc engine.
