പിതാവിന്റെ അകാല വിയോഗത്തെ തുടർന്ന് മൂന്നാം ക്ലാസിൽ പഠനം അവസാനിപ്പിക്കേണ്ടി വന്ന ഒരാൾ, പതിറ്റാണ്ടുകൾക്ക് ശേഷം കവിതകളിലൂടെ രാജ്യത്തിന്റെ പരമോന്നത സിവിലിയൻ ബഹുമതികളിലൊന്നായ പത്മശ്രീ നേടുകയും സർവ്വകലാശാലാ ഗവേഷണ വിഷയമായി മാറുകയും ചെയ്യുക. ഒഡീഷയിലെ അൽമോറ സ്വദേശിയായ ഹൽധർ നാഗ് എന്ന ജനകീയ കവിയുടെ ജീവിത കഥയാണിത്. ബാല്യകാലത്ത് തന്നെ സാമ്പത്തിക പ്രയാസങ്ങൾ കാരണം പഠനം ഉപേക്ഷിച്ച അദ്ദേഹം, പലഹാരക്കടയിൽ പാത്രം കഴുകിയും പിന്നീട് സ്കൂളിൽ പാചകക്കാരനായും ജോലി ചെയ്താണ് ഉപജീവനം കണ്ടെത്തിയത്. തുടർന്ന് സ്കൂൾ വിദ്യാർത്ഥികൾക്കായി ചെറിയ മിഠായിക്കട ആരംഭിച്ച അദ്ദേഹം, ഒഴിവുസമയങ്ങളിൽ വടക്കുപടിഞ്ഞാറൻ ഒഡീഷയിലെ പ്രാദേശിക ഭാഷയായ ‘കോസ്‌ലി’യിൽ കവിതകൾ എഴുതാൻ തുടങ്ങി.
1990ൽ ‘ധോഡോ ബർഗാഛ്’ എന്ന കവിത പ്രാദേശിക മാസികയിൽ പ്രസിദ്ധീകരിച്ചതോടെയാണ് കവി എന്ന നിലയിൽ ഹൽധർ നാഗ് ശ്രദ്ധിക്കപ്പെടുന്നത്. പ്രകൃതി, സമൂഹം, സംസ്കാരം, സാമൂഹിക നീതികേടുകൾ എന്നിവയെ പ്രമേയമാക്കി ലളിതമായ ഭാഷയിൽ അദ്ദേഹം എഴുതിയ കവിതകൾ സാധാരണക്കാരുടെ മനസ്സ് കീഴടക്കി. മനുഷ്യജീവിതവുമായി നേരിട്ട് ബന്ധമുള്ളതും സന്ദേശമുള്ളതുമായിരിക്കണം കവിത എന്നതായിരുന്നു അദ്ദേഹത്തിന്റെ കാഴ്ചപ്പാട്. ‘ലോക് കവി രത്ന’ എന്ന പേരിൽ അറിയപ്പെട്ട അദ്ദേഹത്തിന്റെ രചനകൾ പീഡിതരുടെയും സാധാരണക്കാരുടെയും ശബ്ദമായി മാറി.
കോസ്‌ലി-സാംബൽപുരി ഭാഷയ്ക്കും സാഹിത്യത്തിനും നൽകിയ സംഭാവനകൾ പരിഗണിച്ച് 2016-ൽ രാജ്യം അദ്ദേഹത്തിന് ‘പത്മശ്രീ’ നൽകി ആദരിച്ചു. കൂടാതെ കേന്ദ്ര സാഹിത്യ അക്കാദമിയുടെ ‘ഭാഷാ സമ്മാൻ’ പുരസ്കാരവും അദ്ദേഹത്തെ തേടിയെത്തി. സാംബൽപൂർ സർവ്വകലാശാല അദ്ദേഹത്തിന്റെ രചനകൾ ക്രോഡീകരിച്ച് പാഠ്യപദ്ധതിയുടെ ഭാഗമാക്കുകയും നിരവധി ഗവേഷകർ അദ്ദേഹത്തിന്റെ കവിതകളെ ആസ്പദമാക്കി പി.എച്ച്.ഡി പഠനം നടത്തുകയും ചെയ്തു. ഒരു വ്യക്തിയുടെ അറിവും സർഗ്ഗശേഷിയും സർട്ടിഫിക്കറ്റുകളിൽ മാത്രമല്ല അളക്കപ്പെടുന്നത് എന്ന് തെളിയിക്കുന്നതാണ് ഈ ജനകീയ കവിയുടെ ജീവിത യാത്ര.
Discover the inspiring journey of Haldhar Nag, a Class 3 dropout from Odisha who won the Padma Shri for his iconic Kosli poetry and literary contributions.
