രാജ്യത്തെ 14 ലക്ഷത്തോളം വരുന്ന കര, നാവിക, വ്യോമസേനാ അംഗങ്ങളുടെ സ്വകാര്യ വാഹനങ്ങൾക്കും ടോൾ ഇളവ് വ്യാപിപ്പിക്കാൻ കേന്ദ്ര സർക്കാർ നടപടികൾ ആരംഭിച്ചു. ടോൾ പ്ലാസകളിലെ തടസ്സമില്ലാത്ത യാത്രയ്ക്കായി മൾട്ടി-ലൈൻ ഫ്രീ ഫ്ലോ (MLFF) ഹൈവേ ടോളിങ് സംവിധാനം നടപ്പിലാക്കുമ്പോൾ, സൈനികരുടെ സ്വകാര്യ വാഹനങ്ങൾക്ക് ഓട്ടോമാറ്റിക്കായി ഇ-ചെല്ലാനുകൾ അയക്കപ്പെടുന്നത് തടയാനാണ് ഈ നടപടി. നിലവിൽ തിരിച്ചറിയൽ കാർഡ് കാണിച്ചാണ് സൈനികർ സ്വകാര്യ വാഹനങ്ങളിൽ ടോൾ ഇളവ് നേടുന്നത്. എന്നാൽ പുതിയ ക്യാമറ-റേഡിയോ ഫ്രീക്വൻസി (RFID) അധിഷ്ഠിത സിസ്റ്റത്തിൽ ഇത് സാധ്യമല്ലാത്തതിനാലാണ് പുതിയ സംവിധാനം കൊണ്ടുവരുന്നത്.
റോഡ് ഗതാഗത മന്ത്രാലയവും പ്രതിരോധ മന്ത്രാലയവും ഇതുമായി ബന്ധപ്പെട്ട ചർച്ചകൾ നടത്തിവരികയാണ്. സൈനികരുടെ വാഹനങ്ങൾക്ക് പ്രത്യേക തരം ഫാസ്റ്റ് ടാഗുകൾ നൽകാനോ അല്ലെങ്കിൽ സാധാരണ ഫാസ്റ്റ് ടാഗുകളുടെ തുക പ്രതിരോധ മന്ത്രാലയം വഴിയോ മറ്റ് മാർഗ്ഗങ്ങളിലൂടെയോ ലഭ്യമാക്കാനോ ആണ് പദ്ധതിയിടുന്നത്. രാജ്യത്തെ 1,150-ഓളം ടോൾ പ്ലാസകളിൽ ഘട്ടം ഘട്ടമായി ക്യാമറ അധിഷ്ഠിത സിസ്റ്റം നടപ്പിലാക്കുന്നതിന് മുൻപായി സൈനികരുടെ ടോൾ ഇളവ് സംബന്ധിച്ച അന്തിമ തീരുമാനമുണ്ടാകും.
The Central Government is planning to extend toll exemptions to private vehicles of around 14 lakh defence personnel ahead of implementing Multi-Line Free Flow tolling.
