ഇന്ത്യയിലെ റോഡുകളിൽ ഗാംഭീര്യത്തോടെ ഓടിപ്പായുന്ന മഹീന്ദ്ര ഥാർ, XUV700, സ്കോർപിയോ, XUV500 എന്നീ ജനപ്രിയ വാഹനങ്ങൾ കാണുമ്പോൾ അവയുടെ പരുക്കൻ ഡിസൈനിന് പിന്നിൽ പ്രവർത്തിച്ച വ്യക്തിയെക്കുറിച്ച് നമ്മളിൽ പലരും ആലോചിച്ചിട്ടുണ്ടാകില്ല. പുരുഷന്മാർ ആധിപത്യം പുലർത്തിയിരുന്ന ഓട്ടോമൊബൈൽ ഡിസൈനിംഗ് രംഗത്ത് വിപ്ലവം സൃഷ്ടിച്ച രാംകൃപ അനന്തൻ എന്ന വനിതയാണ് ഈ ഐക്കോണിക് മോഡലുകളുടെ രൂപകൽപ്പനയ്ക്ക് പിന്നിൽ പ്രവർത്തിച്ചത്.
ബിറ്റ്‌സ് പിലാനിയിൽ നിന്ന് മെക്കാനിക്കൽ എഞ്ചിനീയറിംഗ് ബിരുദവും ഐ.ഐ.ടി ബോംബെയിൽ നിന്ന് ഇൻഡസ്ട്രിയൽ ഡിസൈനിൽ ബിരുദാനന്തര ബിരുദവും പൂർത്തിയാക്കിയ രാംകൃപ 1997-ലാണ് മഹീന്ദ്ര ആൻഡ് മഹീന്ദ്രയിൽ ചേരുന്നത്. ബൊലേറോ, സ്കോർപിയോ, സൈലോ തുടങ്ങിയ വാഹനങ്ങളുടെ ഇന്റീരിയർ ഡിസൈനറായി കരിയർ ആരംഭിച്ച അവർ 2005-ൽ മഹീന്ദ്രയുടെ ഡിസൈൻ വിഭാഗം തലവയായി ഉയർന്നു. ചീറ്റപ്പുലിയുടെ മസിലൻ രൂപത്തിൽ നിന്ന് പ്രചോദനമുൾക്കൊണ്ട് അവർ രൂപകൽപ്പന ചെയ്ത XUV500 മഹീന്ദ്രയുടെ ചരിത്രത്തിലെ തന്നെ വഴിത്തിരിവായി മാറുകയായിരുന്നു.
രണ്ട് പതിറ്റാണ്ടിലധികം നീണ്ട മഹീന്ദ്രയിലെ സേവനത്തിന് ശേഷം ‘ക്രക്സ് സ്റ്റുഡിയോ’ എന്ന സ്വന്തം ഡിസൈൻ കൺസൾട്ടൻസി ആരംഭിച്ച രാംകൃപ, നിലവിൽ പ്രമുഖ ഇലക്ട്രിക് വാഹന നിർമ്മാതാക്കളായ ഓല ഇലക്ട്രിക്കിന്റെ (Ola Electric) ഡിസൈൻ മേധാവിയായി സേവനമനുഷ്ഠിക്കുകയാണ്. ഇലക്ട്രിക് സ്കൂട്ടറുകൾ ഉൾപ്പെടെയുള്ള പുതിയ തലമുറ വാഹനങ്ങളുടെ രൂപകൽപ്പനയ്ക്കാണ് അവർ ഇപ്പോൾ നേതൃത്വം നൽകുന്നത്. ബിറ്റ്‌സ് പിലാനിയുടെ വിശിഷ്ട പൂർവ്വവിദ്യാർത്ഥി പുരസ്കാരം ഉൾപ്പെടെ നിരവധി അംഗീകാരങ്ങൾ രാംകൃപ കരസ്ഥമാക്കിയിട്ടുണ്ട്.
Discover the story of Ramkripa Ananthan, the visionary designer behind Mahindra Thar, XUV700, and Scorpio, who now leads design at Ola Electric.
