ഇലോൺ മസ്കിന്റെ സ്റ്റാർലിങ്കിന് ഇന്ത്യൻ ബദൽ ഒരുക്കുന്നതിന്റെ ഭാഗമായി 1,600 സാറ്റലൈറ്റുകൾ ഉൾപ്പെടുന്ന ബ്രോഡ്ബാൻഡ് ശൃംഖല നിർമ്മിക്കാൻ മുകേഷ് അംബാനിയുടെ റിലയൻസ് ഗ്രൂപ്പ് ഒരുങ്ങുന്നു. ജിയോ പ്ലാറ്റ്ഫോംസിന്റെ വളർച്ച ലക്ഷ്യമിട്ടുള്ള ഈ ലോ എർത്ത് ഓർബിറ്റ് നെറ്റ്വർക്ക് 2035-ഓടെ പൂർത്തിയാക്കാനാണ് ലക്ഷ്യമിടുന്നത്.

രാജ്യത്ത് നിലവിൽ പ്രതിവർഷം 15-ൽ താഴെ സാറ്റലൈറ്റുകൾ മാത്രമാണ് നിർമ്മിക്കുന്നത് എന്നതിനാൽ, പ്രതിവർഷം 200 സാറ്റലൈറ്റുകൾ നിർമ്മിക്കേണ്ട ഈ പദ്ധതിക്കായി റിലയൻസ് ഇന്ത്യൻ കമ്പനികളുമായി പങ്കാളിത്തം തേടുന്നുണ്ട്. ഇതിനാവശ്യമായ അടിസ്ഥാന സൗകര്യങ്ങൾ ഒരുക്കാൻ സാമ്പത്തിക സഹായം നൽകാമെന്നും റിലയൻസ് വാഗ്ദാനം ചെയ്തിട്ടുണ്ട്.
ആഭ്യന്തര നിർമ്മാണത്തോടൊപ്പം യുഎസിൽ നിന്ന് കുറഞ്ഞത് 400 സാറ്റലൈറ്റുകളെങ്കിലും ഇറക്കുമതി ചെയ്യാനും യൂറോപ്യൻ വിതരണക്കാരെ പരിഗണിക്കാനും കമ്പനി ആലോചിക്കുന്നു. 2027 സെപ്റ്റംബറിലെ പരീക്ഷണ ദൗത്യത്തിന് ശേഷം 2028-ന്റെ തുടക്കത്തിൽ സാറ്റലൈറ്റുകളുടെ വിപുലമായ വിന്യാസം ആരംഭിക്കാനാണ് റിലയൻസിന്റെ നീക്കം.
Mukesh Ambani’s Reliance Jio prepares to launch 1,600 LEO satellites to challenge Elon Musk’s Starlink and deliver broadband connectivity by 2035.
