ഇന്ത്യ ടെലികോം ഹബ്ബാകുമെന്ന് എറിക്സൺ തലവൻ

ആഗോള വിതരണ ശൃംഖലകൾ ചൈനയിൽ നിന്ന് മാറുന്നതോടെ, ടെലികോം, ഇലക്ട്രോണിക്സ് മേഖലയിൽ ഇന്ത്യ വിശ്വസനീയമായ ബദലായി തീരുമെന്ന് സ്വീഡിഷ് ടെലികോം ഗിയർ നിർമ്മാതാക്കളായ എറിക്‌സൺ. പ്രാദേശിക ഉൽപ്പാദനം വർദ്ധിപ്പിച്ച് കമ്പനി ഈ ട്രെൻഡിനൊപ്പം മുന്നോട്ടുപോകുമെന്ന് എറിക്സൺ ഇന്ത്യ ഹെഡ് ആൻഡ്രസ് വിസെന്റെ പറഞ്ഞു. വോഡാഫോൺ ഐഡിയ (VI) ഇന്ത്യയിലുടനീളം 5ജി നെറ്റ് വർക്ക് വ്യാപിപ്പിച്ചാൽ ടെലികോം രംഗത്തെ മത്സരം കനക്കുമെന്നും അദ്ദേഹം കൂട്ടിച്ചേർത്തു. നിലവിൽ വിഐയ്ക്ക് ആന്റിനകളും മറ്റ് ഉപകരണങ്ങളും നൽകുന്ന കമ്പനിയാണ് എറികസ്ൺ. ഡൽഹി-എൻസിആർ മേഖലയിൽ 5G സേവനങ്ങൾക്ക് എറിക്‌സൺ അടുത്തിടെ വോഡാഫോൺ ഐഡിയയുമായി പങ്കാളിത്തത്തിൽ ഏർപ്പെട്ടിരുന്നു. വിഐയ്ക്ക് കൂടുതൽ ശക്തമാകാൻ കഴിയുന്ന സാഹചര്യമാണ് നിലവിലുള്ളതെന്നും അദ്ദേഹം പറഞ്ഞു.

സോഴ്‌സിംഗ് ആഴത്തിലാക്കിയുള്ള പ്രവർത്തനത്തിനാണ് എറിക്സൺ ഇന്ത്യയിൽ ഊന്നൽ നൽകുന്നത്. ഇതോടൊപ്പം 5ജി, ക്ലൗഡ്, ആർട്ടിഫിഷ്യൽ ഇന്റലിജൻസ് എന്നിവയ്‌ക്കായുള്ള ഗവേഷണ കേന്ദ്രമാക്കി എറിക്സൺ ഇന്ത്യൻ യൂണിറ്റിനെ മാറ്റും. 2025 ജൂൺ മാസത്തോടെ പാസീവ് ആന്റിനകളുടെ ഉത്പാദനം പൂർണ്ണമായും പ്രാദേശികവൽക്കരിക്കാനാണ് എറിക്‌സൺ പദ്ധതിയിടുന്നത്. വിപണിയുടെ ഭാവി വളർച്ചയിൽ കമ്പനി വമ്പൻ നിക്ഷേപം നടത്തുന്നതായും വിസെന്റെ വ്യക്തമാക്കി. നിലവിലുള്ള ചൈനീസ് ആവാസവ്യവസ്ഥയ്ക്ക് മികച്ച ബദലായി മാറാൻ ഇന്ത്യയേക്കാളും അനുയോജ്യമായ മറ്റൊരു വിപണിയില്ല. ആപ്പിൾ പോലുള്ള കമ്പനികൾ ഇന്ത്യയിലേക്ക് കൂടുതൽ അടുക്കുന്നത് ഇതിന്റെ വ്യക്തമായ സൂചനയാണ്. എറിക്സണും അതേ പാത പിന്തുടരാനാണ് ലക്ഷ്യമിടുന്നതെന്നും അദ്ദേഹം പറഞ്ഞു.

എറിക്‌സൺ ഇന്ത്യയിലെ നിർമ്മാണ പ്രവർത്തനങ്ങൾ കൂടുതൽ ശക്തമാക്കുകയാണ്. 2025 മധ്യത്തോടെ എല്ലാ പാസീവ് ആന്റിനകളുടെയും ഉത്പാദനം പ്രാദേശികവൽക്കരിക്കും. ടെലികോം ഘടകങ്ങളുടെ സോഴ്സിങ് വർദ്ധിപ്പിക്കാനും പദ്ധതിയുണ്ട്. ഇതിലൂടെ കൂടുതൽ കയറ്റുമതി സാധ്യമാക്കുകയാണ് ലക്ഷ്യം. എഐ, 5G എന്നിവയുൾപ്പെടെയുള്ള നെക്സ്റ്റ് ജെൻ സാങ്കേതികവിദ്യകൾക്കായുള്ള വലിയ ഗവേഷണ കേന്ദ്രമായും ഇന്ത്യ യൂണിറ്റ് മാറുമെന്നും അദ്ദേഹം വ്യക്തമാക്കി.

സമ്പൂർണ്ണ നിർമ്മാണ സാഹചര്യം കെട്ടിപ്പടുക്കുന്നതിന് ഇന്ത്യ മികച്ച കേന്ദ്രമായി മാറുകയാണെന്നും അദ്ദേഹം ചൂണ്ടിക്കാട്ടി. ഈ സാഹചര്യത്തിൽ കൂടുതൽ ഘടകങ്ങൾ ചേർത്തുകൊണ്ട് എറിക്സൺ രാജ്യത്തെ നിർമ്മാണ ശേഷി വർദ്ധിപ്പിക്കും. മെക്സിക്കോ, റൊമാനിയ, ചൈന എന്നിവയ്‌ക്കൊപ്പം എറിക്‌സണിന്റെ ആഗോള ഉൽപ്പാദന കേന്ദ്രങ്ങളിൽ ഇന്ത്യയുടെ സ്ഥാനം ശക്തിപ്പെടുന്നതിന്റെ തെളിവാണ് അടുത്തിടെ നടത്തിയ വിവിഡിഎൻ നിക്ഷേപമെന്നും അദ്ദേഹം പറഞ്ഞു.

Ericsson is significantly expanding its India operations, focusing on manufacturing, 5G deployment, and establishing the country as a global R&D hub. This move strengthens India’s role in Ericsson’s worldwide strategy.