യുഎസ് പ്രസിഡന്റ് ഡൊണാൾഡ് ട്രംപുമായി ബിസിനസ് സഹകരണത്തിന് മുകേഷ് അംബാനി. റിയൽ എസ്റ്റേറ്റ് മേഖലയിലാണ് സഹകരണം. ഇതുമായി ബന്ധപ്പെട്ട് ഡൊണാൾഡ് ട്രംപിന്റെ റിയൽ എസ്റ്റേറ്റ് കമ്പനിയായ ട്രംപ് ഓർഗനൈസേഷന് (Trump Organisation), റിലയൻസ് ഇൻഡസ്ട്രീസന്റെ കീഴിലുള്ള 4IR റിയൽറ്റി ഡെവലപ്മെന്റും (4IR Realty Development) 10 മില്യൺ ഡോളർ (86 കോടി രൂപ) ഡെവലപ്മെന്റ് ഫീസ് നൽകി. ട്രംപ് കമ്പനിയുടെ ബ്രാൻഡിന് മുംബൈയിൽ ലൈസൻസിങ് ലഭിക്കുന്നതുമായി ബന്ധപ്പെട്ടാണ് 4IR ഡെവലപ്മെന്റ് ഫീസ് നൽകിയിരിക്കുന്നത്. മുംബൈയിലെ ഏത് പ്രൊജക്ടുമായി ബന്ധപ്പെട്ടാണ് ഈ നീക്കം എന്നതിൽ വ്യക്തതയില്ല. ഇത് സംബന്ധിച്ച് റിലയൻസ് പ്രതികരിച്ചിട്ടില്ല.
അടുത്തിടെ യുഎസ് പ്രസി‍ഡന്റിന്റെ വാർഷിക ഫിനാൻഷ്യൽ ഡിസ്ക്ലോഷർ റിപ്പോർട്ട് പ്രസിദ്ധീകരിച്ചിരുന്നു. ഇതനുസരിച്ച് ട്രംപ് ഓർഗനൈസേഷൻ വിവിധ രാജ്യങ്ങളിലേക്ക് പടർന്നു പന്തലിക്കാനുള്ള ഒരുക്കത്തിലാണ്. വിയറ്റ്നാം, യുഎഇ, സൗദി അറേബ്യ തുടങ്ങിയ രാജ്യങ്ങളിലേക്കാണ് ട്രംപിന്റെ വമ്പൻ റിയൽ എസ്റ്റേറ്റ് ബിസിനസ് കടക്കുക. ലൈസൻസിങ്ങിനും, ഡെവലപ്മെന്റ് ഫീസിനുമായി നിക്ഷേപകർ 2024ൽ മാത്രം 44.6 മില്യൺ ഡോളർ ട്രംപ് ഓർഗനൈസേഷന് നൽകിയതായി ഫിനാൻഷ്യൽ ഡിസ്ക്ലോഷർ റിപ്പോർട്ടിൽ പറയുന്നു.
നേരത്തെ ഡൊണാൾഡ് ട്രംപ് യുഎസ് പ്രസിഡന്റായി ചുമതല ഏറ്റെടുത്ത ചടങ്ങിൽ മുകേഷ് അംബാനിയും ട്രംപും കൂടിക്കാഴ്ച്ച നടത്തിയിരുന്നു. ഇതിനുപുറമേ ദോഹയിൽ ട്രംപിന്റെ സന്ദർശനത്തിനിടെയും ഇരുവരും കൂടിക്കാഴ്ച നടത്തി.
Reliance 4IR Realty, linked to Mukesh Ambani, paid $10 million to the Trump Organisation for branding rights in Mumbai, as Trump’s foreign licensing fees surged to $44.6 million in 2024
