വിജയ്-ക്ക് നന്ദി പറഞ്ഞ്  വെമ്പു

തമിഴ്‌നാട്ടിൽ വോട്ടിന് നോട്ട് സംസ്ക്കാരം അവസാനിപ്പിച്ചതിന് തമിഴക വെട്രി കഴകത്തിന്റെ സ്ഥാപകനും നടനുമായ വിജയ്-ക്ക് നന്ദി പറഞ്ഞ് സോഹോ സ്ഥാപകൻ ശ്രീധർ വെമ്പു. വിജയ്‍യുടെ വിജയത്തെ ചരിത്രപരം എന്നാണ് ശ്രീധർ വെമ്പു വിശേഷിപ്പിച്ചത്. തമിഴ്‌നാട് നിയമസഭാ തിരഞ്ഞെടുപ്പിലെ തമിഴക വെട്രി കഴകത്തിന്റെ (ടിവികെ) ഉജ്ജ്വല വിജയത്തെയും അദ്ദേഹം പ്രശംസിച്ചു. പതിറ്റാണ്ടുകളായി തമിഴ് രാഷ്ട്രീയത്തിൽ വേരൂന്നിയ ‘പണം നൽകി വോട്ട് വാങ്ങുന്ന’ (Cash for votes) സംസ്കാരത്തിന് അന്ത്യം കുറിച്ച ചരിത്ര വിജയമാണിതെന്ന് അദ്ദേഹം വിശേഷിപ്പിച്ചു.

എക്സിലൂടെയാണ് (X) ശ്രീധർ വെമ്പു വിജയ്‍യെയും പാർട്ടിയെയും അഭിനന്ദിച്ചത്. തമിഴ്‌നാട്ടിലെ യുവാക്കൾക്കിടയിൽ വിജയ്‍യോടുള്ള ആവേശം തന്റെ സ്ഥാപനത്തിലെ ജീവനക്കാർക്കിടയിലും ദൃശ്യമായിരുന്നെന്ന് അദ്ദേഹം കുറിച്ചു.

പ്രവചനങ്ങൾ തെറ്റിച്ച വിജയം
തിരഞ്ഞെടുപ്പിന് മുൻപ് വിജയ്‍യുടെ രാഷ്ട്രീയ സ്വാധീനത്തെ താൻ കുറച്ചു കണ്ടിരുന്നതായി ശ്രീധർ വെമ്പു തുറന്നു സമ്മതിച്ചു. സാധാരണക്കാർ നൽകിയ സൂചനകൾ താൻ ആവർത്തിക്കുക മാത്രമാണ് ചെയ്തതെന്നും അദ്ദേഹം പറഞ്ഞു. ഡൽഹി വിമാനത്താവളത്തിലെ സുരക്ഷാ ഉദ്യോഗസ്ഥനും സ്വന്തം ഗ്രാമത്തിലെ ഒരു കർഷകനും തന്നോട് മുൻപ് പങ്കുവെച്ച കാര്യങ്ങൾ അദ്ദേഹം ഓർത്തെടുത്തു.

“ഡൽഹി എയർപോർട്ടിലെ സുരക്ഷാ ഉദ്യോഗസ്ഥൻ ഞാൻ തമിഴ്‌നാട്ടുകാരനാണെന്ന് കണ്ട് ആവേശത്തോടെ ചോദിച്ചു, ‘സാർ, വിജയ് ദളപതി ജയിക്കുമോ?’ എന്ന്. അതുപോലെ സിനിമകളോട് വലിയ താല്പര്യമില്ലാത്ത എന്റെ നാട്ടിലെ ഒരു കർഷകൻ പറഞ്ഞു, ഇത്തവണ വിജയ് അത്ഭുതങ്ങൾ കാണിക്കുമെന്ന്. അന്നത്തെ ആ പ്രവചനങ്ങൾ ശരിയാണെന്ന് ഇന്ന് തെളിഞ്ഞിരിക്കുന്നു.” – ശ്രീധർ വെമ്പു പറഞ്ഞു.

സിനിമയ്ക്ക് അപ്പുറമുള്ള സ്വാധീനം
വിജയ്‍യുടെ രാഷ്ട്രീയ വിജയത്തെ വെറും സിനിമാ ഗ്ലാമറായി കാണരുതെന്നും അദ്ദേഹം ഓർമ്മിപ്പിച്ചു. ജീവിതത്തിന്റെ വിവിധ മേഖലയിലുള്ള ആളുകൾ വലിയ മാറ്റം ആഗ്രഹിച്ചാണ് വിജയ്‍യെ പിന്തുണച്ചതെന്ന് ‘തുഗ്ലക്ക്’ മാഗസിനിലെ വിശകലനം ഉദ്ധരിച്ചുകൊണ്ട് അദ്ദേഹം വ്യക്തമാക്കി.

നേരത്തെ, ഡിഎംകെ (DMK), എഐഎഡിഎംകെ (AIADMK) എന്നീ പാർട്ടികളുടെ സംഘടനാ ശക്തിയെ വിജയ് എങ്ങനെ മറികടക്കും എന്ന കാര്യത്തിൽ തനിക്ക് സംശയമുണ്ടായിരുന്നതായി ശ്രീധർ വെമ്പു വെളിപ്പെടുത്തിയിരുന്നു. എന്നാൽ ആ സംശയങ്ങളെല്ലാം കാറ്റിൽ പറത്തിക്കൊണ്ടാണ് തമിഴ്‌നാട് രാഷ്ട്രീയത്തിൽ ഒരു പുതിയ ചരിത്രം പിറന്നിരിക്കുന്നതെന്ന് അദ്ദേഹം കൂട്ടിച്ചേർത്തു.

Zoho CEO Sridhar Vembu congratulates actor Vijay on TVK’s historic win, hailing it as the end of the “cash-for-votes” era in Tamil Nadu politics. Read how Vembu’s own predictions were proven wrong by the wave of change