രാജ്യത്ത് സ്വയംതൊഴിലിന്റെയും സംരംഭകത്വത്തിന്റെയും പുതിയൊരു സംസ്കാരം അതിവേഗം വളർന്നുവരികയാണെന്ന് പ്രധാനമന്ത്രി നരേന്ദ്ര മോദി. നിലവിൽ 2,30,000-ത്തിലധികം അംഗീകൃത സ്റ്റാർട്ടപ്പുകളുമായി ഇന്ത്യ ആഗോളതലത്തിൽ ഏറ്റവും വലിയ മൂന്നാമത്തെ സ്റ്റാർട്ടപ്പ് ഇക്കോസിസ്റ്റമായി മാറിയെന്നും അദ്ദേഹം വ്യക്തമാക്കി. 19-ാമത് ‘റോസ്ഗാർ മേള’യെ (Rozgar Mela) അഭിസംബോധന ചെയ്ത് സംസാരിക്കുകയായിരുന്നു പ്രധാനമന്ത്രി.
മാറ്റം വൻനഗരങ്ങളിൽ മാത്രമല്ല
ഈ വലിയ മാറ്റം മെട്രോ നഗരങ്ങളിൽ മാത്രം ഒതുങ്ങിനിൽക്കുന്നതല്ലെന്ന് പ്രധാനമന്ത്രി ചൂണ്ടിക്കാട്ടി. രാജ്യത്തെ ടിയർ-2, ടിയർ-3 നഗരങ്ങളിൽ (ചെറിയ നഗരങ്ങളിലും പട്ടണങ്ങളിലും) നിന്നുള്ള വൻതോതിലുള്ള യുവാക്കളാണ് ഇന്ന് തങ്ങളുടെ കഴിവ് തെളിയിച്ചുകൊണ്ട് സ്റ്റാർട്ടപ്പ് രംഗത്തേക്ക് കടന്നുവരുന്നത്. ഇതിനൊപ്പം ഈ സംരംഭകത്വ വിപ്ലവത്തിൽ രാജ്യത്തെ സ്ത്രീശക്തിയുടെ പങ്കാളിത്തം നിരന്തരം വർദ്ധിച്ചുകൊണ്ടിരിക്കുന്നത് ഏറെ അഭിമാനകരമാണെന്നും അദ്ദേഹം കൂട്ടിച്ചേർത്തു.
ആഗോളതലത്തിൽ മുദ്രപതിപ്പിച്ച് ഇന്ത്യൻ യുവാക്കൾ
ഇന്നത്തെ ഇന്ത്യൻ യുവത്വം ലോകത്തിന്റെ എല്ലാ മേഖലകളിലും തങ്ങളുടെ തനതായ മുദ്ര പതിപ്പിക്കുന്നുണ്ട്. ആഗോള കോർപ്പറേറ്റ്-രാഷ്ട്രീയ നേതാക്കൾക്കിടയിൽ ഇന്ത്യയുടെ സാങ്കേതിക പുരോഗതിയെക്കുറിച്ചും യുവതലമുറയുടെ ഊർജ്ജസ്വലതയെക്കുറിച്ചും വലിയ ആവേശമാണ് ഉള്ളതെന്നും അദ്ദേഹം തന്റെ വിദേശ സന്ദർശനങ്ങളെ മുൻനിർത്തി ഓർമ്മിപ്പിച്ചു. സ്റ്റാർട്ടപ്പുകൾക്ക് പുറമെ മാനുഫാക്ചറിങ്, ടെക്നോളജി, ഡിജിറ്റൽ സർവീസസ്, റെയിൽവേ, പ്രതിരോധം, ബഹിരാകാശ മേഖല എന്നിവയിലെല്ലാം യുവാക്കൾക്കായി അഭൂതപൂർവ്വമായ അവസരങ്ങളാണ് ഒരുങ്ങുന്നത്.
പൊതുസേവനത്തിലും ഈ ഊർജ്ജം വേണം
തങ്ങളുടെ ജോലിയെ രാജ്യത്തെയും ജനങ്ങളെയും സേവിക്കാനുള്ള മാർഗ്ഗമായി കാണുന്ന യുവാക്കളുടെ പരിശ്രമത്തിലൂടെ മാത്രമേ രാജ്യം വികസിക്കുകയുള്ളൂവെന്ന് പ്രധാനമന്ത്രി പറഞ്ഞു. റോസ്ഗാർ മേളയിലൂടെ നിയമന ഉത്തരവ് ലഭിച്ച ഉദ്യോഗസ്ഥർ ഇതേ ഊർജ്ജത്തോടെയും ലക്ഷ്യബോധത്തോടെയും രാജ്യത്തിന്റെ വികസന യാത്രയ്ക്ക് പുതിയ വേഗത നൽകുമെന്ന പൂർണ്ണ ആത്മവിശ്വാസവും പ്രധാനമന്ത്രി പ്രകടിപ്പിച്ചു. യുവാക്കൾക്ക് പുതിയ അവസരങ്ങൾ പ്രയോജനപ്പെടുത്താൻ സാധിക്കുന്നതിനായി നൈപുണ്യ വികസനം (Skill Development), വിദ്യാഭ്യാസ മേഖലയുടെ നവീകരണം, ഐഐടികളുടെ ആധുനികവൽക്കരണം എന്നിവയ്ക്ക് സർക്കാർ നിരന്തരമായി ഊന്നൽ നൽകുന്നുണ്ടെന്നും അദ്ദേഹം വ്യക്തമാക്കി.
India becomes the world’s 3rd largest startup ecosystem with over 230,000 recognized startups, driving innovation across Tier-2 and Tier-3 cities, says PM Modi.
