പല രാജ്യങ്ങളെയും പോലെ, ചൈനയും പ്രായമാകുന്നവരുടെ ജനസംഖ്യ വർദ്ധിക്കുന്ന വെല്ലുവിളിയെ അഭിമുഖീകരിക്കുകയാണ്. രാജ്യത്തെ ദേശീയ ആരോഗ്യ കമ്മീഷന്റെ കണക്കുകൾ പ്രകാരം 2035 ആകുമ്പോഴേക്കും 60 വയസും അതിൽ കൂടുതലുമുള്ള വ്യക്തികളുടെ എണ്ണം 280 ദശലക്ഷത്തിൽ നിന്ന് 400 ദശലക്ഷമായി ഉയരുമെന്ന് പ്രതീക്ഷിക്കുന്നു.
ആ വർഷം പ്രവചിച്ച യുണൈറ്റഡ് സ്റ്റേറ്റ്സിലെ മുഴുവൻ ജനസംഖ്യയേക്കാൾ കൂടുതലാണിത്. പ്രായമായവരുടെ എണ്ണമല്ല പ്രശ്നം, മറിച്ച് മൊത്തത്തിലുള്ള ജനസംഖ്യയിലെ അവരുടെ വിഹിതമാണ്. 2040 ആകുമ്പോഴേക്കും ചൈനയിലെ ജനസംഖ്യയുടെ ഏതാണ്ട് 30% പേരും 60 വയസോ അതിൽ കൂടുതലോ പ്രായമുള്ളവരായിരിക്കും. ഈ സുപ്രധാന ജനസംഖ്യാപരമായ മാറ്റം ചൈനയെ സംബന്ധിച്ചിടത്തോളം നിർണായകമായ ഒരു വഴിത്തിരിവാണ് സൂചിപ്പിക്കുന്നത്. കാരണം സമൃദ്ധവും ചെലവുകുറഞ്ഞതുമായ വിദഗ്ധ തൊഴിലാളികളുടെ മുൻ നേട്ടം ചൈനയ്ക്ക് ഇനി ലഭിക്കില്ല. പകരം, അതിവേഗം പ്രായമാകുന്ന ജനസംഖ്യയ്ക്ക് മതിയായ പരിചരണം നൽകുകയെന്ന ഭീമാകാരമായ സാമ്പത്തിക വെല്ലുവിളിയെ രാജ്യം അഭിമുഖീകരിക്കും.
തൊഴിലാളികളുടെ ക്ഷാമം പരിഹരിക്കുന്നതിനും പ്രായമായവർക്ക് മതിയായ പരിചരണം ഉറപ്പാക്കുന്നതിനുമുള്ള ഈ കടുത്ത ആവശ്യകതയിൽ നിന്നാണ് GR-1 പിറവിയെടുക്കുന്നത്. ചൈനയിലെ പൊതുജന ആരോഗ്യ സംരക്ഷണ ആവശ്യങ്ങൾ പരിഹരിക്കുന്നതിനായി ഷാങ്ഹായ് ആസ്ഥാനമായുള്ള ഫ്യൂറിയർ ഇന്റലിജൻസാണ് ഹ്യൂമനോയിഡ് റോബോട്ട് GR-1 വികസിപ്പിച്ചെടുത്തത്.
GR-1 ന് 1.64 മീറ്റർ ഉയരമുണ്ട്, 55 കിലോഗ്രാം ഭാരമുണ്ട്, കൂടാതെ നടക്കാനും തടസ്സങ്ങൾ ഒഴിവാക്കാനും വസ്തുക്കളെ ഉയർത്തുന്നത് പോലുള്ള ജോലികൾ ചെയ്യാനുള്ള കഴിവ് എന്നിവയുൾപ്പെടെ മനുഷ്യസമാനമായ കഴിവുകളുടെ ഒരു നിരയുണ്ട്. വൈദഗ്ധ്യത്തിന് ഊന്നൽ നൽകിക്കൊണ്ട്, GR-1-ന് രോഗികളെ കിടക്കകളിൽ നിന്ന് വീൽചെയറിലേക്ക് മാറ്റുന്നതിനും സഹായിക്കാനാകും. ഒരു പരിചാരകനായും, തെറാപ്പി അസിസ്റ്റന്റായും പ്രായമായവർക്കുള്ള കൂട്ടാളി എന്ന നിലയിലുമാണ് ഫ്യൂറിയർ ഇന്റലിജൻസ് GR-1-നെ നിർമിച്ചിരിക്കുന്നത്
റോബോട്ടിന് വ്യക്തികളുമായി കൂടുതൽ ആശയവിനിമയം സുഗമമാക്കുന്നതിന്, ChatGPT പോലെയുള്ള AI ടൂളുകൾ ഫ്യൂറിയർ ഇന്റലിജൻസ് സമന്വയിപ്പിക്കുന്നു. ഷാങ്ഹായിൽ നടന്ന ലോക AI കോൺഫറൻസിലാണ് GR-1 അതിന്റെ പൊതു അരങ്ങേറ്റം നടത്തിയത്. ദുരന്ത നിവാരണ മേഖലകളിലും ഗാർഹിക സേവനങ്ങളിലും റോബോട്ടിനെ ഉപയോഗിക്കുന്നതിനുള്ള വിവിധ സാധ്യതകളും ഫ്യൂറിയർ ഇന്റലിജൻസ് പര്യവേക്ഷണം ചെയ്യുന്നു.
