അഞ്ച് കോടി രൂപയിൽ കൂടുതൽ വാർഷിക വിറ്റുവരവുള്ള ബിസിനസ് സ്ഥാപനങ്ങൾ ആഗസ്റ്റ് ഒന്നുമുതൽ GST ഇ-ഇൻവോയ്സ് നിർബന്ധമായും സമർപ്പിക്കണം.
2017-18ന് ശേഷമുള്ള ഏതെങ്കിലും സാമ്പത്തിക വർഷം അഞ്ച് കോടി രൂപയ്ക്കുമേൽ വാർഷിക വിറ്റുവരവുള്ളവർക്കാണ് ഈ നിയമം ബാധകം. ഈ സ്ഥാപനങ്ങൾ ആഗസ്റ്റ് ഒന്നുമുതൽ ഇ-ഇൻവോയ്സ് സമർപ്പിക്കണം. ചരക്കുനീക്കം, സേവനങ്ങൾ, കയറ്റുമതി എന്നിവയ്ക്ക് ഇത് ബാധകമാണ്.
അഞ്ച് കോടിയിലേറെ വിറ്റുവരവുണ്ടായിട്ടും ഇ–ഇൻവോയ്സ് തയാറാക്കിയില്ലെങ്കിൽ സ്വീകരിക്കുന്നയാൾക്ക്
ഇൻപുട്ട് ടാക്സ് ക്രെഡിറ്റ് (ITC) ലഭിക്കില്ല.
ചരക്കു നീക്കം ആരംഭിക്കുന്നതിനു മുൻപു തന്നെ ഇ–ഇൻവോയ്സിംഗ് നടത്തണം. ഇതിനായി ജി.എസ്.ടി കോമൺ പോർട്ടൽ വഴിയോ ഇ–ഇൻവോയ്സ് റജിസ്ട്രേഷൻ പോർട്ടലായ einvoice1.gst.gov.in വഴിയോ രജിസ്ട്രേഷൻ എടുക്കണം.
ഇ-വേ ബിൽ പോർട്ടലിൽ രജിസ്റ്റർ ചെയ്തിട്ടുള്ള വ്യാപാരികൾക്ക് ഐഡിയും പാസ്‌വേഡും ഉപയോഗിച്ച് ഇ- ഇൻവോയ്സ് പോർട്ടലിൽ ലോഗിൻ ചെയ്യാം.
ഓരോ ഇടപാടിനും ഓരോ (unique) ഇൻവോയ്സ് റെഫറൻസ് നമ്പറോട് കൂടിയ ഇ-ഇൻവോയ്സ് ജനറേറ്റ് ചെയ്യും. ഇത് വിറ്റവരും വാങ്ങിയവരും സമർപ്പിച്ച രേഖകളുമായി ഒത്തുനോക്കും. പൊരുത്തക്കേടുകളില്ലെങ്കിൽ ഇൻപുട്ട് ടാക്സ് ക്രെഡിറ്റ് ലഭ്യമാക്കും. പൊരുത്തക്കേട് ഉണ്ടെങ്കിൽ നികുതിവകുപ്പ് കൂടുതൽ നടപടി കൈകൊള്ളുമെന്നാണ് അറിയിപ്പ്.
ഇക്കഴിഞ്ഞ മേയിലാണ് ബാധകമായ വിറ്റുവരവ് പരിധി സി.ബി.ഐ.സി അഞ്ചുകോടി രൂപയായി പരിഷ്‌കരിച്ചത്.
ഇ- ഇൻവോയ്സ് ബാധകമല്ലാത്തവർ
പ്രത്യേക സാമ്പത്തിക പരിധിയിലെ (SEZ) യൂണിറ്റുകൾ, ഇൻഷ്വറൻസ്, ബാങ്കിതര ധനകാര്യ കമ്പനികൾ അടക്കമുള്ള ബാങ്കിംഗ് മേഖല, പാസഞ്ചർ ട്രാൻസ്പോർട്ട് സർവീസ്, മൾട്ടിപ്ലക്സ് സിനിമ ഗുഡ്സ് ട്രാൻസ്പോർട്ടിംഗ് ഏജൻസികൾ എന്നീ മേഖലകളെയും ഇ–ഇൻവോയ്സിങ്ങിൽ നിന്ന് ഒഴിവാക്കിയിട്ടുണ്ട്.
നികുതിയില്ലാത്ത ചരക്കുകൾ കൈകാര്യം ചെയ്യുന്ന വ്യാപാരികൾക്ക് ഇ-ഇൻവോയ്സിംഗ് ആവശ്യമില്ല.
വ്യാജ ബില്ലുകൾ വഴിയുള്ള നികുതിവെട്ടിപ്പ് തടയുന്നതും ജി.എസ്.ടി വരുമാനം വർദ്ധിപ്പിക്കുന്നതും ലക്ഷ്യമിട്ടാണ് പുതിയ ജി.എസ്.ടി പരിഷ്കരണം ആഗസ്റ്റ് ഒന്നുമുതൽ നടപ്പിലാക്കുന്നത്.
നിലവിൽ 10 കോടി രൂപയ്ക്കുമേൽ വാർഷിക വിറ്റുവരവുള്ള ബിസിനസ് ടു ബിസിനസ് (B2B) ഇടപാടുകൾക്ക് മാത്രം ബാധകമായ ചട്ടമാണ് സെൻട്രൽ ബോർഡ് ഒഫ് ഇൻഡയറക്ട് ടാക്‌സസ് ആൻഡ് കസ്റ്റംസ് (CBIC) അഞ്ച് കോടി രൂപയായി കുറച്ചത്. ഇതോടെ കേരളത്തിലടക്കം വലിയൊരു വിഭാഗം ചെറുകിട സംരംഭങ്ങളും ഇൻവോയ്സ് പരിധിക്കകത്തായി.
വിറ്റുവരവ് പരിധി കുറച്ചതോടെ കേരളത്തിലെഏകദേശം 5000 ചെറുകിട കച്ചവക്കാ‌ർ കൂടി ജി.എസ്.ടി ഇ-ഇൻവോയ്സ് സമർപ്പിക്കേണ്ടി വരും. ആഗസ്റ്റ് ഒന്നുമുതൽ ഓരോ ഇടപാടിനും ഇ-ഇൻവോയ്സ് സമർപ്പിക്കുകയും ഇ-വേ ബില്ലും കരുതുകയും വേണം.
