ഇനി വന്ദേ ഭാരതിൽ വിശ്രമിച്ചു യാത്ര ചെയ്യാം. അതിനർത്ഥം ഇന്ത്യയിലെ ട്രാക്കുകളിൽ രാത്രികാല ദീർഘ ദൂര ഷെഡ്യൂളുകളിലും വന്ദേ ഭാരത് ഓടിത്തുടങ്ങും എന്ന് തന്നെ. ഒപ്പം വന്ദേ മെട്രോ ട്രെയിനുകളും നഗരങ്ങളിലേക്കെത്തും.
വന്ദേ ഭാരത് സ്ലീപ്പർ ട്രെയിനുകളുടെ ആദ്യ പതിപ്പ് -non-AC push-pull train- ഇന്ത്യൻ റെയിൽവേ ഉടൻ പുറത്തിറക്കും. ഇന്റഗ്രൽ കോച്ച് ഫാക്ടറിയിൽ നിന്നുള്ള വിവരങ്ങൾ അനുസരിച്ച് “വന്ദേ ഭാരതിന്റെ സ്ലീപ്പർ കോച്ച് നടപ്പ് സാമ്പത്തിക വർഷത്തിൽ പുറത്തിറക്കും, ഹ്രസ്വ ദൂര സർവീസിനായി 12 കോച്ചുള്ള ആദ്യ മെട്രോ ട്രെയിൻ 2024 മാർച്ചിൽ പുറത്തിറങ്ങും” .
വന്ദേ ഭാരത് സ്ലീപ്പർ ട്രെയിനുകൾ ഇന്ത്യൻ റെയിൽവേയുടെ ഒരു പ്രധാന നേട്ടമായിരിക്കും. കാരണം അവ ഒറ്റരാത്രികൊണ്ട് ഈ അതിവേഗ ട്രെയിനുകളിൽ ദീർഘദൂരം സഞ്ചരിക്കാൻ യാത്രക്കാർക്ക് സൗകര്യമൊരുക്കും.
കൂടാതെ, വന്ദേ മെട്രോയും ഐസിഎഫ് വികസിപ്പിക്കുന്നുണ്ടെന്ന് ഇന്റഗ്രൽ കോച്ച് ഫാക്ടറിയുടെ (ഐസിഎഫ്) ജനറൽ മാനേജർ ബിജി മല്യ പറഞ്ഞു. വന്ദേ മെട്രോ 12 കോച്ചുകളുള്ള ട്രെയിനാണ്, അത് ഹ്രസ്വദൂര യാത്രയ്ക്ക് ഉപയോഗിക്കും. 2024 ജനുവരിയോടെ ട്രെയിൻ ഓടിത്തുടങ്ങുമെന്നാണ് പ്രതീക്ഷിക്കുന്നത്.
“ഈ സാമ്പത്തിക വർഷത്തിനുള്ളിൽ ഞങ്ങൾ വന്ദേയുടെ സ്ലീപ്പർ പതിപ്പ് പുറത്തിറക്കും. ഈ സാമ്പത്തിക വർഷം ഞങ്ങൾ വന്ദേ മെട്രോയും അവതരിപ്പിക്കും. യാത്രക്കാർക്കായി എയർ കണ്ടീഷൻ ചെയ്യാത്ത സ്ലീപ്പർ ട്രെയിൻ ആകും സർവീസ് നടത്തുക. നോൺ -എസി പുഷ് പുൾ ട്രെയിനിൽ -non-AC push-pull train- 22 കോച്ചുകളും ഒരു ലോക്കോമോട്ടീവും ഉണ്ടാകും. ഒക്‌ടോബർ 31ന് മുമ്പ് ഇത് യാഥാർഥ്യമാകുമെന്നു മല്യ പറഞ്ഞു.
ഇന്ത്യയുടെ സെമി-ഹൈ സ്പീഡ് ട്രെയിനായ വന്ദേ ഭാരത് എക്സ്പ്രസ് രാജ്യത്തുടനീളമുള്ള എല്ലാ റെയിൽ-വൈദ്യുതീകരണ മികവുള്ള സംസ്ഥാനങ്ങളിലും അതിന്റെ സേവനങ്ങൾ വാഗ്ദാനം ചെയ്യുന്നു. 50 പ്രവർത്തന സർവ്വീസുകളുള്ള വന്ദേ ഭാരത് എക്സ്പ്രസ് റെയിൽ യാത്രയിൽ വിപ്ലവം സൃഷ്ടിച്ചു, അത്യാധുനിക സൗകര്യങ്ങൾ പ്രദാനം ചെയ്യുകയും യാത്രക്കാർക്ക് യാത്രാ സമയം കുറയ്ക്കുകയും ചെയ്തു.
ന്യൂഡൽഹിക്കും വാരണാസിക്കും ഇടയിൽ ഓടുന്ന ആദ്യത്തെ വന്ദേ ഭാരത് എക്സ്പ്രസ് 2019 ഫെബ്രുവരി 15 ന് പ്രധാനമന്ത്രി ഫ്ലാഗ് ഓഫ് ചെയ്തു. ചെന്നൈയിലെ ഇന്റഗ്രൽ കോച്ച് ഫാക്ടറിയിലാണ് (ഐസിഎഫ്) ഈ ട്രെയിനുകൾ നിർമ്മിക്കുന്നത്.
തദ്ദേശീയമായ സെമി-ഹൈ-സ്പീഡ് ട്രെയിൻ സെറ്റുകൾ നിർമ്മിക്കാനുള്ള പദ്ധതി 2017 മധ്യത്തിൽ ആരംഭിച്ചു, 18 മാസത്തിനുള്ളിൽ ഐസിഎഫ് ചെന്നൈ ട്രെയിൻ-18 പൂർത്തിയാക്കി. ഇന്ത്യയിലെ ആദ്യത്തെ സെമി-ഹൈ-സ്പീഡ് ട്രെയിനിന്റെ മെയ്ഡ്-ഇൻ-ഇന്ത്യ പദവി ഊന്നിപ്പറയുന്നതിന് 2019 ജനുവരിയിൽ വന്ദേ ഭാരത് എക്സ്പ്രസ് എന്ന് പുനർനാമകരണം ചെയ്തു. കോട്ട-സവായ് മധോപൂർ സെക്ഷനിൽ 180 കിലോമീറ്റർ വേഗതയാണ് ട്രെയിൻ നേടിയത്.
