കാസർകോഡ് ജില്ലയിലെ പ്രവാസികൾക്ക് ആശ്വാസമായി മംഗലാപുരത്ത് നിന്നും അബുദാബിയിലേക്ക് പ്രതിദിന സർവീസ് പ്രഖ്യാപിച്ചു ഇൻഡിഗോ എയർലൈൻസ്. ഇതോടെ പ്രവാസികളുടെ ഗൾഫ് യാത്ര കൂടുതൽ എളുപ്പമാകും. മംഗലാപുരം കൂടാതെ കോയമ്പത്തൂർ, തിരുച്ചിറപ്പള്ളി എന്നിവിടങ്ങളിൽ നിന്ന് ഇൻഡിഗോ അബുദാബിയിലേക്ക് നേരിട്ട് വിമാന സർവീസ് ഏർപ്പെടുത്തിയിട്ടുണ്ട്.
ദക്ഷിണേന്ത്യയും യുഎഇയുടെ തലസ്ഥാനവും തമ്മിലുള്ള ബന്ധം മെച്ചപ്പെടുത്തുക എന്ന ലക്ഷ്യത്തിലാണ് ഈ സർവീസുകൾ ആരംഭിക്കുന്നത്. മലയാളികൾ ഉൾപ്പെടെ നിരവധി പ്രവാസികൾ വസിക്കുന്ന അബുദാബിയിലേക്ക് മംഗലാപുരത്തു നിന്നും നേരിട്ട് വിമാന സർവീസ് തുടങ്ങുന്നതോടെ ഏറ്റവും സഹായകമാവുക കണ്ണൂർ, കാസർകോഡ് ജില്ലകളിൽ നിന്നുള്ള യാത്രക്കാര്ക്കാണ്. കാസർകോഡ് നിന്ന് വെറും 60 കിലോ മീറ്റർ ദൂരമാണ് മംഗലാപുരം വിമാനത്താവളത്തിലേക്ക്.
മംഗലാപുരം- അബുദാബി വിമാനങ്ങൾ ഓഗസ്റ്റ് 9 മുതൽ പ്രതിദിന സർവീസ് ആരംഭിക്കും. തിരുച്ചിറപ്പള്ളി- അബുദാബി റൂട്ട് ഓഗസ്റ്റ് 11 മുതൽ ആഴ്ചയിൽ നാല് തവണ സർവീസ് നടത്തും. കോയമ്പത്തൂരിൽ നിന്നുള്ള വിമാനങ്ങൾ ഓഗസ്റ്റ് 10 മുതൽ ആഴ്ചയിൽ മൂന്ന് തവണ വീതം അബുദാബിയിലേക്കുള്ള സർവീസ് തുടങ്ങും. ചൊവ്വ, വ്യാഴം, ശനി ദിവസങ്ങളിൽ നേരിട്ടുള്ള സർവീസുകൾ നടത്തും
അബുദാബിയില് നിന്ന് 00.40 മണിക്ക് പുറപ്പെട്ട് വിമാനം 06.25ന് കോയമ്പത്തൂരിലെത്തും. തുടർന്ന് തിരികെ, വിമാനം 7.00 മണിക്ക് മടങ്ങും. യുഎഇയിലേക്ക് മാത്രല്ല, കോയമ്പത്തൂരിൽ നിന്നു യൂറോപ്പിലേക്കും യുഎസിലേക്കും യാത്ര പോകുന്നവർക്കും ഈ പുതിയ സര്വീസ് പ്രയോജനപ്പെടുത്താം.
ഈ വിമാനങ്ങൾ കൂടാതെ ഇൻഡിഗോ ഇപ്പോൾ ഇന്ത്യയിലെ 13 നഗരങ്ങളിൽ നിന്ന് അബുദാബിയിലേക്ക് ആഴ്ചയിൽ 89 നോൺ-സ്റ്റോപ്പ് ഫ്ലൈറ്റുകൾ നടത്തുന്നു. നേരത്തെ ബെംഗളുരു- അബുദാബി റൂട്ടിൽ ഇന്ഡിഗോ ഡയറക്ട് ഫ്ലൈറ്റ് പ്രഖ്യാപിച്ചിരുന്നു. ഇത് ഓഗസ്റ്റ് 1 മുതൽ പ്രവർത്തനം ആരംഭിക്കും. ജോലി ആവശ്യങ്ങൾക്കായി പോകുന്നവർക്ക് മാത്രമല്ല, യുഎഇയിലേക്കുള്ള ബിസിനസ്സിനും വിനോദ യാത്രയ്ക്കും ഉപയോഗപ്പെടുത്താവുന്ന സർവീസുകളാണ് ഇൻഡിഗോ ലക്ഷ്യമിടുന്നത്.
IndiGo Airlines announces new daily flights from Mangalore to Abu Dhabi, easing travel for expatriates in Kasaragod and Kannur. Starting August 9, enjoy improved connectivity to the UAE.
