2025 ഏഷ്യാ കപ്പ് ഫൈനലിൽ ഇന്ത്യയോടേറ്റ തോൽവിക്കു ശേഷം പാക് താരങ്ങളെ ‘ശിക്ഷിച്ച്’ പാകിസ്താൻ മന്ത്രിയും പിസിബി ചെയർമാനുമായ മൊഹ്‌സിൻ നഖ്‌വി. ടൂർണമെന്റിൽ പാകിസ്താൻ ആകെ മൂന്ന് തവണയാണ് ഇന്ത്യയോട് പരാജയപ്പെട്ടത്. ഇതിനു പിന്നാലെയാണ് വിദേശ ടി20 ലീഗുകളിൽ ചേരാൻ ആഗ്രഹിക്കുന്ന കളിക്കാർക്കുള്ള എല്ലാ നോ ഒബ്ജക്ഷൻ സർട്ടിഫിക്കറ്റുകളും (NoC) പാകിസ്താൻ ക്രിക്കറ്റ് ബോർഡ് (PCB) താൽക്കാലികമായി നിർത്തിവെച്ചത്.
മൊഹ്‌സിൻ നഖ്‌വിയുടെ തീരുമാനത്തിനു പിന്നാലെ സിഒഒ സുമൈർ അഹമ്മദ് സയ്യിദ് കളിക്കാർക്കും ഏജന്റുമാർക്കും നോട്ടീസ് അയച്ചിരിക്കുകയാണ്. എൻഒസി നിർത്തിവെച്ചതിന് ഔദ്യോഗികമായ കാരണം വ്യക്തമാക്കിയിട്ടില്ല. എന്നാൽ ദേശീയ, ആഭ്യന്തര തലങ്ങളിലെ കളിക്കാരുടെ പ്രകടനവുമായി എൻ‌ഒ‌സികളെ ബന്ധിപ്പിക്കാൻ ബോർഡ് പദ്ധതിയിടുന്നതായി റിപ്പോർട്ടുകൾ സൂചിപ്പിക്കുന്നു. ഈ നിർദിഷ്ട സംവിധാനത്തിന്റെ വിശദാംശങ്ങൾ പങ്കുവെച്ചിട്ടില്ല.
പാകിസ്താനു വേണ്ടി ആഭ്യന്തര, അന്താരാഷ്ട്ര ക്രിക്കറ്റിന് മുൻഗണന നൽകാൻ കളിക്കാരെ പ്രേരിപ്പിക്കുന്നതിനുള്ള മാർഗമായാണ് നടപടിയെ കാണുന്നത്. അതേസമയം ആഗോള ലീഗുകളിൽ പതിവായി പങ്കെടുക്കുന്ന ക്രിക്കറ്റ് കളിക്കാർക്ക് പെട്ടെന്നുള്ള നീക്കം അനിശ്ചിതത്വം സൃഷ്ടിച്ചിരിക്കുകയാണ്. ലോകത്തിലെ ഏറ്റവും സമ്പന്നമായ ക്രിക്കറ്റ് ലീഗായ ഐ‌പി‌എല്ലിൽ നിന്ന് നേരത്തെ പാക് കളിക്കാർക്ക് വിലക്കുണ്ട്. ബിഗ് ബാഷ് ലീഗ് (BBL) 2025ൽ ഏഴ് പാക് താരങ്ങളാണ് പങ്കെടുക്കുന്നത്. പ്ലാറ്റിനം വിഭാഗത്തിലുള്ള ഷഹീൻ ഷാ അഫ്രീദി (ബ്രിസ്ബേൻ ഹീറ്റ്), ബാബർ അസം (സിഡ്നി സിക്സേഴ്സ്) എന്നിവരാണ് ഇതിൽ പ്രമുഖർ. പ്ലാറ്റിനം താരമായി മുഹമ്മദ് റിസ്വാൻ, മെൽബൺ റെനഗേഡ്‌സിലൂടെ ഓസ്‌ട്രേലിയയിൽ നടക്കുന്ന ടി20 ക്രിക്കറ്റ് ലീഗിൽ അരങ്ങേറ്റം കുറിക്കാനും ഇരിക്കുകയാണ്. മറ്റൊരു പ്ലാറ്റിനം പിക്ക് ആയ ഹാരിസ് റൗഫിനെ മെൽബൺ സ്റ്റാർസ് നിലനിർത്തി. നാലുപേരും 500000 ഓസ്‌ട്രേലിയൻ ഡോളർ (ഏകദേശം ₹ 3 കോടി) വരെ വരുമാനം നേടുമെന്നാണ് പ്രതീക്ഷിക്കുന്നത്.
ഗോൾഡ് വിഭാഗത്തിൽ, ഹസൻ അലി അഡ്ലെയ്ഡ് സ്ട്രൈക്കേർസിനു വേണ്ടിയും, ഷദാബ് ഖാൻ സിഡ്നി തണ്ടറിനും, ഹസ്സൻ ഖാൻ മെൽബൺ റെനഗേഡ്‌സിനും വേണ്ടി കളിക്കും. ഇവരുടെ ഏകദേശ ശമ്പളം ഏകദേശം 300,000 ഓസ്‌ട്രേലിയൻ ഡോളർ ( ₹ 1.75 കോടി) ആണ്. ഈ കളിക്കാരിൽ ഷഹീൻ ഷാ അഫ്രീദിയും ഹാരിസ് റൗഫും 2025 ഏഷ്യാ കപ്പിൽ കളിച്ചു. ഹസൻ അലിയും ഷദാബ് ഖാനും മുഴുവൻ ടീമിലും അംഗമായിരുന്നു. എന്നാൽ ഒരു മത്സരവും കളിക്കാനായില്ല. അതേസമയം ബാബറും റിസ്വാനും പാകിസ്താന്റെ 2025 ഏഷ്യാ കപ്പ് ടീമിൽ ഇടം നേടിയിരുന്നില്ല.
Following Asia Cup defeat, PCB Chairman Mohsin Naqvi temporarily halted all NOCs for foreign T20 leagues, impacting players like Shaheen Afridi and Babar Azam.
