ഇതാ വന്ദേ ഭാരത് സ്ലീപ്പർ ട്രെയിൻ

ഇന്ത്യൻ റെയിൽവേയുടെ ആദ്യത്തെ വന്ദേ ഭാരത് സ്ലീപ്പർ ട്രെയിൻ ഗുവാഹത്തിക്കും കൊൽക്കത്തയ്ക്കും ഇടയിൽ സർവീസ് ആരംഭിക്കും .ജനുവരി 18 നോ  19 നോ ആദ്യ സർവീസ് ആരംഭിക്കുമെന്ന് റെയിൽവേ മന്ത്രി അശ്വിനി വൈഷ്ണവാണ്  ഔദ്യോഗികമായി അറിയിച്ചത്.  പ്രധാനമന്ത്രി നരേന്ദ്ര മോദി ട്രെയിനിന്റെ ഉദ്ഘാടനം നിർവഹിക്കും.

രാജ്യത്തെ റെയിൽവേ യാത്രാരംഗത്ത് വിപ്ലവകരമായ മാറ്റം കുറിച്ചുകൊണ്ട് ആദ്യത്തെ വന്ദേ ഭാരത് സ്ലീപ്പർ ട്രെയിൻ റെയിൽവേ മന്ത്രി അശ്വിനി വൈഷ്ണവ് അനാവരണം ചെയ്തു.

യാത്രക്കാർക്ക് കുറഞ്ഞ ചിലവിൽ ദീർഘദൂര യാത്ര സാധ്യമാക്കുകയെന്ന  ലക്ഷ്യത്തോടെ  വിമാനയാത്രയേക്കാൾ ലാഭകരമായ നിരക്കുമായാകും വന്ദേ ഭാരത് സ്ലീപ്പർ സർവീസ് നടത്തുക. ഗുവാഹത്തി–ഹൗറ റൂട്ടിലെ 3AC നിരക്ക് ഏകദേശം 2,300 രൂപയായിരിക്കും. 2AC നിരക്ക് ഏകദേശം 3,000 രൂപയും, ഫസ്റ്റ് എസി (First AC) നിരക്ക് ഏകദേശം 3,600 രൂപയും ആയിരിക്കുമെന്ന് റെയിൽവേ അറിയിച്ചു. ഇതേ റൂട്ടിലെ വിമാന നിരക്ക് നിലവിൽ  6,000 രൂപയ്ക്കും 10,000 രൂപയ്ക്കും ഇടക്കാണ്.
 
 അത്യാധുനിക കൂട്ടിയിടി പ്രതിരോധ സുരക്ഷാ സംവിധാനമായ ‘കവച്’ (KAVACH) സംരക്ഷണമുള്ള, 16 കോച്ചുകളുള്ള ഈ ട്രെയിനിൽ ആധുനിക സ്ലീപ്പർ ബെർത്തുകൾ, ഓട്ടോമാറ്റിക് വാതിലുകൾ, സിസിടിവി നിരീക്ഷണം, ഫയർ ഡിറ്റക്ഷൻ സിസ്റ്റം, ഭിന്നശേഷിക്കാർക്കുള്ള പ്രത്യേക സൗകര്യങ്ങൾ, ശക്തിപ്പെടുത്തിയ കപ്ലറുകൾ, അഗ്നിയെ  പ്രതിരോധിക്കുന്ന ബാരിയർ വാതിലുകൾ, എയറോസോൾ അടിസ്ഥാനമാക്കിയുള്ള അഗ്നി ശമനം, റീജനറേറ്റീവ്  ബ്രേക്കിംഗ്, സീൽ ചെയ്ത ഗാംഗ്‌വേകൾ, അടിയന്തര ആശയവിനിമയ യൂണിറ്റുകൾ  എന്നിവയുൾപ്പെടെ അത്യാധുനിക  സുരക്ഷാ നവീകരണങ്ങളും ട്രെയിനിൽ സജ്ജീകരിച്ചിരിക്കുന്നു.  .

1,000 കിലോമീറ്ററിലധികം ദൂരമുള്ള രാത്രികാല യാത്രകൾ സുരക്ഷിതവും സുഖകരവുമാക്കുക എന്നതാണ് വന്ദേ ഭാരത് സ്ലീപ്പർ പതിപ്പിലൂടെ റെയിൽവേ ലക്ഷ്യമിടുന്നത്. ഈ വർഷാവസാനത്തോടെ ഇത്തരത്തിലുള്ള 12 സ്ലീപ്പർ ട്രെയിനുകൾ കൂടി റെയിൽവേ ശൃംഖലയിൽ ഉൾപ്പെടുത്തുകയാണ് റയിൽവെയുടെ ലക്ഷ്യം.


Railway Minister Ashwini Vaishnaw has unveiled India’s first Vande Bharat Sleeper train, marking a significant milestone in rail travel. Set to operate between Guwahati and Kolkata, the service is expected to become operational by mid-January, likely around the 18th or 19th. Designed as a premium yet affordable alternative to air travel, this new sleeper variant aims to redefine long-distance connectivity with enhanced passenger comfort