ഇന്ത്യയിലെ ആദ്യ ‘ആംഫിബിയസ് ഡ്രോൺ’ അവതരിപ്പിച്ച് ബെംഗളൂരു ആസ്ഥാനമായി പ്രവർത്തിക്കുന്ന സ്റ്റാർട്ട്അപ്പ് അക്വാഎയർഎക്സ് (AquaAirX). വായുവിലും വെള്ളത്തിനടിയിലും പ്രവർത്തിക്കാൻ കഴിയുന്ന സംവിധാനമായ അവതാറുമായാണ് (AVATAAR) കമ്പനി ശ്രദ്ധ നേടുന്നത്. സാധാരണ ഡ്രോണുകൾ പോലെ വായുവിൽ പറന്നുയർന്നുള്ള ദൗത്യങ്ങൾക്കൊപ്പം വെള്ളത്തിനടിയിലേക്കു പോയി പ്രവർത്തനങ്ങൾ നിർവഹിച്ചു വീണ്ടും ഉപരിതലത്തിലേക്ക് ഉയർന്ന് പറക്കാൻ അവതാറിനു കഴിയും. സമുദ്ര-തീര നിരീക്ഷണം, നാവിക പ്രതിരോധ ദൗത്യങ്ങൾ, ഓഫ്ഷോർ അടിസ്ഥാനസൗകര്യ പരിശോധന, പരിസ്ഥിതി നിരീക്ഷണം, ദുരന്തനിവാരണ-തിരച്ചിൽ പ്രവർത്തനങ്ങൾ തുടങ്ങിയ മേഖലകളിൽ ഈ സാങ്കേതികവിദ്യ നിർണായകമാകുമെന്ന് കമ്പനി പറയുന്നു.
ഇന്ത്യയുടെ സമുദ്രസുരക്ഷയും ‘ബ്ലൂ ഇക്കോണമി’ ലക്ഷ്യങ്ങളും ശക്തമാകുന്ന സാഹചര്യത്തിൽ ഇത്തരത്തിലുള്ള എയർ ആൻഡ് അണ്ടർവാട്ടർ ഡ്യുവൽ ഡൊമൈൻ സാങ്കേതികവിദ്യക്ക് വലിയ പ്രസക്തിയുണ്ട്. വെവ്വേറെ സംവിധാനങ്ങൾ ഉപയോഗിക്കേണ്ടിരുന്ന മേഖലകളിൽ ഒറ്റ പ്ലാറ്റ്ഫോമിലൂടെ നിരീക്ഷണവും വിവരശേഖരണവും സാധ്യമാകുന്നത് ചെലവും പ്രവർത്തന സങ്കീർണ്ണതയും കുറയ്ക്കും. ഇൻഡീജിനിയസ് റോബോട്ടിക്സ്, ഓട്ടോണമസ് സംവിധാനങ്ങൾ എന്നിവ വികസിപ്പിക്കാനുള്ള ഇന്ത്യയുടെ ശ്രമങ്ങൾക്ക് ഈ മുന്നേറ്റം പുതിയ ദിശ നൽകുമെന്നാണ് വിലയിരുത്തൽ.
2024ലാണ് എയ്റോനോട്ടിക്കൽ എൻജിനീയർമാരായ ടി.എസ്. ഗൗതമി, ജിതേന്ദ്ര കുമാർ എന്നിവർ ചേർന്ന് അക്വാഎയർഎക്സ് സ്ഥാപിച്ചത്. സമുദ്ര സാങ്കേതികവിദ്യകളിലെ പരിമിതികൾ തിരിച്ചറിഞ്ഞ് വായുവിലും വെള്ളത്തിലും ഒരുപോലെ പ്രവർത്തിക്കുന്ന സംവിധാനമെന്ന ആശയത്തിൽ നിന്നാണ് സ്റ്റാർട്ടപ്പ് രൂപം കൊണ്ടത്. വെറും ഒന്നര വർഷം കൊണ്ട്, സാങ്കേതികവിദ്യ വികസനത്തിന്റെ ഏത് ഘട്ടത്തിലാണ് ഉള്ളത് എന്ന് അളക്കാനുള്ള മാനദണ്ഡമായ ടെക്നോളജി റെഡിനസ് ലെവൽ (TRL) ആറാം ഘട്ടത്തിലെത്തിക്കാൻ അക്വാഎയർഎക്സിന് സാധിച്ചു. അടുത്തിടെ ₹12.5 കോടി സീഡ് ഫണ്ടിംഗും സ്റ്റാർട്ടപ്പിനു ലഭിച്ചു. പ്രതിരോധ ഏജൻസികൾ, മാരിടൈം അതോറിറ്റീസ്, വ്യാവസായിക പങ്കാളികൾ എന്നിവയുടെ സഹകരണത്തോടെ വൻതോതിലുള്ള ഫീൽഡ് ട്രയലുകളിലേക്ക് കടക്കുകയാണ് കമ്പനിയുടെ അടുത്ത ലക്ഷ്യം.
Bengaluru-based startup AquaAirX unveils AVATAAR, India’s first amphibious drone capable of flying in the air and navigating underwater. Designed for defense, maritime security, and offshore inspections
