ഇന്ത്യൻ റെയിൽവേയുടെ എസി കോച്ചുകളിൽ പതിറ്റാണ്ടുകളായി തുടർന്നുപോരുന്ന വെളുത്ത ബെഡ് ഷീറ്റുകൾക്കും പുതപ്പുകൾക്കും വന്ദേ ഭാരത് സ്ലീപ്പർ എക്സ്പ്രസ്സിലൂടെ മാറ്റം കുറിക്കുന്നു. ട്രെയിൻ കോച്ചുകൾക്ക് മോർച്ചറിയുടെ പ്രതീതി നൽകുന്ന ‘മോർഗ് ഈസ്തെറ്റിക്സ്’ (Morgue Aesthetics) അവസാനിപ്പിച്ചുകൊണ്ടാണ് മനോഹരമായ നിറങ്ങളും ഡിസൈനുകളുമുള്ള ബെഡ് ഷീറ്റുകൾ റെയിൽവേ അവതരിപ്പിച്ചിരിക്കുന്നത്. വന്ദേ ഭാരത് സ്ലീപ്പർ എക്സ്പ്രസ്സിൽ യാത്ര ചെയ്ത യുവതി ഇൻസ്റ്റാഗ്രാമിൽ പങ്കുവെച്ച വീഡിയോയിലൂടെ റെയിൽവേയുടെ ഈ വർണ്ണാഭമായ മാറ്റം സമൂഹമാധ്യമങ്ങളിലും വൈറലായി. കടും നിറങ്ങളിലുള്ള ബ്ലോക്ക് പ്രിന്റുകൾ അടങ്ങിയ ബെഡ് ഷീറ്റുകൾ കോച്ചിന് കൂടുതൽ ഭംഗിയും ഊഷ്മളതയും നൽകുന്നുവെന്നാണ് യാത്രക്കാരുടേയും നെറ്റിസൺസിന്റേയും അഭിപ്രായം.
എന്നാൽ, റെയിൽവേയുടെ ഈ പുരോഗമനപരമായ നീക്കത്തെ സോഷ്യൽ മീഡിയ വലിയ രീതിയിൽ സ്വാഗതം ചെയ്യുമ്പോഴും ചില ആശങ്കകളും ഉയരുന്നുണ്ട്. ഇത്തരം മനോഹരമായ വിരികൾ യാത്രക്കാർ മോഷ്ടിച്ചുകൊണ്ടുപോകാൻ സാധ്യതയുണ്ടെന്നും, പൊതുമുതൽ നശിപ്പിക്കാതെ സംരക്ഷിക്കണമെന്നും നിരവധി പേർ കമന്റുകളിൽ ഓർമ്മിപ്പിക്കുന്നു. നിലവിൽ വന്ദേ ഭാരത് സ്ലീപ്പർ എക്സ്പ്രസ്സുകളിൽ മാത്രമാണ് ഈ മാറ്റം വരുത്തിയിരിക്കുന്നത്. നേരത്തെ വന്ദേ ഭാരതിലെ ഭക്ഷണ വിതരണത്തിലെ ശുചിത്വവും ഉയർന്ന നിലവാരവും വാർത്തകളിൽ ഇടംപിടിച്ചിരുന്നു. ഇതിനു പിന്നാലെയാണ് വിരികളിലെ ഈ പുതിയ പരീക്ഷണം റെയിൽവേയുടെ പ്രീമിയം സർവീസുകൾക്ക് കൂടുതൽ തിളക്കം നൽകുന്നത്.
Indian Railways is refreshing the Vande Bharat Sleeper experience by replacing traditional white linen with vibrant, colorful block-printed bed sheets. While the new “warm” aesthetic has gone viral, it has also sparked a debate on the safety of public property
