ഇന്ത്യയിലെ ഏറ്റവും വലിയ വിമാനക്കമ്പനിയായ ഇൻഡിഗോ വിമാനശേഖരം വിപുലീകരിക്കാൻ പുതിയ നീക്കവുമായി രംഗത്ത്. ബ്രസീലിയൻ വിമാനനിർമാതാക്കളായ എംബ്രയറിൽനിന്ന് 100 റീജണൽ ജെറ്റ് വിമാനങ്ങൾ വാങ്ങുന്നതിനുള്ള ചർച്ചകൾ പുരോഗമിക്കുന്നതായി റോയിട്ടേഴ്സ് റിപ്പോർട്ട് ചെയ്തു. ഇതിനുപുറമെ 50 വിമാനങ്ങൾ കൂടി വാങ്ങുന്നതും പരിഗണനയിലുണ്ട്.
ഇടപാട് യാഥാർഥ്യമായാൽ എംബ്രയറിന് ലഭിക്കുന്ന ഏറ്റവും വലിയ വിമാന ഓർഡറുകളിലൊന്നായി ഇത് മാറിയേക്കും. എന്നാൽ ചർച്ചകൾ പ്രാരംഭ ഘട്ടത്തിലാണ്. വിമാനങ്ങളുടെ എണ്ണമോ മോഡലോ അന്തിമമാക്കിയിട്ടില്ല.ഇൻഡിഗോയും എംബ്രയറും തമ്മിലുള്ള ചർച്ചകൾ വിജയകരമായി പൂർത്തിയായാൽ 2030 മുതലോ അതിനുശേഷമോ പുതിയ വിമാനങ്ങളുടെ വിതരണം ആരംഭിക്കാനാണ് സാധ്യത.
100 വിമാനങ്ങൾ ഉൾപ്പെടുന്ന ഇടപാടിന് ബില്യൺ കണക്കിന് ഡോളർ മൂല്യമുണ്ടാകുമെന്നാണ് വിലയിരുത്തൽ. എന്നാൽ വിമാനങ്ങളുടെ വില സംബന്ധിച്ച് ധാരണയായിട്ടില്ല.വൻകിട വിമാന ഓർഡറുകളിൽ നിർമാതാക്കൾ സാധാരണയായി വിലയിൽ ഇളവുകൾ നൽകാറുള്ളതിനാൽ അന്തിമ കരാർ തുക വ്യത്യാസപ്പെടാം.
ഇന്ത്യയിലെ ചെറുനഗരങ്ങളെയും പ്രാദേശിക വിമാനത്താവളങ്ങളെയും ബന്ധിപ്പിക്കുന്ന സർവീസുകൾ ശക്തിപ്പെടുത്താൻ പുതിയ വിമാനങ്ങൾ ഇൻഡിഗോയെ സഹായിച്ചേക്കും. നിലവിൽ ഇൻഡിഗോ പ്രാദേശിക സർവീസുകൾക്കായി ATR ടർബോപ്രോപ്പ് വിമാനങ്ങളും ഉപയോഗിക്കുന്നുണ്ട്. ഇവയിൽ ചിലതിന് പകരം കൂടുതൽ യാത്രക്കാരെ ഉൾക്കൊള്ളാൻ കഴിയുന്ന ജെറ്റ് വിമാനങ്ങൾ വിന്യസിക്കാനുള്ള സാധ്യതയാണ് പരിഗണിക്കുന്നത്.
നിലവിലുള്ള റൂട്ടുകളിൽ സീറ്റുകളുടെ എണ്ണം വർധിപ്പിക്കുന്നതിനൊപ്പം പുതിയ പ്രാദേശിക റൂട്ടുകൾ ആരംഭിക്കാനും ഇത് സഹായകമായേക്കും.
എംബ്രയർ വിവിധ ശേഷികളിലുള്ള റീജണൽ ജെറ്റ് വിമാനങ്ങളാണ് നിർമിക്കുന്നത്.കമ്പനിയുടെ E175-E1 വിമാനത്തിൽ 88 യാത്രക്കാർക്ക് വരെ സഞ്ചരിക്കാം. പുതിയ തലമുറയിലെ E190-E2 വിമാനത്തിന് 114 യാത്രക്കാരെയും E195-E2 വിമാനത്തിന് 146 യാത്രക്കാരെയും വരെ ഉൾക്കൊള്ളാനാകും.E2 ശ്രേണിയിലെ വിമാനങ്ങളിൽ കൂടുതൽ ഇന്ധനക്ഷമതയുള്ള എൻജിനുകളാണ് ഉപയോഗിക്കുന്നത്.എന്നാൽ ഈ മോഡലുകളിൽ ഏതാണ് ഇൻഡിഗോ തിരഞ്ഞെടുക്കുക എന്ന കാര്യത്തിൽ തീരുമാനമായിട്ടില്ല.
ഇന്ത്യൻ വ്യോമയാന വിപണിയിൽ സാന്നിധ്യം ശക്തിപ്പെടുത്താനുള്ള ശ്രമത്തിലാണ് എംബ്രയർ.ഇന്ത്യയിൽ വിമാനങ്ങളുടെ അന്തിമ അസംബ്ലി യൂണിറ്റ് സ്ഥാപിക്കുന്നതിനുള്ള സാധ്യതകൾ പരിശോധിക്കാൻ അദാനി ഡിഫൻസ് ആൻഡ് എയ്റോസ്പേസുമായി കമ്പനി ഈ വർഷം ധാരണാപത്രം ഒപ്പുവച്ചിരുന്നു. 88 യാത്രക്കാർക്ക് വരെ സഞ്ചരിക്കാവുന്ന E175-E1 വിമാനങ്ങളുടെ അസംബ്ലി ഇന്ത്യയിൽ ആരംഭിക്കുന്നതിനുള്ള സാധ്യതയാണ് പരിശോധിക്കുന്നത്. ഇന്ത്യയിൽ അസംബ്ലി പ്ലാന്റ് സ്ഥാപിക്കുന്നതിന് കുറഞ്ഞത് 200 വിമാനങ്ങളുടെ ഓർഡർ ആവശ്യമാണെന്ന് എംബ്രയർ സിഇഒ ഫ്രാൻസിസ്കോ ഗോമസ് നെറ്റോ നേരത്തെ വ്യക്തമാക്കിയിരുന്നു.
2026 അവസാനത്തോടെ ആവശ്യമായ ഓർഡറുകൾ ലഭിച്ചാൽ 2028 മുതൽ ഇന്ത്യയിൽ അസംബിൾ ചെയ്യുന്ന വിമാനങ്ങൾ വിതരണം ചെയ്യാൻ കഴിയുമെന്നായിരുന്നു കമ്പനിയുടെ വിലയിരുത്തൽ.
വിമാനശേഖരം വിപുലീകരിക്കുന്നതിനുള്ള ദീർഘകാല പദ്ധതിയിലാണ് ഇൻഡിഗോ. 2026 സെപ്റ്റംബറിലെ കണക്കനുസരിച്ച് കമ്പനിക്ക് 442 വിമാനങ്ങളാണുള്ളത്. 2030ഓടെ ഇത് ഏകദേശം 600 ആയി ഉയർത്താനാണ് ലക്ഷ്യം.നിലവിൽ ഇൻഡിഗോയുടെ വിമാനശേഖരത്തിൽ ഭൂരിഭാഗവും എയർബസിന്റെ നാരോബോഡി വിമാനങ്ങളാണ്. ഇതിന് പുറമെ 44 ATR ടർബോപ്രോപ്പ് വിമാനങ്ങളും കമ്പനിക്കുണ്ട്.ഓഗസ്റ്റിൽ സിഇഒയായി ചുമതലയേറ്റ വില്ലി വാൽഷിന്റെ നേതൃത്വത്തിൽ ദീർഘദൂര അന്താരാഷ്ട്ര സർവീസുകൾ വിപുലീകരിക്കാനും ഇൻഡിഗോ പദ്ധതിയിടുന്നുണ്ട്.
അതേസമയം കുറഞ്ഞ നിരക്കിലുള്ള ഹ്രസ്വദൂര വിമാനസർവീസുകളുടെ ബിസിനസ് മാതൃക നിലനിർത്തുമെന്നും കമ്പനി വ്യക്തമാക്കിയിട്ടുണ്ട്.
ലോകത്തിലെ മൂന്നാമത്തെ വലിയ ആഭ്യന്തര വ്യോമയാന വിപണിയാണ് ഇന്ത്യ. വിമാനയാത്രയ്ക്കുള്ള ആവശ്യകത വർധിക്കുന്ന സാഹചര്യത്തിൽ രാജ്യത്തെ വിമാനക്കമ്പനികൾ പുതിയ വിമാനങ്ങൾ വാങ്ങാനും സർവീസുകൾ വിപുലീകരിക്കാനും പദ്ധതിയിടുകയാണ്. നിലവിൽ ഇന്ത്യയിൽ എംബ്രയർ വിമാനങ്ങൾ ഉപയോഗിച്ച് സർവീസ് നടത്തുന്ന ഏക വിമാനക്കമ്പനി സ്റ്റാർ എയറാണ്.ഇൻഡിഗോയുമായുള്ള കരാർ യാഥാർഥ്യമായാൽ ഇന്ത്യൻ വിപണിയിൽ എംബ്രയറിന്റെ സാന്നിധ്യം ഗണ്യമായി വർധിക്കും.
India’s largest airline, IndiGo, is reportedly in talks with Brazilian aircraft manufacturer Embraer to purchase 100 regional jets, with an option for 50 additional aircraft. If finalised, the deal could become one of Embraer’s largest aircraft orders. The proposed acquisition could help IndiGo expand services to smaller Indian cities and potentially replace some of its existing ATR aircraft with higher-capacity regional jets. Deliveries are expected to begin in 2030 or later, subject to a successful agreement. Meanwhile, Embraer is strengthening its presence in India. The company has signed a memorandum of understanding with Adani Defence & Aerospace to explore establishing an aircraft final assembly facility in the country.
