ലോകപ്രശസ്ത ഹോട്ടൽ ശൃംഖലയായ ഹിൽട്ടണും ഒലീവ് ഹോസ്പിറ്റാലിറ്റിയും ചേർന്ന് ഇന്ത്യയിലെ ആദ്യത്തെ 10 ‘സ്പാർക്ക് ബൈ ഹിൽട്ടൺ’ (Spark by Hilton) ഹോട്ടലുകൾ സ്ഥാപിക്കുന്നതിനുള്ള കരാറിൽ ഒപ്പുവെച്ചു. ബെംഗളൂരു, ഗോവ, ജയ്പൂർ, നാസിക്, മഥുര, പൂനെ, രാജ്കോട്ട്, ഹൈദരാബാദ് തുടങ്ങിയ പ്രധാന നഗരങ്ങളിലാണ് ഈ ഹോട്ടലുകൾ വരുന്നത്.
2024ൽ ഇരു കമ്പനികളും ഒപ്പുവെച്ച തന്ത്രപരമായ കരാറിന്റെ ഭാഗമായി രാജ്യത്തുടനീളം 150 ഹോട്ടലുകൾ തുറക്കാനാണ് ലക്ഷ്യമിടുന്നത്. മെട്രോ നഗരങ്ങൾക്ക് പുറമെ വളർന്നുവരുന്ന മറ്റു നഗരങ്ങളിലേക്ക് കൂടി തങ്ങളുടെ സാന്നിധ്യം വ്യാപിപ്പിക്കാനാണ് ഹിൽട്ടൺ ഇതിലൂടെ ഉദ്ദേശിക്കുന്നത്. മിതമായ നിരക്കിൽ മികച്ച സൗകര്യങ്ങളും സേവനങ്ങളും ആഗ്രഹിക്കുന്ന പുതിയ തലമുറയിലെ സഞ്ചാരികളെ ലക്ഷ്യമിട്ടാണ് ‘സ്പാർക്ക് ബൈ ഹിൽട്ടൺ’ എത്തുന്നത്.
ലളിതവും എന്നാൽ സൗകര്യപ്രദവുമായ ഇന്റീരിയർ, പ്രാദേശിക വിഭവങ്ങൾ ഉൾപ്പെടുത്തിയ സൗജന്യ പ്രഭാതഭക്ഷണം, 24 മണിക്കൂറും പ്രവർത്തിക്കുന്ന റീട്ടെയിൽ മാർക്കറ്റ് എന്നിവ ഈ ഹോട്ടലുകളുടെ പ്രത്യേകതയായിരിക്കും. വരും വർഷങ്ങളിൽ ഇന്ത്യയിൽ പ്രവർത്തിക്കുന്ന ഹോട്ടലുകളുടെ എണ്ണം 400ൽ എത്തിക്കാനുള്ള ഹിൽട്ടണിന്റെ വിപുലീകരണ പദ്ധതിയുടെ ഭാഗമാണ് ഈ പുതിയ കരാറുകൾ. ഒലീവ് ഹോസ്പിറ്റാലിറ്റിയുമായുള്ള ഈ പങ്കാളിത്തം ഇന്ത്യയിലെ മിഡ്-മാർക്കറ്റ് ഹോട്ടൽ മേഖലയിൽ വലിയ മാറ്റങ്ങൾ കൊണ്ടുവരുമെന്ന് അധികൃതർ വ്യക്തമാക്കി.
Hilton partners with Olive Hospitality to open 10 Spark by Hilton hotels in key Indian cities including Bengaluru, Goa, and Pune. Learn about Hilton’s plan to open 150 hotels catering to the new generation of travelers
