ഫ്രാൻസിലെ ഏവിയാനിൽ നടക്കുന്ന ജി-7 ഉച്ചകോടിയുടെ ഭാഗമായി പ്രധാനമന്ത്രി നരേന്ദ്ര മോദിയും യുഎസ് പ്രസിഡന്റ് ഡൊണാൾഡ് ട്രംപും ഇന്ന് ഉഭയകക്ഷി ചർച്ചകൾ നടത്തും. 16 മാസങ്ങൾക്ക് ശേഷം ഇരുനേതാക്കളും നടത്തുന്ന ആദ്യ കൂടിക്കാഴ്ചയാണിത്. ഒമാൻ തീരത്ത് വാണിജ്യ കപ്പലുകൾക്ക് നേരെയുണ്ടായ യുഎസ് സൈനിക ആക്രമണത്തിൽ മൂന്ന് ഇന്ത്യൻ നാവികർ കൊല്ലപ്പെട്ടതിനെ തുടർന്ന് ഇരുരാജ്യങ്ങളും തമ്മിലുള്ള നയതന്ത്രബന്ധം വഷളായ പശ്ചാത്തലത്തിലാണ് ഈ നിർണായക കൂടിക്കാഴ്ച നടക്കുന്നത്. ഉഭയകക്ഷി വ്യാപാര കരാറുകൾ, പ്രതിരോധ സഹകരണം, പശ്ചിമേഷ്യൻ പ്രതിസന്ധി ഉൾപ്പെടെയുള്ള ആഗോള വിഷയങ്ങൾ എന്നിവ ഇരുനേതാക്കളും ചർച്ച ചെയ്യുമെന്നാണ് പ്രതീക്ഷിക്കുന്നത്.
അതേസമയം, ഉച്ചകോടിയുടെ ആദ്യദിനത്തിലെ ഔട്ട്റീച്ച് സെഷനിൽ സമുദ്ര സുരക്ഷയെക്കുറിച്ചും ആഗോള വ്യാപാരത്തിൽ യുദ്ധങ്ങൾ ഉണ്ടാക്കുന്ന ആഘാതങ്ങളെക്കുറിച്ചും പ്രധാനമന്ത്രി മോദി ശക്തമായ ആശങ്ക പ്രകടിപ്പിച്ചു. പശ്ചിമേഷ്യൻ സംഘർഷത്തിനിടയിൽ ഹോർമുസ് കടലിടുക്ക് വഴിയുള്ള സമുദ്രവ്യാപാരം തടസ്സപ്പെട്ടതിനെ തുടർന്ന് നിരവധി ഇന്ത്യൻ പൗരന്മാർക്ക് ജീവൻ നഷ്ടപ്പെട്ടതായി അദ്ദേഹം ചൂണ്ടിക്കാട്ടി. ആഗോള കപ്പൽപ്പാതകളുടെ സുരക്ഷ ഉറപ്പാക്കണമെന്നും നാവികർക്ക് ഭയമില്ലാതെ ജോലി ചെയ്യാനുള്ള സാഹചര്യം ഒരുക്കണമെന്നും ജി-7 നേതാക്കളോട് ആവശ്യപ്പെട്ട മോദി, ആഗോളതലത്തിൽ പരസ്പര വിശ്വാസമാണ് ഇന്നത്തെ ഏറ്റവും വലിയ തന്ത്രപ്രധാനമായ ആസ്തിയെന്നും ഓർമ്മിപ്പിച്ചു.
At the G7 summit, PM Narendra Modi raised strong concerns over disruptions in global maritime trade due to tensions in the Hormuz Strait, stressing the need for safe sea routes and protection of seafarers.
