ഇന്ത്യൻ ഓഹരി വിപണി ചരിത്രത്തിലെ ഏറ്റവും വലിയ ഐപിഒയ്ക്ക് (IPO) ജിയോ പ്ലാറ്റ്ഫോംസിനെ സജ്ജമാക്കാൻ റിലയൻസ് അതീവ രഹസ്യമായി നടപ്പിലാക്കിയ പദ്ധതിയായിരുന്നു ‘പ്രൊജക്റ്റ് ജൂപ്പിറ്റർ’. റിലയൻസിലെ ചുരുക്കം ചില ഉന്നത ഉദ്യോഗസ്ഥരും പ്രമുഖ നിക്ഷേപ ബാങ്കർമാരും മാത്രം അറിഞ്ഞ ഈ പ്രൊജക്റ്റിലൂടെ, വിവരങ്ങൾ ചോരാതിരിക്കാൻ ഡിജിറ്റൽ ആശയവിനിമയങ്ങൾ പൂർണ്ണമായി ഒഴിവാക്കി ഭൗതിക രേഖകൾ (Physical Documents) മാത്രമാണ് കൈമാറിയിരുന്നത്.
വലിയ കമ്പനികളുടെ ഐപിഒ മാനദണ്ഡങ്ങളിൽ ഇളവ് വരുത്താൻ സെബിയെ പ്രേരിപ്പിച്ചതും, പ്രൊജക്റ്റിന്റെ ഭാഗമായി മെറ്റ, ആൽഫബറ്റ് തുടങ്ങിയ ആഗോള നിക്ഷേപകരുമായി തന്ത്രപ്രധാനമായ ചർച്ചകൾ നടത്തിയതും ഈ നീക്കത്തിലൂടെയായിരുന്നു. വിപണിയിലെ പ്രതികൂല സാഹചര്യങ്ങൾ കണക്കിലെടുത്ത് നിലവിലുള്ളവരുടെ ഓഹരി വിൽക്കുന്നതിന് (OFS) പകരം, സമാഹരിക്കുന്ന 4 ബില്യൺ ഡോളർ (ഏകദേശം ₹33,500 കോടി) മുഴുവൻ കമ്പനിയിലേക്ക് തന്നെ എത്തുന്ന രീതിയിൽ ‘ഓൾ-പ്രൈമറി ഇഷ്യൂ’ ആയി മാറ്റിയാണ് ജൂൺ 19-ന് റിലയൻസ് ജിയോയുടെ കരട് രേഖകൾ സമർപ്പിച്ചത്.
എന്നാൽ ബ്ലൂംബർഗ് പുറത്തുവിട്ട ഈ റിപ്പോർട്ടിനോട് ഔദ്യോഗികമായി പ്രതികരിക്കാൻ റിലയൻസ് ഗ്രൂപ്പോ ജിയോയോ ഇതുവരെ തയാറായിട്ടില്ല. വരും മാസങ്ങളിൽ പൊതുവിപണിയിലേക്ക് പ്രവേശിക്കാനിരിക്കുന്ന ജിയോയുടെ ഈ മെഗാ ഐപിഒ ഇന്ത്യൻ കോർപ്പറേറ്റ് ലോകം ഉറ്റുനോക്കുന്ന ഏറ്റവും വലിയ സാമ്പത്തിക നീക്കങ്ങളിൽ ഒന്നാണ്.
Discover ‘Project Jupiter’, Mukesh Ambani’s secret strategy for Reliance Jio’s massive $4 billion IPO, featuring an all-primary issue and global investors.
