ഇന്ത്യൻ നാവികസേനയുടെ നാലാമത്തെ സർവേ വെസൽ ലാർജ് (SVL) ആയ ഐ.എൻ.എസ് സംശോധക് (INS Sanshodhak) കൊച്ചിയിലെ ദക്ഷിണ നാവിക കമാൻഡിൽ ഔദ്യോഗികമായി ചേർന്നു. കൊച്ചിയിലെ ഹോം പോർട്ടിലെത്തിയ കപ്പലിന് വാട്ടർ-കാനൻ സല്യൂട്ടും നാവികസേനയുടെ ബാൻഡ് മേളവും അകമ്പടിയായുള്ള പരമ്പരാഗതമായ വരവേൽപാണ് ലഭിച്ചത്. കൊൽക്കത്തയിൽ നിന്ന് വിശാഖപട്ടണം, ചെന്നൈ എന്നീ തുറമുഖങ്ങൾ പിന്നിട്ടാണ് ഐ.എൻ.എസ് സംശോധക് കൊച്ചിയിലെത്തിയത്.
ജൂൺ 21-ന് കൊൽക്കത്തയിൽ നടന്ന ചടങ്ങിൽ പ്രധാനമന്ത്രി നരേന്ദ്ര മോദിയാണ് പൂർണ്ണമായും തദ്ദേശീയമായി നിർമ്മിച്ച ഈ കപ്പൽ നാവികസേനയുടെ ഭാഗമാക്കിയത്. അത്യാധുനിക ഹൈഡ്രോഗ്രാഫിക്, ഓഷ്യാനോഗ്രാഫിക് സർവേ സംവിധാനങ്ങളുള്ള ഐ.എൻ.എസ് സംശോധക്, സർവേ പ്രവർത്തനങ്ങൾക്ക് പുറമെ ദുരന്തനിവാരണ പ്രവർത്തനങ്ങൾക്കും ആശുപത്രി കപ്പലായും ഉപയോഗിക്കാൻ സാധിക്കും. നാവികസേനയുടെ ഹൈഡ്രോഗ്രാഫിക് സർവേ ശേഷി വർദ്ധിപ്പിക്കുന്നതിനൊപ്പം ഇന്ത്യയുടെ തദ്ദേശീയ കപ്പൽ നിർമ്മാണ മേഖലയ്ക്ക് കൂടി ഈ നേട്ടം മുതൽക്കൂട്ടാവുമെന്ന് നാവികസേനാ വൃത്തങ്ങൾ അറിയിച്ചു.
INS Sanshodhak, the fourth Survey Vessel Large (SVL), officially joins the Southern Naval Command in Kochi following its commissioning by PM Modi
