സ്കൂൾ വിദ്യാഭ്യാസം മാത്രം പൂർത്തിയാക്കി ഇരുനൂറിലധികം കണ്ടുപിടുത്തങ്ങൾ നടത്തി ‘ഇന്ത്യയുടെ എഡിസൺ’ എന്ന വിശേഷണം സ്വന്തമാക്കിയ ശങ്കർ അബാജി ഭിസെയുടെ ശ്രദ്ധേയമായ ജീവിതകഥ പങ്കുവെച്ച് നടൻ ആർ. മാധവൻ. കൊളോണിയൽ കാലഘട്ടത്തിലെ ബോംബെയിൽ സ്വയം പഠനത്തിലൂടെ ശാസ്ത്ര ലോകത്ത് വിസ്മയം തീർത്ത ഭിസെ, പ്രിന്റിംഗ് രംഗം മാറ്റിമറിക്കാൻ സഹായിച്ച ‘ഭിസോടൈപ്പ്’ (Bhisotype) ഉൾപ്പെടെ നിരവധി യന്ത്രങ്ങളും ഉപകരണങ്ങളും രൂപകൽപ്പന ചെയ്തിട്ടുണ്ട്. ആർ. മാധവൻ ഇൻസ്റ്റാഗ്രാമിൽ പങ്കുവെച്ച എഐ (AI) നിർമ്മിത വീഡിയോയിലൂടെയാണ് ഈ ചരിത്രപുരുഷന്റെ അപൂർവ്വ സംഭാവനകൾ വീണ്ടും ചർച്ചയാകുന്നത്.
1867 ഏപ്രിൽ 29ന് ജനിച്ച ശങ്കർ അബാജി ഭിസെ ഓട്ടോമാറ്റിക് വെയിങ് മെഷീനുകൾ, ഇലക്ട്രോണിക് സൈൻ ബോർഡുകൾ തുടങ്ങി വൈവിധ്യമാർന്ന ഒട്ടനവധി കണ്ടുപിടുത്തങ്ങളിലൂടെ അന്താരാഷ്ട്ര തലത്തിൽ പോലും ശ്രദ്ധേയനായി. ശാസ്ത്ര മാഗസിനുകളിൽ നിന്ന് പ്രചോദനം ഉൾക്കൊണ്ട് ചെറുപ്പം മുതലേ പരീക്ഷണങ്ങൾ നടത്തിയ അദ്ദേഹത്തിന് ദാദാബായി നവറോജി, ഗോപാലകൃഷ്ണ ഗോഖലെ തുടങ്ങിയ പ്രമുഖരുടെ പിന്തുണയും ലഭിച്ചിരുന്നു.
ശാസ്ത്രത്തോടുള്ള അടങ്ങാത്ത അഭിനിവേശം കൊണ്ടും നിരന്തരമായ പരീക്ഷണങ്ങൾ കൊണ്ടും ഒരു കാലഘട്ടത്തിന്റെ തന്നെ ചരിത്രം മാറ്റിയെഴുതിയ ഈ പ്രതിഭയുടെ വിയോഗം ഇന്ത്യയുടെ ശാസ്ത്ര-സാങ്കേതിക ചരിത്രത്തിലെ വലിയൊരു നഷ്ടമായിരുന്നു. അതുകൊണ്ടുതന്നെ ഈ അതുല്യ പ്രതിഭയുടെ ചരിത്രം ഇന്നത്തെ തലമുറയ്ക്ക് വലിയ പ്രചോദനമാണ് നൽകുന്നത്.
Actor R Madhavan highlights the inspiring story of Shankar Abaji Bhise, India’s self-taught inventor known as the ‘Indian Edison’, who created over 200 inventions
