ടെസ്‌ല (Tesla), സ്പേസ്എക്സ് (SpaceX) എന്നീ കമ്പനികളുടെ ഓഹരി വിലയിലുണ്ടായ ശക്തമായ മുന്നേറ്റത്തെ തുടർന്ന് ഇലോൺ മസ്ക് വീണ്ടും ട്രില്യണയർ ക്ലബ്ബിൽ തിരിച്ചെത്തി. ബ്ലൂംബെർഗ് ബില്യണയേഴ്സ് സൂചിക പ്രകാരം, ഈ രണ്ട് കമ്പനികളിലെയും ഓഹരികൾ ഉയർന്നതോടെ മസ്കിന്റെ ആസ്തി ഏകദേശം 65 ബില്യൺ ഡോളർ വർധിച്ച് 1.04 ട്രില്യൺ ഡോളറിലെത്തി. ഒക്ടോബർ മാസം ആരംഭിച്ചതുമുതൽ സ്പേസ്എക്സ് ഓഹരികളിൽ 13 ശതമാനത്തോളവും ടെസ്‌ല ഓഹരികളിൽ 6.7 ശതമാനത്തോളവും വളർച്ചയാണ് രേഖപ്പെടുത്തിയിട്ടുള്ളത്. ഫോർബ്സിന്റെ കണക്കുകൾ പ്രകാരം മസ്കിന്റെ സമ്പത്ത് ഏകദേശം 1 ട്രില്യൺ ഡോളറാണ്.
പുതിയ ആസ്തി വർധനവോടെ ലോകത്തെ മറ്റ് കോടീശ്വരൻമാരെക്കാൾ ബഹുദൂരം മുന്നിലെത്താൻ മസ്കിന് സാധിച്ചിട്ടുണ്ട്. ബ്ലൂംബെർഗ് കണക്കുകൾ പ്രകാരം, രണ്ടാം സ്ഥാനത്തുള്ള ആമസോൺ സ്ഥാപകൻ ജെഫ് ബെസോസിന്റെ ആസ്തി ഏകദേശം 371.5 ബില്യൺ ഡോളറാണ്. കഴിഞ്ഞ ജൂണിൽ സ്പേസ്എക്സ് നാസ്ഡാകിൽ (Nasdaq) പബ്ലിക് ട്രേഡിങ് ആരംഭിച്ചതിനെ തുടർന്ന് മസ്ക് ലോകത്തിലെ ആദ്യ ട്രില്യണയറായി മാറിയിരുന്നു. എന്നാൽ, ടെസ്‌‌ലയുടെയും സ്പേസ്എക്സിന്റെയും ഓഹരി മൂല്യത്തിലുണ്ടായ ഇടിവിനെത്തുടർന്ന് അദ്ദേഹത്തിന്റെ ആസ്തി ഈ പരിധിക്കും താഴേക്ക് പോയിരുന്നു. നിലവിലെ ഓഹരി മുന്നേറ്റത്തോടെയാണ് അദ്ദേഹം വീണ്ടും ഈ നേട്ടം സ്വന്തമാക്കിയിരിക്കുന്നത്.
കഴിഞ്ഞ ആഴ്ച അനലിസ്റ്റുകളുടെ പ്രവചനം മറികടന്നുകൊണ്ട് പുറത്തുവന്ന ടെസ്‌ലയുടെ മൂന്നാം പാദ വാഹന ഡെലിവറി കണക്കുകളാണ് ഓഹരി വിലയിലെ പുതിയ കുതിപ്പിന് ആക്കം കൂട്ടിയത്. ബ്ലൂംബെർഗ് റിപ്പോർട്ട് പ്രകാരം കഴിഞ്ഞ വെള്ളിയാഴ്ച മാത്രം മസ്കിന്റെ ആസ്തിയിൽ 61 ബില്യൺ ഡോളറിന്റെ വർധനവാണുണ്ടായത്. ഇതിനുപുറമെ, സ്പേസ്എക്സിനോടും നിക്ഷേപകർക്ക് വലിയ താൽപര്യമാണ് ഉള്ളത്. കമ്പനിയുടെ യഥാർത്ഥ സാധ്യതകൾ വിപണി പൂർണ്ണമായി വിലയിരുത്തിയിട്ടില്ലെന്ന് മോർഗൻ സ്റ്റാൻലി (Morgan Stanley) അനലിസ്റ്റുകൾ അഭിപ്രായപ്പെടുന്നു. കൂടാതെ, കഴിഞ്ഞ ആഴ്ച സ്റ്റാർഷിപ്പ് (Starship) പേടകം വിജയകരമായി ഭ്രമണപഥത്തിലെത്തിച്ചതും കമ്പനിക്ക് വലിയ ഉണർവ് നൽകി.
ഇതിനിടയിൽ തന്റെ ബിസിനസ്സ് സംരംഭങ്ങളിൽ പുതിയ മാറ്റങ്ങൾ കൊണ്ടുവരാനുള്ള ശ്രമങ്ങളും മസ്ക് ആരംഭിച്ചിട്ടുണ്ട്. സ്പേസ്എക്സിന്റെ ആർട്ടിഫിഷ്യൽ ഇന്റലിജൻസ് (AI) പ്രവർത്തനങ്ങൾക്ക് പുതിയ രൂപം നൽകാനാണ് അദ്ദേഹത്തിന്റെ തീരുമാനം. ഗ്രോക്ക് (Grok) ചാറ്റ്ബോട്ട് നിയന്ത്രിക്കുന്ന ‘സ്പേസ്എക്സ് എഐ’ (SpaceXAI) എന്ന വിഭാഗത്തിന്റെ പേര് ‘സ്പേസ്എക്സ് എസ്ഐ’ (SpaceXSI) എന്നാക്കി മാറ്റാൻ അദ്ദേഹം നിർദ്ദേശിച്ചു. ‘ആർട്ടിഫിഷ്യൽ ഇന്റലിജൻസ്’ എന്നതിന് പകരം ‘സൂപ്പർ ഇന്റലിജൻസ്’ (Super Intelligence – SI) എന്ന പദം ഉപയോഗിക്കണമെന്ന യു.എസ് പ്രസിഡന്റ് ഡൊണാൾഡ് ട്രംപിന്റെ സമീപകാല പ്രസ്താവനയെ തുടർന്നാണിത്. കഴിഞ്ഞ ആഴ്ച വൈറ്റ് ഹൗസിൽ നടന്ന യോഗത്തിന് ശേഷമാണ് ട്രംപ് ഇത് സംബന്ധിച്ച എക്സിക്യൂട്ടീവ് ഉത്തരവിൽ ഒപ്പുവെച്ചത്. ഇലോൺ മസ്ക് എക്സ് പ്ലാറ്റ്‌ഫോമിൽ ഇതിനെ പിന്തുണച്ച് രംഗത്തുവന്നിരുന്നുവെങ്കിലും, ഔദ്യോഗികമായി പേരുമാറ്റം ഇതുവരെ നടപ്പിലായിട്ടില്ല.
Elon Musk has re-entered the trillionaire club with a $1.04 trillion fortune, driven by strong gains in Tesla and SpaceX shares and renewed investor interest.
