ഇന്ത്യയും യുകെയും തമ്മിലുള്ള ഉഭയകക്ഷി വ്യാപാരവും സാമ്പത്തിക നിക്ഷേപവും കൂടുതൽ ശക്തമാക്കാൻ ധാരണയായി. ലണ്ടനിൽ നടന്ന നാലാമത് ഇന്ത്യ-യുകെ ഫിനാൻഷ്യൽ മാർക്കറ്റ്സ് ഡയലോഗിൽ (FMD) ഇരുരാജ്യങ്ങളിലെയും ധനകാര്യ മന്ത്രാലയങ്ങളിലെ മുതിർന്ന ഉദ്യോഗസ്ഥരും ആർബിഐ, സെബി, ബാങ്ക് ഓഫ് ഇംഗ്ലണ്ട്, എഫ്സിഎ തുടങ്ങിയ സാമ്പത്തിക നിയന്ത്രണ ഏജൻസികളുടെ പ്രതിനിധികളും പങ്കെടുത്തു. 2026 ജൂലൈ 15-ന് പ്രാബല്യത്തിൽ വന്ന ഇന്ത്യ-യുകെ സമഗ്ര സാമ്പത്തിക വ്യാപാര കരാറിന്റെയും (CETA) വിഷൻ 2035-ന്റെയും പശ്ചാത്തലത്തിൽ, സുസ്ഥിര സാമ്പത്തിക വളർച്ച ലക്ഷ്യമിട്ട് മുന്നോട്ട് പോകാൻ യോഗത്തിൽ തീരുമാനമായി.
ഗുജറാത്തിലെ ഗിഫ്റ്റ് സിറ്റി (GIFT IFSC) കേന്ദ്രീകരിച്ച് ഇന്ത്യൻ കമ്പനികളുടെ ഇക്വിറ്റി, ബോണ്ട് ലിസ്റ്റിംഗുകൾ പ്രോത്സാഹിപ്പിക്കുന്നതിനും അതിർത്തി കടന്നുള്ള നിക്ഷേപങ്ങൾ വർദ്ധിപ്പിക്കുന്നതിനും ഇരുരാജ്യങ്ങളും സംയുക്തമായി പ്രവർത്തിക്കും. അന്താരാഷ്ട്ര തലത്തിൽ ഇന്ത്യൻ രൂപയുടെ വ്യാപാരത്തിനും പ്രാധാന്യത്തിനും ലണ്ടൻ നൽകുന്ന പിന്തുണയെ യോഗത്തിൽ ഇരുവിഭാഗവും സ്വാഗതം ചെയ്തു. കൂടാതെ റീഇൻഷുറൻസ്, പെൻഷൻ, അസറ്റ് മാനേജ്‌മെന്റ്, ക്യാപിറ്റൽ മാർക്കറ്റ് മേഖലകളിൽ കൂടുതൽ പങ്കാളിത്തം ഉറപ്പാക്കാനും ആഗോള മൂലധനം ഇന്ത്യയിലേക്ക് ആകർഷിക്കാനും തീരുമാനിച്ചിട്ടുണ്ട്.
ഫിൻടെക്, നിർമ്മിത ബുദ്ധി (AI) സാങ്കേതികവിദ്യകളുടെ സാധ്യതകളും അവയുയർത്തുന്ന വെല്ലുവിളികളും യോഗത്തിൽ വിശദമായി ചർച്ച ചെയ്തു. സാമ്പത്തിക തട്ടിപ്പുകൾ നടത്താൻ എഐ ദുരുപയോഗം ചെയ്യുന്നതും സൈബർ സുരക്ഷാ ഭീഷണികളും തടയുന്നതിന് വിവരങ്ങൾ കൈമാറാനും സംയുക്തമായി പ്രവർത്തിക്കാനും ഇരുരാജ്യങ്ങളും ധാരണയിലെത്തി. സാമ്പത്തിക മേഖലയിലെ ഈ പുരോഗതികൾ വരുംദിവസങ്ങളിലെ ഉഭയകക്ഷി ചർച്ചകളിലൂടെ അവലോകനം ചെയ്യുമെന്നും വ്യക്തമാക്കിയിട്ടുണ്ട്
India and the UK agreed to strengthen financial cooperation through GIFT City listings, cross-border investments, and rupee internationalisation at the 4th Financial Markets Dialogue in London.
