ട്രെയിനുകളിലും റെയിൽവേ സ്റ്റേഷനുകളിലും സ്പീക്കർ മോഡിൽ പാട്ടോ വീഡിയോയോ കേട്ട് സഹയാത്രികർക്ക് അസൗകര്യം സൃഷ്ടിക്കുന്നവർക്കെതിരെ കർശന നടപടിയുണ്ടാകുമെന്ന് ഇന്ത്യൻ റെയിൽവേ മുന്നറിയിപ്പ് നൽകി. സമാധാനപരവും സുഖകരവുമായ യാത്ര ഉറപ്പാക്കുന്നതിനായി യാത്രക്കാർ ഇയർഫോണുകൾ ഉപയോഗിക്കണമെന്നും ഫോൺ സംഭാഷണങ്ങൾ കുറഞ്ഞ ശബ്ദത്തിൽ വെക്കണമെന്നും അധികൃതർ അഭ്യർത്ഥിച്ചു.
എസി കോച്ചുകൾ പോലുള്ള അടച്ചിട്ട സ്ഥലങ്ങളിൽ ഉച്ചത്തിലുള്ള ഫോൺ സംഭാഷണങ്ങളും റിംഗ്‌ടോണുകളും മറ്റുള്ളവർക്ക് വലിയ ബുദ്ധിമുട്ടുകൾ ഉണ്ടാക്കുന്നതായി റെയിൽവേ ചൂണ്ടിക്കാട്ടി. 1989-ലെ റെയിൽവേ നിയമത്തിലെ സെക്ഷൻ 145(2) പ്രകാരം യാത്രക്കാർക്ക് ശല്യമുണ്ടാക്കുന്ന പ്രവൃത്തികൾക്ക് 1,000 രൂപ പിഴയും ട്രെയിനിൽ നിന്നുള്ള പുറത്താക്കലും നേരിടേണ്ടിവരും.
റെയിൽവേ ജീവനക്കാരുടെ നിർദേശം അവഗണിച്ച് ഇത്തരം ശല്യപ്പെടുത്തലുകൾ തുടർന്നാൽ ആറു മാസം വെറും തടവ് വരെ ലഭിച്ചേക്കാം. അത്തരം നിയമലംഘകരിൽ നിന്ന് 5,000 രൂപ വരെ പിഴ ഈടാക്കാനും അല്ലെങ്കിൽ തടവും പിഴയും ഒരുമിച്ച് ചുമത്താനുമുള്ള വ്യവസ്ഥകളും പുതിയ ഭേദഗതി പ്രകാരം നിയമത്തിലുണ്ട്.
Indian Railways has issued a strict warning against playing music or videos on speaker mode in trains, stating that violators can face fines up to ₹5,000 and up to six months of imprisonment
