2026-27 സാമ്പത്തിക വർഷത്തിലെ ആദ്യ പാദത്തിൽ (ഏപ്രിൽ-ജൂൺ) ഇന്ത്യയിലേക്ക് ഏറ്റവും കൂടുതൽ വിദേശ നിക്ഷേപം (FDI) എത്തിയത് ജപ്പാനിൽ നിന്നാണെന്ന് സർക്കാർ കണക്കുകൾ വ്യക്തമാക്കുന്നു. 5.71 ബില്യൺ ഡോളറിന്റെ (ഏകദേശം 47,000 കോടിയിലധികം രൂപ) നിക്ഷേപമാണ് ഈ കാലയളവിൽ ജപ്പാൻ ഇന്ത്യയിൽ നടത്തിയത്. മുൻ സാമ്പത്തിക വർഷം മുഴുവൻ ജപ്പാനിൽ നിന്ന് ലഭിച്ച 3.74 ബില്യൺ ഡോളറിനേക്കാൾ വളരെ കൂടുതലാണിത്. ഈ പാദത്തിൽ ഇന്ത്യയിലേക്ക് എത്തിയ ആകെ വിദേശ നിക്ഷേപമായ 19.81 ബില്യൺ ഡോളറിന്റെ 29 ശതമാനവും ജപ്പാനിൽ നിന്നാണ്.
ബാങ്കിങ്, ഫിനാൻഷ്യൽ സേവനങ്ങൾ, സാങ്കേതികവിദ്യ, ഡിജിറ്റൽ ഇൻഫ്രാസ്ട്രക്ചർ എന്നീ മേഖലകളിലെ പ്രമുഖ കമ്പനികളുടെ ലയിപ്പിക്കലുകളും വലിയ സാമ്പത്തിക ഇടപാടുകളുമാണ് ഈ കുതിച്ചുചാട്ടത്തിന് പ്രധാന കാരണമായത്. ശ്രീറാം ഫിനാൻസിലെ 20% ഓഹരികൾ ജപ്പാനിലെ എം.യു.എഫ്.ജി ബാങ്ക് വാങ്ങിയതാണ് ഇതിൽ ഏറ്റവും ശ്രദ്ധേയമായ ഇടപാട്. ഇന്ത്യയിലെ നിക്ഷേപങ്ങൾ സുഗമമാക്കുന്നതിനായി ഒൻപത് സംസ്ഥാനങ്ങളിലായി 12 ‘ജാപ്പനീസ് ഇൻഡസ്ട്രിയൽ ടൗൺഷിപ്പുകൾ’ (JIT) നിലവിലുണ്ട്. ആദ്യ പാദത്തിലെ നിക്ഷേപ പട്ടികയിൽ 5.22 ബില്യൺ ഡോളറുമായി സിംഗപ്പൂര് രണ്ടാം സ്ഥാനത്തും മൗറീഷ്യസ് മൂന്നാം സ്ഥാനത്തുമാണ്.
Japan emerges as India’s largest FDI source in Q1 FY2026-27, investing over $5.71 billion driven by major deals in banking and tech sectors.
