ഒന്നിലധികം വിവാഹേതര ബന്ധങ്ങൾ പുറത്തുവന്നതിന് പിന്നാലെ പ്രമുഖ എ.ഐ ചിപ്പ് നിർമ്മാണ കമ്പനിയായ എൻവിഡിയയുടെ സി.ഇ.ഒ ജെൻസൻ ഹുവാങ്ങിനെ പുറത്താക്കാൻ കമ്പനി ഡയറക്ടർ ബോർഡ് ഒരുങ്ങുന്നതായി റിപ്പോർട്ട്. ചൈനീസ് ചാരവൃത്തി സംശയിക്കുന്ന ആലീസ് ഹുവാങ്ങുമായി തനിക്ക് ബന്ധമുണ്ടായിരുന്നതായി ഞായറാഴ്ച ജെൻസൻ ഹുവാങ് സമ്മതിച്ചതിന് പിന്നാലെ കമ്പനി കടുത്ത നേതൃത്വ പ്രതിസന്ധി നേരിടുകയാണ്. ഇതിനുപുറമെ, എൻവിഡിയയുടെ ഹെൽത്ത് കെയർ വിഭാഗം വൈസ് പ്രസിഡന്റ് കിംബർലി പവലുമായും ഹുവാങ്ങിന് അടുത്ത ബന്ധമുണ്ടായിരുന്നതായി ന്യൂയോർക്ക് ടൈംസ് റിപ്പോർട്ട് ചെയ്തു. മാർച്ചിൽ കാലിഫോർണിയയിലെ ഒരു ഹോട്ടലിൽ വെച്ച് ഇരുവരും അടുത്തിടപഴകുന്നതിന്റെ ദൃശ്യങ്ങൾ പുറത്തുവന്നതായാണ് വിവരം.
2008-ൽ എൻവിഡിയയിൽ ചേർന്ന കിംബർലി നിലവിൽ കമ്പനിയുടെ ആഗോള ഹെൽത്ത് കെയർ വിഭാഗം വൈസ് പ്രസിഡന്റാണ്. മെഡിക്കൽ ഇമേജിംഗ് ഉപകരണങ്ങളിൽ എൻവിഡിയയുടെ ജി.പി.യു (GPU) സാങ്കേതികവിദ്യ ഉപയോഗപ്പെടുത്തുന്നതിനായാണ് പവൽ കമ്പനിയിലെത്തിയത്. 2016-ൽ എ.ഐ ബിസിനസ് ഡെവലപ്‌മെന്റ് സീനിയർ ഡയറക്ടറായ ഇവർ, 2017-ൽ ഹെൽത്ത് കെയർ വിഭാഗം വൈസ് പ്രസിഡന്റായി സ്ഥാനക്കയറ്റം നേടി. മെഡിക്കൽ ഇമേജിംഗ്, ലൈഫ് സയൻസസ്, മരുന്ന് കണ്ടുപിടുത്തം എന്നിവയ്ക്കായുള്ള എ.ഐ പ്ലാറ്റ്‌ഫോമുകളുടെ മേൽനോട്ടമാണ് നിലവിൽ ഇവർ വഹിക്കുന്നത്.
സിംഗപ്പൂർ ആസ്ഥാനമായുള്ള മെഗാസ്പീഡ് ഇന്റർനാഷണൽ എന്ന കമ്പനിയിലെ എക്സിക്യൂട്ടീവായിരുന്നു ആലീസ് ഹുവാങ്. അനധികൃത ചിപ്പ് കടത്തുമായി ബന്ധപ്പെട്ട് യു.എസ് അന്വേഷണം നേരിടുന്ന കമ്പനിയാണിത്. സംഭവത്തിൽ എൻവിഡിയ ബോർഡ് സ്വതന്ത്ര അന്വേഷണം ആരംഭിച്ചിട്ടുണ്ട്. ഹുവാങ്ങിന്റെ ഭാവിയെക്കുറിച്ച് തീരുമാനമെടുക്കാൻ ഡയറക്ടർ ബോർഡ് അടിയന്തര യോഗം ചേരാനിരിക്കെ, എൻവിഡിയയുടെ ഓഹരി മൂല്യത്തിൽ എട്ട് ശതമാനത്തോളം ഇടിവ് രേഖപ്പെടുത്തി. അതേസമയം, ചാരവൃത്തി ആരോപണങ്ങൾ ചൈന നിഷേധിച്ചിട്ടുണ്ട്
Nvidia’s board is reportedly moving to remove CEO Jensen Huang following allegations of extramarital affairs and Chinese espionage ties. Stock drops 8%.
