മൈക്രോസോഫ്റ്റ് സേവനങ്ങൾ തടസ്സപ്പെട്ടു

ലോകത്തെ പ്രമുഖ സാങ്കേതിക കമ്പനിയായ മൈക്രോസോഫ്റ്റിന്റെ ഡിജിറ്റൽ സേവനങ്ങളിലുണ്ടായ വ്യാപക തകരാർ ആഗോളതലത്തിൽ പ്രതിസന്ധി സൃഷ്ടിച്ചു. Outlook, Microsoft Teams, Copilot ഉൾപ്പെടെയുള്ള Microsoft 365 സേവനങ്ങൾ തടസ്സപ്പെട്ടതോടെ നിരവധി രാജ്യങ്ങളിലെ സർക്കാർ സ്ഥാപനങ്ങൾക്കും വിമാനക്കമ്പനികൾക്കും ബാങ്കുകൾക്കും സ്വകാര്യ കമ്പനികൾക്കും പ്രവർത്തനങ്ങളിൽ ബുദ്ധിമുട്ടുകൾ നേരിട്ടു.

നവംബർ 12-ന് ഉത്തര അമേരിക്കയിൽ ആരംഭിച്ച സേവനത്തകരാർ പിന്നീട് ഏഷ്യ–പസഫിക് മേഖലയിലേക്കും വ്യാപിക്കുകയായിരുന്നു. 12 മണിക്കൂറിലേറെ നീണ്ട തടസ്സം പരിഹരിക്കാൻ മൈക്രോസോഫ്റ്റ് നടത്തിയ ആദ്യഘട്ട ശ്രമങ്ങൾ പ്രതീക്ഷിച്ച ഫലം നൽകിയില്ലെന്നാണ് റിപ്പോർട്ടുകൾ.

മൈക്രോസോഫ്റ്റിന്റെ ക്ലൗഡ് അധിഷ്ഠിത ഇമെയിൽ, ആശയവിനിമയ സംവിധാനങ്ങളെയാണ് തകരാർ പ്രധാനമായും ബാധിച്ചത്.Microsoft 365 സേവനങ്ങളുടെ ഭാഗമായി പ്രവർത്തിക്കുന്ന Exchange Online-നെയും അതുമായി ബന്ധിപ്പിച്ചിട്ടുള്ള വിവിധ ആപ്ലിക്കേഷനുകളെയും പ്രശ്നം ബാധിച്ചു.ഇതോടെ ഇമെയിലുകൾ അയയ്ക്കുന്നതിനും സ്വീകരിക്കുന്നതിനും ബുദ്ധിമുട്ടുകൾ നേരിട്ടു. സ്ഥാപനങ്ങളുടെ ആഭ്യന്തര ആശയവിനിമയം, മീറ്റിങ്ങുകൾ, ഉപഭോക്തൃസേവനം തുടങ്ങിയ പ്രവർത്തനങ്ങളിലും തടസ്സമുണ്ടായി.Outlook, Teams എന്നിവയ്ക്ക് പുറമേ മൈക്രോസോഫ്റ്റിന്റെ ആർട്ടിഫിഷ്യൽ ഇന്റലിജൻസ് അസിസ്റ്റന്റായ Copilot ഉപയോഗിക്കുന്ന ചില ഉപഭോക്താക്കൾക്കും സേവനപ്രശ്നങ്ങൾ റിപ്പോർട്ട് ചെയ്തു.

മൈക്രോസോഫ്റ്റ് സേവനത്തകരാറിന്റെ പ്രത്യാഘാതങ്ങൾ വിവിധ രാജ്യങ്ങളിലെ സർക്കാർ സ്ഥാപനങ്ങളിലേക്കും വ്യാപിച്ചു.ഓസ്ട്രേലിയയിലെ ആഭ്യന്തര രഹസ്യാന്വേഷണ ഏജൻസിയായ Australian Security Intelligence Organisation (ASIO), Australian Federal Police എന്നിവയുടെ പ്രവർത്തനങ്ങളെയും തകരാർ ബാധിച്ചു.ജപ്പാനിലെ സർക്കാർ വകുപ്പുകൾ ഉപയോഗിക്കുന്ന പൊതുവായ ഐടി സംവിധാനങ്ങളിലും പ്രശ്നങ്ങളുണ്ടായി. ഇമെയിൽ ആശയവിനിമയം തടസ്സപ്പെട്ടതോടെ ചില സർക്കാർ പ്രവർത്തനങ്ങൾ വൈകി.സിംഗപ്പൂരിലെ സർക്കാർ ഇമെയിൽ സംവിധാനങ്ങളിലും തടസ്സമുണ്ടായതായി അധികൃതർ അറിയിച്ചു.ഫിലിപ്പീൻസിലെ സുപ്രീം കോടതിയും ഇമെയിൽ സേവനങ്ങളിലുണ്ടായ തകരാർ കാരണം ചില നടപടികളിലും മറുപടികളിലും കാലതാമസമുണ്ടാകുമെന്ന് മുന്നറിയിപ്പ് നൽകി.ന്യൂസിലൻഡിലെ ഇമിഗ്രേഷൻ വിഭാഗം വിസ അപേക്ഷകളുടെ പ്രോസസ്സിങ് താൽക്കാലികമായി നിർത്തിവെക്കേണ്ട സാഹചര്യമുണ്ടായതും തകരാറിന്റെ വ്യാപ്തി വ്യക്തമാക്കുന്നു.

ആഗോള സേവനത്തകരാർ ഇന്ത്യൻ വ്യോമയാന മേഖലയിലെ ചില ഉപഭോക്തൃസേവനങ്ങളെയും ബാധിച്ചു.ഇൻഡിഗോയുടെ ഇമെയിൽ അധിഷ്ഠിത കസ്റ്റമർ സപ്പോർട്ട് സംവിധാനത്തിലാണ് പ്രധാനമായും തടസ്സമുണ്ടായത്. യാത്രക്കാരിൽനിന്നുള്ള ഇമെയിലുകൾ സ്വീകരിക്കുന്നതിൽ ബുദ്ധിമുട്ടുണ്ടാകാമെന്ന് കമ്പനി അറിയിച്ചു. അടിയന്തര സഹായം ആവശ്യമുള്ളവർ വെബ്സൈറ്റിലോ മൊബൈൽ ആപ്പിലോ ലഭ്യമായ മറ്റ് സേവനങ്ങൾ ഉപയോഗിക്കണമെന്നും ഇൻഡിഗോ നിർദേശിച്ചു.ആകാശ എയറിന്റെ ഇമെയിൽ ഉപഭോക്തൃസേവനത്തിലും കാലതാമസമുണ്ടായി. അടിയന്തര ആവശ്യങ്ങൾക്ക് ഫോൺ, സോഷ്യൽ മീഡിയ തുടങ്ങിയ സംവിധാനങ്ങൾ ഉപയോഗിക്കാൻ കമ്പനി യാത്രക്കാരോട് ആവശ്യപ്പെട്ടു.
അതേസമയം, എയർ ഇന്ത്യ തങ്ങളുടെ വിമാന സർവീസുകൾക്ക് തടസ്സമുണ്ടായിട്ടില്ലെന്ന് വ്യക്തമാക്കി. ഇമെയിൽ ആശയവിനിമയം സുഗമമാക്കാൻ ബദൽ ക്രമീകരണങ്ങൾ ഏർപ്പെടുത്തിയതായും കമ്പനി അറിയിച്ചു. ഇന്ത്യൻ വിമാനക്കമ്പനികളിൽ റിപ്പോർട്ട് ചെയ്ത പ്രധാന പ്രശ്നം ഇമെയിൽ ഉപഭോക്തൃസേവനങ്ങളുമായി ബന്ധപ്പെട്ടതാണ്. വിമാന സർവീസുകൾ വ്യാപകമായി റദ്ദാക്കിയെന്നോ വിമാനത്താവളങ്ങളുടെ പ്രവർത്തനം പൂർണമായി നിലച്ചെന്നോ റിപ്പോർട്ടുകൾ വ്യക്തമാക്കുന്നില്ല.

ആഗോളതലത്തിൽ വലിയ പ്രത്യാഘാതങ്ങൾ സൃഷ്ടിച്ച തകരാറിന് പിന്നിൽ സൈബർ ആക്രമണമാണോ എന്ന ആശങ്കയും ഉയർന്നിരുന്നു. എന്നാൽ ലഭ്യമായ വിവരങ്ങൾ പ്രകാരം പ്രശ്നത്തിന് പിന്നിൽ സൈബർ പ്രവർത്തനങ്ങളുണ്ടെന്നതിന് തെളിവില്ലെന്ന് മൈക്രോസോഫ്റ്റ് അറിയിച്ചു.സർവർ സംബന്ധമായ സാങ്കേതിക പ്രശ്നങ്ങളാണ് സേവനത്തകരാറിലേക്ക് നയിച്ചതെന്നാണ് കമ്പനിയുടെ വിശദീകരണം.തകരാർ പരിഹരിക്കുന്നതിനായി ബാധിക്കപ്പെട്ട സർവറുകളിൽ മാറ്റങ്ങൾ വരുത്തിയെങ്കിലും ആദ്യഘട്ട നടപടികൾ പ്രതീക്ഷിച്ച രീതിയിൽ പ്രവർത്തിച്ചില്ല.ചില മേഖലകളിൽ സേവനങ്ങൾ ഭാഗികമായി പുനഃസ്ഥാപിക്കപ്പെട്ടതിന്റെ സൂചനകൾ ലഭിച്ചതായും പ്രശ്നം പൂർണമായി പരിഹരിക്കാനുള്ള നടപടികൾ തുടരുന്നതായും കമ്പനി വ്യക്തമാക്കി.മൈക്രോസോഫ്റ്റിന്റെ സേവനങ്ങളുമായി ബന്ധിപ്പിച്ചിട്ടുള്ള മറ്റ് സാങ്കേതിക പ്ലാറ്റ്‌ഫോമുകളിലും തകരാറിന്റെ പ്രത്യാഘാതങ്ങളുണ്ടായി. OpenAI, Anthropic തുടങ്ങിയ ആർട്ടിഫിഷ്യൽ ഇന്റലിജൻസ് കമ്പനികൾ Microsoft 365 സംവിധാനങ്ങളുമായുള്ള ചില ഇന്റഗ്രേഷനുകളിൽ പ്രശ്നങ്ങൾ റിപ്പോർട്ട് ചെയ്തു.

സർക്കാർ ഓഫീസുകൾ, ബാങ്കുകൾ, വിമാനക്കമ്പനികൾ, ആശുപത്രികൾ, വിദ്യാഭ്യാസ സ്ഥാപനങ്ങൾ, സ്വകാര്യ കമ്പനികൾ എന്നിവയെല്ലാം ക്ലൗഡ് അധിഷ്ഠിത ഡിജിറ്റൽ സംവിധാനങ്ങളെ വലിയ തോതിൽ ആശ്രയിക്കുന്നുണ്ട്. ഇമെയിൽ, ഫയൽ ഷെയറിങ്, ഓൺലൈൻ മീറ്റിങ്ങുകൾ, ഉപഭോക്തൃസേവനം, ആർട്ടിഫിഷ്യൽ ഇന്റലിജൻസ് തുടങ്ങിയ നിരവധി സേവനങ്ങൾ പരസ്പരം ബന്ധിപ്പിച്ചാണ് പ്രവർത്തിക്കുന്നത്.

A major global outage affecting Microsoft’s digital services has disrupted government operations, airlines and corporate organisations across several countries. Microsoft 365 services, including Outlook, Microsoft Teams and Copilot, were among the most affected.The disruption began in North America on November 12 and subsequently spread to the Asia-Pacific region. Government systems in Australia, Japan, Singapore and New Zealand experienced service interruptions, while some Indian airlines reported disruptions to their email-based customer support services. Microsoft attributed the outage to server-related technical issues and stated that there was no indication of a cyberattack. Efforts are ongoing to fully restore the affected services.