ജനിച്ച അന്നുതന്നെ പിൻകാലിലെ തുടയെല്ലിന് പൊട്ടലേറ്റ ഏഴാഴ്ച പ്രായമുള്ള ‘രാജ’ എന്ന ഏഷ്യൻ ആനക്കുട്ടിയെ വിദഗ്ധ ചികിത്സയ്ക്കായി ഗുജറാത്തിലെ ജാംനഗറിലുള്ള വൻതാരയിലേക്ക് എയർലിഫ്റ്റ് ചെയ്തു. വൻതാര സ്ഥാപകൻ അനന്ത് അംബാനിയുടെ പ്രത്യേക ഇടപെടലിലൂടെയാണ് നവംബർ 20-ന് ഗുവാഹത്തിയിൽ നിന്ന് ജാംനഗറിലേക്ക് പ്രത്യേക വിമാനത്തിൽ ആനക്കുട്ടിയെ എത്തിച്ചത്; ഇന്ത്യയിൽ ഇത്തരത്തിൽ നടക്കുന്ന മൂന്നാമത്തെ എയർലിഫ്റ്റാണിത്. ഒക്ടോബർ രണ്ടിന് അസമിലെ ഗോഗാമുഖിൽ ജനിച്ച രാജയ്ക്ക്, 11 വയസ്സുള്ള പ്രായം കുറഞ്ഞ തള്ളയാനയുടെ പരിഭ്രമത്തിലുള്ള ചവിട്ടേറ്റാണ് വലതു തുടയെല്ലിന് (Femur) സാരമായി പരിക്കേറ്റത്. തുടർന്ന് എഴുന്നേറ്റ് നിൽക്കാനോ തള്ളയാനയുടെ പാൽ കുടിക്കാനോ കഴിയാതെ വന്ന ആനക്കുട്ടിക്ക് ഒക്ടോബർ എട്ട് മുതൽ വൻതാരയുടെ വിദഗ്ധ വെറ്ററിനറി സംഘം അസമിൽ വെച്ച് പ്രാഥമിക ചികിത്സ നൽകി വരികയായിരുന്നു.

എന്നാൽ അണുബാധയും, രക്തത്തിലെ പഞ്ചസാരയുടെ അളവ് കുറയുന്നതും, കരളിന്റെ പ്രവർത്തനത്തിലെ സമ്മർദ്ദവും ഉൾപ്പെടെയുള്ള സങ്കീർണ്ണതകൾ വർദ്ധിച്ചതോടെയാണ് അടിയന്തര ആശുപത്രി ചികിത്സ അനിവാര്യമായത്. റോഡ് മാർഗ്ഗമുള്ള 2,500 കിലോമീറ്ററിലധികം ദൂരം യാത്ര ചെയ്യുന്നത് അതീവ ദുർബലനായ ആനക്കുട്ടിക്ക് താങ്ങാനാവാത്തതിനാൽ, നാലുമണിക്കൂർ നീണ്ട വിമാനയാത്രയ്ക്കായി പരിക്കേറ്റ കാലിന് ഇളക്കം തട്ടാത്ത വിധം പ്രത്യേകം തയ്യാറാക്കിയ ക്രേറ്റിലാണ് രാജയെ കൊണ്ടുപോയത്. വെറ്ററിനറി ഡോക്ടർമാരുടെ സംഘം യാത്രയിലുടനീളം ആനക്കുട്ടിയുടെ ആരോഗ്യനില നിരീക്ഷിച്ചു. വൻതാരയിലെ ആശുപത്രിയിൽ പ്രവേശിപ്പിച്ച രാജയ്ക്ക് ഇനി വിദഗ്ധ ഓർത്തോപീഡിക് ചികിത്സയും ഫിസിയോതെറാപ്പിയും ജീവിതകാലം മുഴുവൻ നീളുന്ന പരിചരണവും ലഭ്യമാക്കുമെന്ന് വൻതാര സി.ഇ.ഒ വിവാൻ കരണി അറിയിച്ചു.
Anant Ambani’s Vantara airlifts 7-week-old injured elephant calf Raja from Assam to Jamnagar for specialized orthopedic care and lifelong rehabilitation.
